Ma Rhambiwa Eka Ntsombano Wa Muganga Wa “Ririmi Leri Tengeke” Wa 1990!

1 Eka malembe ya dzana lama hundzeke, mintsombano yi ve xivumbeko lexi hlawulekeke xa vugandzeri bya hina. Ngopfu-ngopfu ku sukela eku pfuxetiweni ka ntirho wa hina wo chumayela hi 1919, tinhlengeletano leti ti ve minkarhi leyi funghiweke ya ku phyuphyisiwa hi tlhelo ra moya loko miseve ya ku vonakala loku paluxiweke loku humaka eRitweni ra Xikwembu yi tivisiwile.

2 Hi xikombiso, tsundzuka ntsako lowukulu lowu kombisiweke eColumbus, Ohio, hi 1931 loko vanhu va Xikwembu va kume vito lerintshwa leri nge Timbhoni ta Yehova. Nakambe, ku tsaka lokukulu ku landzele ntiyiso lowu paluxiweke eWashington, D.C., hi 1935, lowu kombisaka leswaku vumundzuku bya “ntshungu lowukulu” a ku ri ku ponela emisaveni leyintshwa ya Yehova.—Nhlav. 7:9.

3 Mintsombano ya muganga ya 1990 yi ta va ni nhloko-mhaka leyi nge “Ririmi Leri Tengeke,” naswona u rhambiwa ku va kona. Edzongeni wa Afrika, ku lunghiseleriwe mintsombano ya 19. Rito ra Yehova ra vuprofeta leri nga eka Sofonia 3:9, (NW) ri ri: “Kutani ndzi ta hundzuluxela vanhu eka ririmi leri tengeke, leswaku hinkwavo va ta vitana vito ra Yehova, va ta n’wi tirhela hi mbilu yi ri yin’we.” Ntsombano wa lembe leri a wu nga hlamuseli leswi “ririmi leri tengeke” ri nga swona ntsena, kambe wu ta tlhela wu hi pfuna ku twisisa mhaka leyi ku ri dyondza ni ku ri vulavula handle ko kanakana swi nga swa nkoka swinene ha yona ni ndlela leyi vuswikoti bya hina bya ku ri tirhisa swi tiyisaka ha yona vun’we bya vumakwerhu bya misava hinkwayo.

4 FIKA KA HA RI NA NKARHI: Nhlengeletano ya Yehova yi hi rhamba ku dya etafuleni ra yena ra moya. Ku fika hi nkarhi i xikombiso xa xichavo ni ku tlangela. Kahle-kahle, leswi swi vula leswaku hi fanele ku fika ka ha ri na nkarhi siku rin’wana ni rin’wana naswona hi va hi tshamile nongonoko wu nga si sungula. Leswi swi lava ku pfumelela nkarhi lowu aneleke wo khathalela timhaka leti lavaka nyingiso, to tanihi ku paka movha wa hina ni ku kuma switshamo leswi faneleke swa ndyangu wa hina.—1 Vakor. 14:40.

5 Vapfhumba va le mintsombanweni ya le Poland lembe leri nga hundza va tsakisiwe hi ku tinyiketela eka Xikwembu, rirhandzu ni vun’we bya vamakwavo. Ku tlangela lokukulu ka malunghiselelo ya swa moya lawa ntsombano a wu ta ma nyikela a ku ri erivaleni. Mixo wun’wana ni wun’wana, vamakwerhu a va ri eswivandleni swa ntsombano ka ha ri na nkarhi, va tshamile ni ku lunghekela risimu ni xikhongelo xo pfula. Va tshamile ku fikela eka risimu ni xikhongelo xo pfala, naswona va tshamile endzhaku ka nongonoko leswaku va va ni xinakulobye ni vamakwavo.

6 Ku hleleka ka vamakwerhu a ku ri xikombiso. A va tele ku ta yingisela ni ku ta dyondza. Hambi ku ri ku na ka mpfula eka switediyamu leswi pfulekeke ePoznan ni le Chorzów a swi swi kotanga ku hambukisa nyingiso wa vona enongonokweni. Vana lava a va ri kona, ku katsa ni vana lavantsongo a va layiwe kahle, va nga bi huwa naswona a va yisa nyingiso enongonokweni. Mindyangu a yi tshame kun’we. A va ri xikombiso eku kombiseni ka vona ka xichavo lexikulu eka tafula ra Yehova. Xana hi nga pfunekisa ku yini hi xikombiso xa vona?

