Lunghiselela Sweswi Ku Va Kona Eka Ntsombano Wa Muganga Wa “Varhandzi Va Ntshunxeko” Wa 1991

1 Hikwalaho ka swiyimo swa misava namuntlha, a swi hlamarisi leswi ematikweni yo tala vanhu va lavaka ntshunxeko lowukulu ku tlula lowu va nga na wona. Kambe hi kwihi laha ntshunxeko wa ntiyiso wu nga kumiwaka kona? Yesu Kriste u te: “Loko mi tiyisela eritweni ra mina, mi vadyondzisiwa va mina hakunene; naswona mi ta tiva ntiyiso, kutani ntiyiso wu ta mi ntshunxa.” (Yoh. 8:31, 32) Ntshunxeko lowu a hi wona lowu hikiweke lowu vanhu va wu langutelaka loko va ala mulawuri un’wana wa politiki kumbe hulumendhe yo karhi va hlawula yin’wana. Ematshan’wini ya sweswo, wu nghena endzeni-ndzeni ka swiphiqo swa vanhu. Leswi Yesu a a bula ha swona a a ku ri ntshunxeko evuhlongeni bya xidyoho. (Vona Yohane 8:24, 34-36.) Xisweswo, loko munhu a va mudyondzisiwa wa ntiyiso wa Yesu Kriste, ku va ni ku cinca loku xiyekaka evuton’wini bya yena, ntshunxeko.

2 NTSOMBANO WA MASIKU MANHARHU: Minongonoko ya Mintsombano ya Miganga 1991 ya “Varhandzi Va Ntshunxeko” yi ta sungula hi 10:20 a.m. hi Ravuntlhanu, naswona ntsombano wu ta hela kwalomu ka awara ya 4 hi Sonto ni ndzhenga. Rungula leri hlawuriweke hi vukheta leri nga ra nkoka eka rihanyo ra hina ra moya ri ta nyikeriwa eka xiyenge xin’wana ni xin’wana. Tinhloko-mhaka to hambana-hambana ti ta kombisa ndlela leyi ntshunxeko lowu ku kombeteriwaka eka wona eka Varhoma 8:21 wu nga vaka wa hina ha yona. Rungula leri nyanyulaka ri ta vumbiwa ni ku nyikeriwa hi tinkulumo, minkombiso, mimbulavurisano ni drama.

3 Swi endle pakani ya wena leswaku u nga kayeli hambi ku ri xiyenge xin’we. Leswi swi nga lava ku tinyikela ka munhu hi xiyexe ni mindzulamiso exiyimisweni xa wena. Swi nga ha va swi fanerile ku endla malunghiselelo lama hlawulekeke ni muthori wa wena. Vo tala va tlhela va pfala mabindzu ya vona leswaku va va kona eka minongonoko hinkwayo. Yehova hakunene u ta katekisa lava khongelelaka mhaka leyi hi xikhongelo lexi humaka embilwini ni ku endla matshalatshala lama sukaka embilwini leswaku va va kona.—Luka 13:24.

4 FIKA KA HA RI NA NKARHI: Timbhoni ta Yehova ti tiviwa hi matshalatshala ya tona yo tshembeka ni ku hlayisa nkarhi. (Luka 16:10) Leswi nakambe i swa nkoka loko hi ya entsombanweni wa muganga. Fika ka ha ri na nkarhi siku rin’wana ni rin’wana, naswona u va u tshamile nongonoko wu nga si sungula. Leswi swi lava ku pfumelela nkarhi lowu aneleke wo khathalela timhaka leti lavaka nyingiso, to tanihi ku paka movha wa wena ni ku kuma switshamo leswi faneleke swa ndyangu wa wena.

5 Ku va kona entsombanweni wa muganga swi hi nyika nkarhi lowunene wo tiphina hi vunghana lebyinene. Kambe ku endza ni vanghana ku kondza ku va vusiku swi nga sivela matshalatshala ya hina yo fika hi nkarhi siku leri landzelaka. Ku sungula nkarhi se wu hundzile ku vanga ku vilela ni ku karhateka lokukulu xisweswo u boheka ku tsutsuma ni mixo. Ku papalata leswi, swa pfuna ku veka nkarhi lowunene wo wisa. Hi ku namarhela xiyimiso lexi hi laha ku heleleke, hinkwerhu hi nga kuma vurhongo lebyinene bya ni vusiku ivi hi va lava lunghekeleke ku sungula hi nkarhi hi siku leri landzelaka. Leswi swi papalata ku fika loko nongonoko wu ri karhi wu ya emahlweni, leswi swi kavanyetaka ni leswi swi siringaka eka lava ana se va tshameke. Ku fika ka ha ri na nkarhi siku rin’wana ni rin’wana swi ta ku pfumelela ku vonana ni vamakwenu va xinuna ni va xisati. Rirhandzu ni nkhathalelo wa Vukriste, kun’we ni xichavo hi Yehova ni swilo swa moya leswi a swi lunghiselelaka, swi fanele ku hi susumetela ku endla hi laha hi nga kotaka ha kona ku fika hi nkarhi.

