Ku Rhwala Ndzhwalo Wa Hina Vini Wa Vutihlamuleri

1 Mhaka ya vutihlamuleri yi tikomba yi tikela vanhu namuntlha. Vo tala va ringeta ku byi papalata. Hikwalaho, vavanuna va tshika vavasati, vamanana va lahla vana, vantshwa va tshika xikolo ni vaaka-tiko va tshika ku hakela swibalo. Nxaxamelo wa swiendlo swo pfumala vutihlamuleri swi ya swi andza hakantsongo-ntsongo. Munhu la nga ni vutihlamuleri hi loyi a tshembekaka, a rhandzaka ni ku kota ku langutana ni mahanyelo ya yena. Hikwalaho Rito ra Xikwembu ri swi veka erivaleni hi Vakriste leswaku “un’wana ni un’wana u ta rhwala mpingu wa yena.” (Vagal. 6:5) Vona ndlela leyi nhloko-mhaka ya nhlengeletano ya xifundza ya lembe ra ntirho ra 1992 leyi nge “Ku Rhwala Ndzhwalo Wa Hina Vini Wa Vutihlamuleri” yi fanelaka ha yona! Nongonoko lowu wu ta sungula hi September. Hinkwerhu hi fanele ku endla malunghiselelo lama heleleke yo va kona.

2 Hi ku tirhisa tinkulumo, swikeche, minkombiso, mintokoto ni mimbulavurisano, nongonoko lowu lowunene wa nhlengeletano wa xifundza wu ta byi kombisa kahle vutihlamuleri byo hambana-hambana lebyi hina hinkwerhu tanihi Vakriste hi nga na byona. Hi Mugqivela ni ndzhenga, nxaxamelo wa swiphemu swa mune wu ta nyikeriwa lowu hlamuselaka ndlela leyi hinkwerhu hi nga khathalelaka vutihlamuleri bya hina hi ntsako ha yona. Vantshwa va hina va na vutihlamuleri byo byi byarha, naswona nkulumo ya hi Mugqivela ni ndzhenga hi mulanguteri wa xifundza yi ta va yi kongomisiwe eka vona hi ku kongoma. Nakambe hi Mugqivela ku ta va ni nkarhi wa lava ha ku tinyiketelaka leswaku va khuvuriwa. Hinkwavo lava lunghiselelaka ku khuvuriwa eka nhlengeletano ya xifundza va fanele ku tivisa mulanguteri la ungamelaka ka ha ri na nkarhi leswaku ku ta endliwa malunghiselelo ya leswi.

3 Hi Sonto ni mixo nxaxamelo wun’wana wa swiphemu swa mune wu ta kombisa vutihlamuleri bya hina bya Vukriste byo chumayela. Kutani, hi Sonto ni ndzhenga, nkulumo ya le rivaleni leyi nga ni nhloko-mhaka leyi nge “Misava Leyintshwa Ya Xikwembu—I Mani La Nga Ta Fanelekela Ku Nghena?” yi ta nyikeriwa hi mulanguteri wa muganga. Xalamukela ku rhamba hinkwavo lava ha ku tsakelaka ku ta yingisela nkulumo leyi.

4 Hinkwerhu ka hina hi fanele ku lunghisa swiyimo swa hina leswaku hi va kona naswona hi pfuneka hi xitalo eka nongonoko lowu lowunene wa masiku mambirhi. Mulanguteri wa n’wina wa xifundza u ta mi tivisa hi ndhawu ni masiku lama lunghiseleriweke bandlha ra n’wina.