7 Ku tekelela xikombiso lexinene xa van’wana i swa Matsalwa. (2 Vates. 3:7) Hambi leswi swiyimo swa hina swa munhu hi xiyexe swi nga ha vaka leswi hambaneke, na hina hi lava ku kuma swo tala emintsombanweni ya hina. Ku sivela ku karhateka ni ku hela matimba hikwalaho ka ku lunghiselela ku ya exivandleni xa nhlengeletano nkarhi wu hundzile, mindyangu yin’wana yi swi kuma swi pfuna ku veka nkarhi lowunene wa ku wisa. Hi ku namarhela xiyimiso lexi swinene, hakanyingi va kuma vurhongo lebyinene bya nivusiku ivi va va lava lunghekeleke ku endla malunghiselelo hi siku leri landzelaka ka ha ri na nkarhi. Leswi swi papalata ku fika loko nongonoko wu ri karhi wu ya emahlweni, leswi swi kavanyetaka ni leswi swi nga siringaka eka lava ana se va tshameke. Ku ehleketa ka hina emhakeni leyi i xikombiso xa ku xixima ni xichavo xa hina eka Yehova ni rirhandzu ni ku ehleketelela ka hina ka vamakwerhu.

8 NTSOMBANO WA MASIKU YA MUNE: Ntsombano wa Muganga wa “Ririmi Leri Tengeke” wu ta teka masiku ya mune. Wu ta sungula hi Ravumune hi 1:30 p.m. naswona wu ta hela kwalomu ka 5:10 p.m. hi Ravumune, Ravuntlhanu ni Mugqivela, naswona hi Sonto hi 4:00 p.m. Hi Ravuntlhanu ku ya fikela hi Sonto, nongonoko wu ta sungula hi 9:30 a.m. (Xiya: Ntsombano wa le Pitori wu ta sungula hi Ravuntlhanu ivi wu hela hi Musumbunuku.) Siku rin’wana ni rin’wana ri ta tatiwa hi rungula ra ntikelo leri yelanaka ni ku vulavula ririmi leri tengeke. Ku ta va ni tinkulumo, minkombiso, mintokoto, minxaxamelo ni tidrama timbirhi ta Bibele.

9 Swi endli pakani ya wena leswaku u nga kayeli hambi ku ri nongonoko wun’we. Leswi swi nga lava ku tinyikela ka munhu hi xiyexe ni mindzulamiso exiyimisweni xa wena. Van’wana va nga ha swi kuma swi fanela ku endla malunghiselelo lama hlawulekeke ni muthori wa vona. Vo tala va tlhela va pfala mabindzu ya vona leswaku va va kona eka minongonoko hinkwayo. Hambi swi ri tano, anakanya hi leswi vo tala va vamakwerhu va nyikeleke ha swona na leswi va bohekeke ku swi lulamisa leswaku va va kona emintsombanweni ePoland lembe leri hundzeke. Xana a swi ku khutazi swinene leswaku u va kona entsombanweni wa ka n’wina eka nongonoko wun’wana ni wun’wana? Yehova hakunene u ta katekisa lava va endlaka mhaka leyi nhloko-mhaka ya xikhongelo lexi humaka embilwini ni ku endla matshalatshala lama sukaka embilwini leswaku va va kona.—Vahev. 10:24, 25.

10 YINGISELA SWINENE: Eka Psalma 50:7, Yehova u ri: “Yingisa, tiko ranga, ndzi ta vulavula.” Hikwalaho, hi nkarhi wa nongonoko wa ntsombano, u nga kavanyetiwi hi swivono ni mimpfumawulo leswi nga yelaniki ni mhaka leyi yi nyikeriwaka eplatifomo. Ku navela ka hina ku vulavula ririmi leri tengeke handle ko kanakana ku fanele ku hi susumetela ku pfumelelana hi xitalo ni xikombelo xa Yehova lexi nga eka Esaya 55:2, lexi nge: ‘Ndzi yingiseleni swinene.’