6 YINGISELA SWINENE: Ku yingisela swi vula ku nyikela nyingiso lowunene hi mianakanyo ni mbilu ya hina, hi tindleve ta hina ni matimba ya hina yo twisisa. Hi fanele ku yingisa ni ku ‘twa rito ra Yehova.’ (Yer. 2:4) Eka Esaya 55:2 Yehova u lerise Israyele a ku: ‘Ndzi yingiseleni swinene.’ Rito leri nge “swinene” ri hlamuseriwa tanihi “nyingiso lowukulu kumbe wa ku hiseka.” Loko hi yingisela hi nkarhi wa ntsombano, hi ta ‘yingisa ni ku kuma ndzetelo lowu engetelekeke’ hi ku hiseka. (Swiv. 1:5) Ku yingisa ni ku dyondza entsombanweni wa muganga hakanyingi swi lava matshalatshala lama engetelekeke ni matimba ku tlula lama lavekaka eHolweni ya Mfumo. Ha yini? Hi tshama minkarhi yo leha, naswona ku na swikavanyeto swo tala hikwalaho ka nhlayo leyikulu ya vanhu lava nga kona. Loko hi nga yingiseli swinene, hi ta kayeriwa ivi hi lahlekeriwa hi ku amukela mpfuno lowu teleke wa mphakelo lowu fuweke wa swakudya swa moya lowu nyikeriwaka. (1 Pet. 2:2) Ku nga endliwa yini? Swa tsakisa ku xiya leswaku vapfhumba vo tala entsombanweni a va ri karhi va antswisa mukhuva lowunene wa ku tsala tinotsi hi nkarhi wa nongonoko. Hambi loko tinkulumo tin’wana entsombanweni wa muganga hi ku famba ka nkarhi ti ta humelela etibukwini, tin’wana a ti nge humeleli. Hinkwerhu hi khutaziwa ku swi endla pakani ku tsala tinotsi to koma hi nkarhi wa ntsombano wa muganga hikuva i ndlela leyinene yo hlayisa nyingiso wa wena wu ri eka leswi swi vuriwaka.

7 Tinotsi a ti lavi ku ndlandlamuxiwa kumbe ku endliwa hi vukheta lebyikulu. Hakanyingi xiga xin’we kumbe swimbirhi swi ta va swi anerile eka yinhla-nkulu. Hambi ku ri vana lavantsongo va nga kuma swo tala eka tinkulumo naswona va pfuniwa ku yingisela loko va nyikiwa phepha ro tsala ni peni kumbe pensele leswaku va tsala tinhla-nkulu ta xivulavuri ni matsalwa-nkulu kumbe tinhla letintshwa leti ti nga ha nyikeriwaka. Vakulu va swi kuma swi pfuna ku va ni tinotsi leti xaxametiweke kahle leswaku va fambisa mpfuxeto wa nkoka wa nongonoko wa ntsombano eka Nhlangano wa Ntirho endzhaku ka ntsombano wa muganga. Nakambe, va nga navela ku hlanganisa to tala ta tinhla leti nyikeriweke entsombanweni entirhweni wa vona wa ku dyondzisa ni wa vurisi.

8 HLANGANANI EKA RISIMU NI XIKHONGELO: Xiphemu xa vugandzeri bya hina xi katsa ku xixima Yehova hi ku yimbelela tinsimu ta yena, hi laha Yesu ni vaapostola va yena va endleke ha kona. (Marka 14:26) Marito ya Pawulo eka 1 Vakorinto 14:15 mayelana ni ku yimbelela, ma vonaka ma kombisa leswaku a a ku ri xivumbeko xa nkarhi na nkarhi xa vugandzeri bya Vukriste. (Nakambe vona Vutirheli Bya Hina Bya Mfumo bya February 1990, tluka 4, na March 1991, tluka 3.) Mintsombano ya muganga yi hi nyika nkarhi lowu hlawulekeke wo hlangana ni magidi ya vamakwerhu va xinuna ni va xisati eku dzuniseni ka Yehova hi risimu ni xikhongelo. Hambi swi ri tano, van’wana va kombise ku kayivela xichavo eka swiyenge leswi swa nkoka swa vugandzeri bya hina. Njhani? Hi ku fika entsombanweni exikarhi kumbe endzhaku ka risimu ni xikhongelo xo pfula handle ka xivangelo xo twala. Emakumu ka nongonoko, van’wana va suka eswitshan’wini swa vona hi nkarhi wa risimu kumbe emahlweni ka xikhongelo. A hi kangani laha ku nga ni xivangelo lexinene xa ku endla leswi. Hambi swi ri tano, xana xichavo ni ku tlangela loku faneleke swa kombisiwa etafuleni ra Yehova loko van’wana va lan’wa lunghelo ra ku yimbelela ni ku hlanganyela eka xikhongelo hi ku lava ku hatlisa va fika emimovheni ya vona kumbe ku dya?—Mat. 6:33.

