Swivutiso Swa Vahlayi

Loko wanuna ni wansati lava nga tekanangiki va heta vusiku hinkwabyo va ri swin’we ehansi swiyimo leswi solekaka, xana sweswo i vumbhoni bya leswaku va endle xidyoho lexi lavaka komiti ya vuavanyisi?

Ina, loko ku nga ri na swiyimo leswi a swi va boha ku endla tano, ku ta vumbiwa komiti ya vuavanyisi hikwalaho ka leswi ku nga ni vumbhoni bya leswaku ku ve ni ku tikhoma ko biha hi tlhelo ra masangu.—1 Kor. 6:18.

Huvo ya vakulu yi ta kambisisa xiyimo xin’wana ni xin’wana hi vukheta ku vona loko swi fanerile ku vumba komiti ya vuavanyisi. Hi xikombiso: Xana vanhu volavo i vanhu lava rhandzanaka? Xana va tshame va nyikiwa ndzayo hikwalaho ka ndlela leyi va tikhomaka ha yona? Hi swihi swiyimo leswi endleke leswaku va heta vusiku hinkwabyo va ri swin’we? Xana va lo swi kunguhata? Xana a ku ri ni leswi va nga swi endlaka kumbe a ku ri ni swiyimo leswi a swi va boha, kumbexana xiendlakalo lexi nga languteriwangiki xa xihatla, lexi endleke leswaku va va swin’we vusiku byebyo? (Ekl. 9:11) Xana a va etlele kwihi? Tanihi leswi swiyimo swi nga faniki, ku nga ha va ni swivangelo swin’wana leswi vakulu va nga ta swi kambisisa.

Endzhaku ka loko swivangelo hinkwaswo swi kambisisiwile, huvo ya vakulu yi ta endla xiboho xa loko swi fanerile leswaku ku vumbiwa komiti ya vuavanyisi.