11 Mhaka hinkwayo leyi nga ta nyikeriwa entsombanweni lowu i ya vuhlayiseki bya hina bya moya naswona yi ta tirha ku tiyisa ku tiyimisela ka hina ku tshama hi tiyile eku tirheleni ka hina Yehova naswona hi vun’we ni vamakwerhu. Ntsombano wu ta hi twananisa ni swilaveko swa sweswinyana ni ku hi pfuna ku fambisana ni nhlengeletano ya Yehova. Ku pfumala ku yingisela ku ta hetelela eku siyiweni ka hina endzhaku. Hi fanele hi tshama hi veke mianakanyo ya hina eka nongonoko leswaku hi kuma mpfuno lowu taleke eka wona ivi endzhaku ka kwalaho hi tirhisa leswi hi swi dyondzeke.—Yak. 1:25.

12 Xana ku na swin’wana leswi hi nga swi endlaka leswaku hi nyikela nyingiso lowu antswaka enongonokweni ivi hi tsundzuka rungula leri nyikeriweke? Ina, swi kona. Vapfhumba vo tala va ntsombano va vumbe mukhuva lowu pfunaka wa ku tsala tinotsi hi nkarhi wa nongonoko. Swilo leswi tirhisiwaka ku tsala tinotsi leswi faneleke swi fanele swi katsiwa ni Tibibele ni tibuku ta tinsimu tanihi ku tihlomisa loku lavekaka loko u va kona entsombanweni. Loko u langute ku tsala tinotsi hi ku kanakana, ha yini u nga swi ringeti hi nkarhi wa Ntsombano wa “Ririmi Leri Tengeke”? U nga ha kuma leswaku i ndlela leyinene yo hlayisa nyingiso wa wena wu nga hambukisiwi eka leswi swi vuriwaka ni leswaku swi ku sirhelela ku pfumelela mianakanyo ya wena ku tsendzeleka.

13 Tinotsi a ti lavi ku ndlandlamuxiwa kumbe ku endliwa hi vukheta lebyikulu. Hakanyingi xiga xin’we kumbe swimbirhi swi ta va swi anerile eka yinhla-nkulu. Vakulu va swi kuma swi pfuna ku va ni tinotsi leti xaxametiweke kahle leswaku va fambisa mpfuxeto lowu nga ni nkoka wa nongonoko wa ntsombano eka Nhlangano wa Ntirho. Nakambe, va nga navela ku hlanganisa to tala ta tinhla leti nyikeriweke entsombanweni entirhweni wa vona wa ku dyondzisa ni wa vurisi.

14 RISIMU NI XIKHONGELO: Hi xixima Yehova hi ku yimbelelela ku dzunisiwa ka yena. I xiphemu xa vugandzeri bya hina. Yehova nakambe wa tsaka loko vanhu va yena va n’wi tshinelela hi xikhongelo lexi humaka embilwini. (Swiv. 15:8b) Mintsombano ya muganga yi hi nyikela nkarhi lowu hlawulekeke wo va lava hlanganeke ni magidi ya vamakwerhu va xinuna ni va xisati eku dzuniseni ka Yehova hi risimu ni xikhongelo. Hambi swi ri tano, van’wana va kombise ku kayivela ka xichavo eka swiyenge leswi swa nkoka swa vugandzeri bya hina. Hi ndlela yihi ke? Hi ku fika entsombanweni exikarhi kumbe endzhaku ka risimu ni xikhongelo xo pfula swi nga fanelanga. Kumbe emakumu ka nongonoko, van’wana va suka eswitshan’wini swa vona hi nkarhi wa risimu ni le mahlweni ka xikhongelo. Hikwalaho ka yini ke? Ku nga ha va ni xivangelo lexinene xa ku endla leswi eka makhamba ma nga ri mangani. Hambi swi ri tano, xana xichavo ni ku tlangela loku faneleke swa kombisiwa etafuleni ra Yehova loko van’wana va tshika lunghelo ra ku yimbelela ni ku hlanganyela eka xikhongelo leswaku va ta hatlisa va fika emimovheni ya vona kumbe ku dya?—Mat. 6:33.

