Ndlela Yo Tamela Swikombelo Swa Swiphephana

Ku ringana tin’hweti to tala sweswi Sosayiti a yi nga wu kombisi munyikelo wa tibuku leti tivisiwaka eswiphephanini eka tluka ro hetelela ra timagazini ta hina. Xivangelo-nkulu xa leswi hi leswaku nhlayo leyikulu ya matiko emisaveni yi tirhisa lunghiselelo ra minyikelo loko yi nyikela tibuku. Hi lunghiselelo ra minyikelo mali ya nxavo a yi boxiwi tanihi munyikelo loko ku vulavuriwa ni vini va miti. Leswaku tibuku ta hina ti fana, timali ta munyikelo a ta ha gandlisiwi.

Eka xiyenge lexi xa nsimu a hi kona ehansi ka lunghiselelo leri ra munyikelo. Hikwalaho, loko swiphephana swi rhumeriwa eka Sosayiti, swi rhumeriwa eka bandlha leri munhu wa kona a tshamaka ensin’wini ya rona. Bandlha ri komberiwa ku lunghiselela un’wana leswaku a yisa buku eka munhu loyi a rhumeleke xiphephana eka Sosayiti, ni ku endla munyikelo hi laha hi endlaka ha kona hi ntolovelo evutirhelini bya nsimu, a boxa munyikelo wa buku kumbe wa magazini.

Eka swiendlakalo swi nga ri swingani swiphiqo swi kumiwile loko ku endliwa riendzo ro tano laha munhu a vuleke leswaku mali a yi nga kombisiwanga exiphephanini. Loko ko humelela leswi, hi vutlhari hi nga boxa leswaku xiphephana a xi vulanga leswaku buku yi ta nyikeriwa “mahala.” Vanhu va timbilu letinene va twisisa leswaku timali ta katseka eku humeseni ka tibuku to tano naswona va ta swi tsakela ku nyikela. Eka swiyimo leswi hambaneke, loko swi xiyiwa leswaku munhu wa tsakela hakunene kambe a nge swi koti ku hakelela nxavo wa buku, handle ko kanakana hi ta lava ku hakelela nxavo wo tano hina vini naswona hi nyikela buku kumbe magazini eka munhu mahala. Hi ndlela leyi hi ta va hi endla xiphemu xa hina eku nyikeni hinkwavo nkarhi wa ku ‘ta va ta teka mati ya vutomi mahala.’—Nhlav. 22:17.