Bokisi Ra Swivutiso

● Hi nga ma kombisa njhani mahanyelo ya Vukriste loko hi va kona eka Dyondzo ya Buku ya Bandlha?

Hakanyingi ha xiyiwa hi vaakelani va hina naswona minkarhi yin’wana va ta bumabumela ni ku hlamula eku tikhomeni ka hina. (Ringanisa 1 Vakorinto 4:9.) Tanihi malandza ya Yehova, hi lava leswaku tinhlamuselo ni ku hlamula ka vona eka mahanyelo ya hina ku va lokunene. (1 Pet. 2:12) Leswi swi tano mayelana ni ntirho wa hina eka Dyondzo ya Buku ya Bandlha. Tanihi leswi to tala ta leti ti khomeriwaka emakaya, nkhathalelo wa nkoka wu fanele ku kombisiwa leswaku mahanyelo ya hina ma kombisa kahle eka xin’wana ni xin’wana lexi hi xi endlaka. Laha ndhawu yo paka yi nga yintsongo, ha yini hi nga endli malunghiselelo yo hlanganyela movha wun’we leswaku hi papalata ku kavanyeta loku nga fanelangiki eka vaakelani va ndhawu ya dyondzo ya buku? Rirhandzu ra hina hi muakelani wa hina ri ta hi endla leswaku hi papalata ku paka mimovha ya hina hi ndlela leyi nga riki yinene leyi yi nga n’wi karhataka kumbe ku n’wi vavisa.

Ha tsaka loko hi hlangana naswona leswi hakanyingi swi endla mabulo lama khutazaka emahlweni ni le ndzhaku ka nhlangano. (Mik. 2:12) Mahanyelo lamanene ni nkhathalelo hi van’wana swi ta lava leswaku hi hlayisa mpfumawulo wa mabulo ya hina wu ri eka mpimo lowu ringaniseriweke. (Mat. 7:12; Vagal. 6:10) Rirhandzu ra Vukriste nakambe ri ta hi susumetela leswaku hi sivela vana va hina ku tsutsuma ehandle ni ku onha ndhawu ya vanhu van’wana. (Swiv. 29:15; 1 Vakor. 13:4, 5) Leswi a swi ta katsa ku tikhoma ka xichavo ekaya laha dyondzo ya buku yi fambisiwaka kona. Loko ku tikhoma kun’wana loku nga fanelangiki ku xiyiwa, vakulu a va fanelanga va teka nkarhi eku nyikeleni ka ndzayo ya rirhandzu ni leyi tiyeke leswaku swiphiqo swi nga andzi, leswi swi nga vangaka ku n’unun’uta ka vaakelani, ku nonon’hweriwa ka n’wini wa muti loyi hi malwandla a pfuleke kaya ra yena leswaku ku dyondzeriwa kona kumbe ku kavanyeta lava vaka kona endhawini yin’wana eka dyondzo ya buku.