15 Vukheta byi fanele ku tirhisiwa leswaku eku landzeleleni ka ku tianerisa ka munhu hi xiyexe, a hi pfumeleli langutelo ra misava ra mina ku sungula kumbe mikhuva leyo biha yo fana ni makwanga ni vutianakanyi leswaku swi sivela nhluvuko wa hina wa moya. Onge hi nga kombisa moya lowu fanaka wa ku tlangela swilo leswo hlawuleka hi laha vamakwerhu va endleke ha kona emintsombanweni ePoland lembe leri hundzeke, naswona onge hi nga fambisana na vona hi ku kombisa xichavo lexi faneleke xa swivumbeko swo tano leswi tlakukeke swa vugandzeri bya hina, ku nga ku khongela ni ku yimbelelela ku dzunisa Yehova.—Ps. 69:30.

16 MAHANYELO YA HINA YA VUKRISTE: Mahanyelo ni ku languteka ka hina ka Vukriste emintsombanweni swi hi tisele ku twala lokunene tanihi Timbhoni ta Yehova. Leswi swi hikwalaho ka leswi hi tiyimiseleke eku gandzeleni ka hina ka Yehova na hikwalaho ka leswi hi nga langutiki ku va kona entsombanweni tanihi ku tihungasa ni van’wana ntsena. Loko hi hlanganela swiendlakalo swo tano leswi hlawulekeke, hi fanele ku hlayisa ntikelo wa Vukriste ni xivumbeko xa mianakanyo xa moya, hi tikhoma tanihi vatirheli hi minkarhi hinkwayo.—1 Vakor. 10:31-33.

17 Hambi swi ri tano, swa kavanyeta ku vona leswaku va nga ri vangani lava vaka kona emintsombanweni va ve lava nga khathaliki eka langutelo, maambalelo, mavulavulelo ni ku tikhoma ka vona hi ndlela leyi nga fanelangiki. Loko swilo swo tano swi humela erivaleni ebandlheni ra kwalaho kumbe entsombanweni, xana ku nga endliwa yini ke? Lava va nga ni timfanelo ta moya va fanele ku nyikela ndzayo ya rirhandzu hi langutelo ro lulamisa nakambe. (Vagal. 6:1; Vaef. 4:11, 12) Ku vulavula ririmi leri tengeke swi fanele swi hi susumetela ku seketela ku twala ka hina lokunene ni mimpimanyeto leyi tlakukeke ya mahanyelo.

18 Muendzi eka wun’wana wa mintsombano u siye xiphephana lexi tsariweke leswi landzelaka ebokisini ra minyikelo: “Ndzi tiphinile swinene hi nongonoko wa n’wina. Sweswi ndzi ta dyondza Bibele ni un’wana wa vamakwerhu. Leri a ku ri riendzo ra mina ro sungula eka yihi ni yihi ya tinhlengeletano ta n’wina. A ndzi kunguhate ku ta hi Mugqivela ntsena, hikuva Sonto i siku ra mina ro ya ekerekeni. Kambe a ndzi khumbeke swinene lerova ndzi tile namuntlha naswona ndzi te ni dyangu wa mina hinkwawo. Kambe ndzi hetiwe matimba hi vanhu lavakulu lava vulavulelaka ehenhla loko xivulavuri xi ri karhi xi vulavula.”

19 Nakambe swi xiyiwile leswaku emintsombanweni yin’wana, vana va nga ri vangani va kondlo-a-ndzi-dyi va tshama eka swiyenge leswi tlakukeke kumbe swivandla leswi nga ekule swa holo leyikulu, va hundziselana swiphephana, va hlevetela naswona hi ntolovelo a va yisi nyingiso enongonokweni. Mahanyelo ya muxaka lowu ma kombisa leswaku va ha lava vulawuri bya vatswari naswona va fanele ku tshama ni ndyangu. Vatswari lava nga ni vutihlamuleri va ta yisa nyingiso eka timhaka leti ivi va nyikela vukongomisi lebyi laviwaka hi vana va vona. (Vaef. 6:4) Vamakwerhu va xinuna, va xisati ni vana va fanele ku twisisa leswaku loko nongonoko wu sungurile, i nkarhi wo yingisela, hayi wo vulavula.—Deut. 31:12.

