Fikelela Timbilu Hi Tidyondzo Ta Bibele Leti Humelelaka

1 Yesu u kume ntsako eku endleni ka ku rhandza ka Tata wa yena, naswona u tsakele ku pfuna van’wana leswaku na vona va tirhela Yehova. (Ps. 40:8; Mat. 9:37, 38; 11:28-30) Yesu a a nga aneriseki hi ku nyikela rungula ra yena ntsena. Loko hi ta kota ku humelela eku khutazeni ka van’wana leswaku va tihlanganisa na hina entirhweni wa evhangeli, hi fanele ku fikelela timbilu ta swichudeni swa hina swa Bibele. Leswi swi katsa ku tlula ku fambisa bulo ra buku ra swivutiso ni tinhlamulo. Leswaku hi fikelela mbilu, hi fanele ku lunghiselela hi ri ni xichudeni xa hina emianakanyweni.

2 Yesu u khathalele vanhu van’wana swinene. U xiye langutelo ra vona. U tirhise swikombiso leswaku a olovisa timhaka leti nonon’hwaka. (Mat., tindzima 5-7) Hi ku vona swiphiqo leswi a va ta langutana na swona, Yesu u nyikele xitsundzuxo lexi fanelaka. (Marka 9:33-37) Loko vayingiseri va yena eku sunguleni va nga swi kotanga ku twisisa yinhla ya dyondzo ya yena, hi ku lehisa mbilu u nyike xikombiso xa leswi a a fanele a swi vula. (Mat. 16:5-12) Nkhathalelo lowukulu wa Yesu eka van’wana wu fanele wu hi susumetela ku vutisa hi ku, ‘Loko a ndzi ri xichudeni, xana a ndzi ta lava ku tiva yini leswaku ndzi ta twisisa ni ku susumetiwa hi leswi swi dyondzisiwaka?’—Xiya 1971 Yearbook, matluka 246-7.

KANDZIYISA BIBELE

3 Loko mpatswa wun’wana wu vutisiwe leswaku i yini lexi wu endleke wu amukela vumbhoni lebyi nyikeriweke hi ku olova swinene, wu hlamurile wu ku: “A swi ri eBibeleni.” Ina, Rito ra Xikwembu ri fikelela timbilu. (Vahev. 4:12) Kombetela eka yona nkarhi na nkarhi, u tirhisa tindzimana leti nga eka tipharagirafu hi ku ntshunxeka. Pfuna xichudeni ku vona leswaku ha yini ndlela yo karhi yi ri ya vutlhari kumbe ya vuphukuphuku. Anakanyisisa na yena ehenhleni ka ndlela leyi ku yingisa milawu ya Xikwembu swi nga ta n’wi pfuna ha yona.—Vona Xihondzo xo Rindza xa Xinghezi, August 1, 1984, matluka 15-16.

4 Vahuweleri vo tala va kume leswaku ku tirhisa buku leyi nge Reasoning ka humelela swinene eku kandziyiseni ka Bibele. Hi xikombiso, loko a kambisisa tluka 124, ndzimana 13 eka buku leyi nge Hanya Hi Masiku, n’wini wa muti a nga ha vutisa mhaka leyi ha yona mufundhisi wa yena a vulaka leswaku vana va fa hikwalaho ka leswi Xikwembu xi lavaka leswaku va va na xona etilweni. Nkambisiso wa mhaka leyi nga eka tluka 99 ra buku leyi nge Reasoning ehansi ka “Ha yini vana va fa?” wu kandziyisa ku tsakela ka Yehova eku hlayiseni ka lunghiselelo ra ndyangu. Rungula ri nga ha khorwisa munhu hi rirhandzu ra Yehova hi vanhu.

VUTISA SWIVUTISO

5 Ku tirhisiwa ka swivutiso loku humelelaka ku pfune Yesu ku endla leswaku vanhu va anakanya ni ku anakanyisisa. (Mat. 17:24-27) Tinhlamulo ta xichudeni ti nga hi pfuna ku tiva leswi a swi dyondzaka kun’we ni leswaku hi wahi malangutelo lama nga riki ya matsalwa lawa a nga ha vaka a ha ri na wona. Kumbexana xichudeni xi lwisana ni mukhuva wo dzaha. Mi pfuxete mhaka leyi nga eka ndzima 27 eka buku leyi nge Hanya Hi Masiku ni rungula leri nga eka matluka 13-16 eka nkandziyiso wa Awake! wa July 8, 1989. U vona xilaveko xo tshika. Hambi swi ri tano, xana u kholwa hakunene leswaku u fanele ku swi tshika? U nga ha ku: “Xana u titwisa ku yini hi leswi ke? A hi nge a wu fanele ku swi tshika sweswi kambe van’wana va vanghana va wena va ku hlekula. Xana a wu ta endla yini ke?”

6 Hambi swi ri tano, hi fanele ku tivonela. Hi minkarhi yin’wana swivutiso swo tano swi nga ha tisa tinhlamulo leti ku hlamarisaka kumbe leti ku hetaka matimba. Kutani ku fanele ku endliwa yini ke? Loko yi ri mhaka leyi tlhavaka, swi nga antswa leswaku u nga sindzisi mphikamakaneta, kambe u ku: “Sweswi a hi yi emahlweni. Hi nga vuya eka leswi endzhakunyana.” Kumbe “Hi swona, i nchumu wo anakanya ha wona, a swi tano ke?” (Yoh. 16:12) Loko u tiva leswi xichudeni xi titwisaka xiswona hakunene ehenhleni ka mhaka leyi, u nga lunghiselela rungula leri nga xi pfunaka ku endla nhluvuko wun’wana. Hi fanele ku lwela ku susumeta mbilu ya munhu ivi hi khongelela leswaku onge Yehova a nga n’wi pfuna ku kula hi tlhelo ra moya.—1 Vakor. 3:5-9.

7 Loko u fambisa dyondzo ya Bibele, minkarhi hinkwayo tsundzuka ku teka nkarhi lowu ringaneke wo anakanyisisa ni xichudeni ehenhleni ka mhaka leyi yi kambisisiwaka. Endla leswaku madyondziselo ya wena ma twanana ni swilaveko swa yena leswi kongomeke. Tirhela ku aka rirhandzu ni xichavo lexikulu eka Yehova, Bibele ni nhlengeletano ya Yehova embilwini ya yena. Onge hi nga endla xiphemu xa hina xo pfuna van’wana leswaku va va vadyondzisiwa va Kriste hi ku ringeta ku fambisa tidyondzo ta Bibele leti humelelaka.—Mintirho 2:41-46.