Loko Ku Va Ni Mhangu Ya Ntumbuluko

“A hi heleriwe hi ntshembo. Swilo hinkwaswo leswi a hi ri na swona swi khukhuriwe hi ndhambi.”—Andrew, Sierra Leone.

“Endzhaku ka loko ku ve ni xidzedze, hi tlhelele ekaya. Loko hi fika a ku nga ha ri na nchumu. Hi sale hi lo gabaa! Xinhwanyetana xa mina xi tilahlele ehansi hi matsolo, xi sungula ku rila.”—David, loyi a tshamaka eSwihlaleni swa Virgin.

LOKO u tshame u pona mhangu, u yi twisisa kahle ndlela leyi lava weriweke hi mhangu va titwaka ha yona: ku khomiwa hi rhumbyana, ku nga tshembi leswi nga endleka, ku pfilunganyeka, ntshikilelo ni nkelunkelu. Vo tala lava poneke a va ha swi naveli ku ya emahlweni va hanya.

Loko u lahlekeriwe hi swilo hinkwaswo hikwalaho ka mhangu, u nga ha twa onge u nga lahla thawula. U nga ha sungula ku twa onge ku hanya a swi pfuni nchumu. Hambiswiritano, Bibele yi kombisa leswaku vutomi i bya nkoka naswona yi tlhela yi hi tiyisekisa leswaku hi ta va ni vumundzuku byo tsakisa.

KU TIVA NTIYISO LOWU NGA EBIBELENI SWI ENDLA HI SWI XIYA LESWAKU VUTOMI I BYA NKOKA

Eklesiasta 7:8 yi ri: “Makumu ya mhaka ma antswa ku ri ni masungulo ya yona.” Loko u sungula ku hlakarhela endzhaku ka mhangu, u nga ha heleriwa hi ntshembo. Kambe loko u tirha hi matimba swilo swi ta ya swi antswa.

Bibele yi profete hi nkarhi lowu hi nga ta ka ‘hi nga ha twi . . . mpfumawulo wa ku rila kumbe wa ku kolola.’ (Esaya 65:19) Leswi swi ta endleka ehansi ka Mfumo wa Xikwembu loko misava yi hundzuriwe paradeyisi. (Pisalema 37:11, 29) A ku nge he vi ni timhangu. Ku ta herisiwa switlhavi hinkwaswo hikuva Xikwembu xa Matimba Hinkwawo xi tshembise leswaku: “Swilo swo sungula a swi nge tsundzukiwi, hambi embilwini a swi nge ti.”—Esaya 65:17.

Tsundzuka: Muvumbi u lava ku ku “nyika vumundzuku ni ntshembo” ku nga vutomi lebyi nga ni ku rhula ehansi ka mfumo wa Xikwembu. (Yeremiya 29:11) Xana ku tiva ntiyiso lowu nga eBibeleni swi nga ku pfuna u vona leswaku vutomi i bya nkoka? Sally, loyi a tshahiweke eka xihloko xo sungula u ri: “Ku tsundzuka swilo leswinene leswi Mfumo wa Xikwembu wu nga ta ku endlela swona enkarhini lowu taka, swi ta ku pfuna u rivala hi maxangu lawa u tshameke u langutana na wona naswona u ta kota ku tiyisela swiyimo swo tika sweswi.”

Dyondza leswi engetelekeke mayelana ni leswi Mfumo wa Xikwembu wu nga ta swi endlela vanhu ku nga ri khale. Sweswo swi ta endla leswaku u wu rindzela hi mahlongati nkarhi lowu timhangu ti nga ta va ti nga ha ri kona. Kambe Bibele yi na swiringanyeto leswi nga ku pfunaka leswaku u tiyisela maxangu lawa u nga na wona. Xiya swikombiso swi nga ri swingani.

Tindzimana Ta Bibele Leti Nga Ku Pfunaka

Etlela nkarhi lowu ringaneleke.

“Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.”—Eklesiasta 4:6.

Valavisisi va vika leswaku endzhaku ko langutana ni xiyimo lexi tsemaka nhlana, loko “u nga kumi nkarhi lowu eneleke wo wisa, swi nga endla leswaku u tshama u tshikilelekile.” Hikwalaho i swa nkoka leswaku u wisa nkarhi lowu eneleke.

Phofula ndlela leyi u titwaka ha yona.

“Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.”—Swivuriso 12:25.

Vulavula ni xirho xa ndyangu kumbe munghana loyi u n’wi tshembaka. Loko vanghana kumbe swirho swa ndyangu va ku twa u tiphofula va ta ku khutaza va tlhela va ku pfuna.a

Wu langutele hi mahlongati nkarhi lowu swilo swi nga ta va swi famba kahle.

“Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa [Xikwembu] naswona ku ta va ni ku lulama eka swona.”—2 Petro 3:13.

a Munhu loyi a tshamaka a tshikilelekile swi nga ha lava a pfuniwa hi madokodela.