20 EKA VATSWARI: Vana lavantsongo ni vana va kondlo-a-ndzi-dyi va le xikarhi ka lava va rhamberiweke eNtsombanweni wa Muganga wa “Ririmi Leri Tengeke.” Na vona va fanele ku vulavula ririmi leri tengeke handle ko kanakana. I swinene swonghasi ku vona vana lava dyondzeke ku nyikela nyingiso lowukulu eka minhlangano hinkwayo ya Vukriste ni lava va tsakelaka swinene nongonoko wa ntsombano! (Ps. 148:12, 13) Kambe swo tala swi titshege hi xikombiso ni vulawuri bya vatswari. Vantshwa vo tala va dyondzisiwe kahle ku tsala tinotsi. Loko tanihi mutswari u nga si dyondzisa vana va wena ndlela yo tsala tinotsi, ha yini u nga tirhisi nkarhi lowu saleke ku endla tano ntsombano wa n’wina wu nga si fika? Hambi ku ri vana lavantsongo swinene va nga khutaziwa ku tsala Matsalwa lama kombisiweke ni marito-nkulu lama yelanaka na wona lawa va ma twaka ma phofuriwa hi swivulavuri. Vatswari van’wana va lunghiselela ku pfuxeta tinhla-nkulu leti humaka eka nongonoko wa siku endzhaku ko tlhelela endhawini ya vona ya byetlelo kumbe loko va ri karhi va ya ekaya.

21 Kavula, vatswari vo tala va swi twisisa leswaku mboyamelo wa ntumbuluko wa vana i ku tlanga. Va pfumala ntokoto evuton’wini, naswona a va vupfanga. Hikwalaho, va fanele va dyondzisiwa nkarhi lowu va faneleke ku yingisela ha wona ni ndlela leyi va fanelaka ku tikhoma ha yona eminhlanganweni. Leswi swi lava vulawuri lebyinene bya vatswari va vona. Vatswari van’wana va ve lava honisaka exivandleni lexi. Hi minkarhi yin’wana, hambi loko vatswari va nga ha kombisa xichavo lexinene eka Yehova hi nkarhi wa xikhongelo, vana va vona va tlanga ni ku kavanyeta van’wana. Vatswari va fanele va tiva leswi vana va vona va swi endlaka hambi ku ri hi nkarhi wa swikhongelo. Nakambe, va endla yini loko va suka eswitshan’weni swa vona hi nkarhi wa nongonoko? Xana vana va tshikiwa va nga lawuriwi exikarhi kumbe endzhaku ka nongonoko wa ntsombano? (Swiv. 29:15) Vatswari hinkwavo va Vukriste va fanele ku lawula swinene vana va vona hi minkarhi hinkwayo loko va ri karhi va va kurisa “hi ku va laya ni ku va dyondzisa ta [Yehova].”—Vaef. 6:4.

22 NTIRHISANO WA WENA LOWU TALEKE WA TLANGERIWA: Nkunguhato ni ntirho lowu xiyekaka swi endliwile ku endlela leswaku vutshamo lebyi aneleke, tibuku, swakudya ni malunghiselelo man’wana swi va leswi kumekaka eka un’wana ni un’wana loyi a nga kona entsombanweni. Ku tiyisekisa ku humelela ka malunghiselelo lawa, bandlha rin’wana ni rin’wana ri aviwe hi laha ku kongomeke eka ntsombano wo karhi. Ntirhisano wa wena lowu taleke i wa nkoka leswaku ku siveriwa ku tala ku tlula mpimo. Kavula, ku nga ha va ni swiyimo leswi swi swi endlaka swi fanela leswaku vanhu va nga ri vangani va va kona entsombanweni exivandleni xin’wana. Hambi swi ri tano, vo tala va fanele va swi kota ku va kona entsombanweni exivandleni lexi va averiweke xona.—1 Vakor. 13:5; Vafil. 2:4.

23 Ntirhisano wa wena lowu taleke wa komberiwa emhakeni ya ku hlayisa switshamo. U komberiwa ku tsundzuka leswaku SWITSHAMO SWI NGA HLAYISERIWA NTSENA SWIRHO SWA LE KUSUHI SWA NDYANGU WA WENA NA MANI NA MANI LA NGA HA VAKA A FAMBA NA WENA EMOVHENI WA WENA N’WINI. U komberiwa leswaku u nga hlayiseli van’wana switshamo. Hi minkarhi yin’wana, switshamo swin’wana swa hlayisiwa kambe swi nga hlayiseriwanga munhu wo karhi. Leswi a swi kombisi rirhandzu naswona swa kanganyisa eka varindzi ni van’wana lava lavaka switshamo leswi nga kona. Ku pfumelelana ni xitsundzuxo xa Bibele, hi fanele ku lwela ku kombisa rirhandzu ra vumakwerhu ni ku tirhisana hi laha ku taleke ni lunghiselelo leri amukelekaka ra ku hlayisa switshamo.—2 Pet. 1:5-8.

24 Ku ringanyetiwa leswaku ku avanyisa lokunene ku tirhisiwa eku teni ni swilo swa munhu hi xiyexe endhawini ya ntsombano. Enkarhini lowu hundzeke, van’wana va te ni swigwitsirisi leswikulu kumbe swilo swin’wana swo tika ni leswikulu leswi a swi nga koteki ku vekiwa ehansi ka switshamo swa vona. Leswi swi vekiwe endleleni kumbe ehenhla ka switshamo. Leswi swi vange leswaku van’wana va nga kumi vutshamo, naswona minkarhi yin’wana swi lwisane ni milawu ya ndzilo ni ya vuhlayiseki. Hi fanele ku kombisa ku ehleketelela etimhakeni to tano.

25 Ku tirhisiwa ka tikhamera ta video kun’we ni xitirhisiwa xo rhekhoda mpfumawulo swa pfumeleriwa exivandleni xa ntsombano. Hambi swi ri tano, lava va tirhisaka xitirhisiwa xo tano va fanele va tirhisa vukheta leswaku va papalata ku kavanyeta kumbe ku sirhela van’wana. Xitirhisiwa xo tano a xi fanelanga xi vekiwa etindleleni kumbe eminyangweni. Ku hava xitirhisiwa xo tano lexi faneleke ku hlanganisiwa ni fambiselo ra nkulumo ya le rivaleni kumbe laha gezi ri humaka kona. Timboni to tala ti nge pfumeleriwi. Lava va kavanyetaka kumbe ku honisa xin’wana ni xin’wana xa swiletelo leswi swi nga laha henhla va fanele handle ko kanakana va lulamisa mhaka leyi loko yi tisiwa eka nyingiso wa vona. Varindzi ni van’wana lava nga ni vutihlamuleri va ta xalamukela ku lulamisa ku tluriwa kun’wana ni kun’wana ka swiletelo leswi, naswona va fanele ku kuma ntirhisano lowu taleke lowu humaka eka lava va tirhisaka xitirhisiwa xo tano.

26 NTIRHO WA SWAKUDYA: Lunghiselelo ra ntirho lowu olovisiweke wa swakudya lowu fanaka ni wa lembe leri nga hundza wu kunguhateriwe 1990. Leswi swi olovisa ndzhwalo wa ntirho swinene naswona swi pfumelela nyingiso lowu engetelekeke leswaku wu nyikiwa timhaka ta moya ta ntsombano, vatirhi va swi kota ku tiphina swinene hi nongonoko. (Eks. 12:16b; Deut. 31:12; it Vol. 1 matl. 503-4, 821; ringanisa Luka 10:38-42.) Xiyimiso xa swakudya xi nyikela mphakelo lowu ringaneke wa minkarhi ya nimixo ni ya nhlikanhi. (Ringanisa Matewu 14:14-20.) Eka swakudya swa ni madyambu, un’wana ni un’wana u ntshunxekile ku endla malunghiselelo ya yena n’wini, hambi leswi swakudya swin’wana swi nga ta va swi ri kona entsombanweni.

27 Sosayiti yi wu tlangela swinene nseketelo lowunene lowu n’wina vamakwerhu va xinuna ni va xisati a mi ri karhi mi wu nyika eka malunghiselelo ya ntirho wa swakudya emintsombanweni ya muganga hi malembe layo tala. Leswi swi swi endle swi koteka ku hirha miako leyinene ni ku khathalela swilo swa ntsombano leswi lavaka mali. Mali ya ku hirhiwa ka yin’wana ya miako yi engetelekeke swinene emalembeni ma nga ri mangani lama hundzeke. Hikwalaho, minyikelo yin’wana ni yin’wana leyi kongomisiwaka eku hlanganisiweni ka minxavo yo tano ya tlangeriwa swinene. Minyikelo yin’wana ni yin’wana ya swilo leswi lavaka mali swa le mahlweni ka ntsombano yi nga rhumeriwa eka Komiti Ya Ntsombano Wa Muganga exivandleni xa ka n’wina.

28 TANA EKA NTSOMBANO WA MUGANGA WA “RIRIMI LERI TENGEKE”: Hi ku va kona eNtsombanweni wa Muganga wa “Ririmi Leri Tengeke” ni ku yingisela swinene enongonokweni, u ta yi twisisa hi xitalo mhaka leyi ha yona Yehova a hi nyikeke ririmi leri tengeke ni xivangelo xa ku va minkarhi hinkwayo hi fanele ku tivonela eka mimboyamelo yihi na yihi ya vutianakanyi leyi nga kavanyetaka ku va ni vun’we ka hina ni vamakwerhu. Endla makungu ya wena sweswi ya ku hlanganyela eka risimu ro pfula ni ku va kona eka minongonoko hinkwayo ku fikela exikhongelweni xo pfala hi Sonto nindzhenga.

[Bokisi leri nga eka tluka 10]

Switsundzuxo Swa Ntsombano Wa Muganga

VUTSHAMO: Vahuweleri vo tala va ta endla malunghiselelo ya vona vini ya ndhawu yo tshama. Hambi swi ri tano, loko u lava leswaku vahleri va ntsombano va ku lunghiselela ndhawu naswona u nga si kombela ndhawu, rhumela Fomo ya wena ya Xikombelo xa Vutshamo eka vona hi xihatla.

NKHUVULO: Lava yaka eku khuvuriweni va fanele ku ringeta ku va eswitshan’weni swa vona exivandleni lexi vekiweke nongonoko wu nga si sungula hi Mugqivela nimixo. Mpahla leyi ringaniseriweke yo hlamba ha yona ni thawula swi fanele swi ta ni un’wana ni un’wana loyi a kunguhataka ku khuvuriwa. Endzhaku ka nkulumo ya nkhuvulo na xikhongelo hi xivulavuri, mutshami wa xitulu wa nongonoko u ta nyika swiletelo swo koma eka lava va yaka eku khuvuriweni ivi endzhaku a tivisa risimu. Loko ndzimana yo hetelela yi sunguriwa, varindzi va ta kongomisa lava yaka eku khuvuriweni exivandleni xa nkhuvulo kumbe emimovheni leyi nga ta va yisa kona, loko vayingiseri lavan’wana hinkwavo va hetisa ku yimbelela risimu. Tanihi leswi nkhuvulo eku kombiseni ka ku tinyiketela ka munhu ku nga mhaka ya nkoka ni ya munhu hi xiyexe exikarhi ka munhu na Yehova, a ku na lunghiselelo ra leswi vuriwaka ku khuvuriwa ka xinghana laha eka rona vanhu vambirhi kumbe ku tlula lava yaka eku khuvuriweni va angarhanaka kumbe va khomana hi mavoko loko va ri karhi va khuvuriwa.

NTIRHO WO PFUNETA: Mpfuno wo tirhandzela wa laveka leswaku ntsombano wa muganga wu famba khwatsi. Hambi leswi u nga kotaka ku tirha xiyenge ntsena xa ntsombano, mintirho ya wena yi ta tlangeriwa. Loko u nga pfuna, u komberiwa ku vika eka Ndzawulo Ya Ntirho Wo Pfuneta loko u fika entsombanweni. Vana lava nga ehansi ka malembe ya 16 hi vukhale na vona va nga hoxa xandla eku humeleleni ka ntsombano, kambe va fanele ku tirha ni mutswari kumbe munhu lonkulu loyi a nga ni vutihlamuleri.

TINSIMU: Tanihi leswi ku yimbelela ku nga xiyenge xa vugandzeri bya hina, hi khutaza hinkwenu ku titoloveta tinsimu leti landzelaka leti nga ta va xiphemu xa nongonoko: 148, 78, 217, 160, 191, 211, 69, 164, 111, 91, 144, 202, 33, 200, 79, 155, 61, 31, 42, 161, 45. Loko mi ri karhi mi dyondza tinsimu, hi ringanyeta leswaku mi tirhisa tikhasete ta Sosayiti.

MINKARHI YA NONGONOKO: I ndlela ya vutlhari naswona swi kombisa ku tlangela ku va eswitshan’weni swa hina loko nongonoko wu sungula. Sweswo swi ta va hi 1:30 p.m. hi siku ro sungula. Endla makungu yo tshama minongonoko yi kondza yi hela. Risimu ro pfala ni xikhongelo swi ta va hi 4:00 p.m. hi siku ro hetelela.

NHLANGANO WA BETHELE: Ku ta va ni nhlangano hi siku ra vumbirhi wa vahuweleri vahi ni vahi lava tinyiketeke lava nga exikarhi ka malembe ya 19 na 35 hi vukhale lava nga tsakelaka ku nghenela ntirho wa Bethele. Switiviso swi ta endliwa entsombanweni malunghana ni nkarhi lowu kongomeke ni ndhawu ya nhlangano lowu.

KU TITIVISA KA VUPHAYONA: Maphayona hinkwawo ya nkarhi hinkwawo ni lama hlawulekeke, valanguteri lava famba-fambaka, varhumiwa ni lava va nga entirhweni wa Bethele va fanele ku ta ni khadi ra vona ra “Pioneer Service Identification” (S-202) entsombanweni. Lava va nga enxaxamelweni hi tin’hweti ta tsevu enkarhini wa ntsombano wa muganga lowu va nga eka wona va nga ha amukela mathikithi ya ntsombano lama ringanaka R22 hi ku humesa khadi ra vona. Hlayisa khadi leri hi vukheta tanihi mali. Ri nga ka ri nga siviwi hi rin’wana entsombanweni. Swilo swihi na swihi leswi humesiwaka swa mahala kumbe tibuku tin’wana leti nga ni mintsengo ya vuphayona ti ta kumeka eka maphayona endlwini ya tibuku ntsena.

TIBEJE: U komberiwa ku ambala beje leyi khavisiweke hi ndlela leyi hlawulekeke entsombanweni ni loko u ri karhi u ya ni ku vuya exivandleni xa ntsombano. Leswi hakanyingi swi swi endla swi koteka leswaku hi nyikela vumbhoni lebyinene loko hi ri karhi hi famba. Tibeje ti fanele ku kumiwa hi ku tirhisa bandlha ra ka n’wina, tanihi leswi ti nga ta ka ti nga kumeki emintsombanweni. Tibeje i 5c yin’we naswona swifunengeto swa plastiki i 50c xin’we.

MARITO YO TSUNDZUXA: Ku nga khathariseki leswaku u paka kwihi, u fanele ku khiya movha wa wena minkarhi hinkwayo naswona u nga tshuki u sukela nchumu wo karhi lowu vonakaka endzeni. Hlayisa mindzhwalo ya wena yi khiyeleriwile endzeni ka buti ya movha, loko swi koteka. Nakambe, tilanguteli eka makhamba ni vasechi lava kokiwaka hi tinhlengeletano letikulu. Leswi swi katsa ku ka u nga tshiki nchumu wa nkoka wu nga khathaleriwanga eswitulwini emintsombanweni. Tivoneleni.