9 Vukheta byi fanele ku tirhisiwa leswaku eku landzeleleni ka ku tianerisa ka munhu hi xiyexe, a hi pfumeleli langutelo ra misava ra mina ku sungula kumbe mikhuva leyo biha yo fana ni makwanga ni vutianakanyi leswaku swi sivela nhluvuko wa hina wa moya. Emalembeni ya sweswinyana, vamakwerhu vo tala va xinuna ni va xisati ematikweni ya Yuropa Vuxa va swi kotile ku tiphina hi ntshunxeko wo yimbelela ni ku khongela endzhaku ka nkarhi wo leha. Leswi va tsakisiweke hi ku yimbelela ni ku khongela hi tinhlayo letikulu, onge na hina hi nga kombisa moya lowu fanaka wa ku tlangela swilo leswo kwetsima sweswi naswona hi nga yi tekeli hansi minkarhi ya hina yo yimbelela ni ku khongela swin’we.

10 MAHANYELO YA HINA YA VUKRISTE: Mahanyelo ya hina ni ku languteka ka hina ka Vukriste emintsombanweni swi ye emahlweni swi hi tisela ku twala lokunene tanihi Timbhoni ta Yehova. Leswi swi hikwalaho ka leswi hi tiyimiseleke eku gandzeleni ka hina ka Yehova ni hikwalaho ka leswi hi nga langutiki ku va kona entsombanweni tanihi ku tihungasa ni van’wana ntsena. Loko hi hlengeletanela swiendlakalo swo tano leswi hlawulekeke, hi fanele ku hlayisa ntikelo wa hina wa Vukriste ni xivumbeko xa mianakanyo ya moya, hi ku tikhoma tanihi vatirheli hi minkarhi hinkwayo.—1 Vakor. 10:31-33.

11 Loko hi tsandzeka ku endla leswi, hi khumba ntsako wa van’wana, hambi ku ri ku khunguvanyisa lavantshwa. Xana ha ti xiya ni ku phofula ku tlangela tintswalo letitsongo leti hi kombisiweke tona? Hi fanele hi khathalela van’wana lava nga ekusuhi na hina naswona hi kombisa xichavo ni nkhathalelo. Un’wana ni un’wana u fanele ku twisisa leswaku loko nongonoko wu ya emahlweni, i nkarhi wa ku yingisela, hayi ku famba-famba kumbe ku vulavula.—Deut. 31:12.

12 Xivandla xin’wana laha mahanyelo ya hina ya Vukriste ma dzunisaka Yehova Xikwembu hi le ka ku tirhisana ka hina ni lava va hi nyikaka tindhawu to etlela. Ku basa ni nkhathalelo swi fanele ku kombisiwa hayi ntsena eka maambalelo ni ku tikhoma ka hina kambe ni le ka ndlela leyi hi khomaka ndhawu ya van’wana ha yona. Xana ku na xivangelo xo sukela kamara leyi hirhiweke yi nga basanga, yi nga languteki? Mahanyelo yo pfumala nkhathalelo ma thyakisa vito ra hina lerinene. Emintsombanweni ya muganga leyi landzelaka, hinkwerhu ka hina hi fanele ku swi endla pakani ya hina ku tikhoma leswaku hi “komba ku saseka ka leswi dyondzisiwaka hi tlhelo ra Xikwembu Muponisi wa hina.”—Tito 2:10.

13 EKA VATSWARI: Vana lavantsongo ni vana va kondlo-a-ndzi-dyi va amukeriwa naswona va languteriwa ku va kona eka Ntsombano wa Muganga wa “Varhandzi Va Ntshunxeko.” Ntshunxeko lowu misava wu wu nyikelaka wu nga yisa eku feni ka vona ka moya, hi laha Adamu a lahlekeriweke ha kona hi ntshunxeko lowu nyikiweke vanhu eku sunguleni. Nhlengeletano ya Yehova leyi nga ni rirhandzu yi hi lunghiselele mianakanyo leyinene emhakeni leyi. Ha khutazeka hi ku vona vana lava dyondzeke ku nyikela nyingiso lowunene eka minhlangano hinkwayo ya Vukriste ni lava va tsakelaka swinene nongonoko wa ntsombano. (Ps. 148:12, 13) Kambe swo tala swi titshege hi xikombiso ni vulawuri bya vatswari. Vantshwa vo tala va dyondzisiwe kahle ku tsala tinotsi. Loko u nga si dyondzisa vana va wena ndlela yo tsala tinotsi, ha yini u nga tirhisi nkarhi lowu saleke ku endla tano ntsombano wa n’wina wu nga si fika? Hambi ku ri vana lavantsongo swinene va nga khutaziwa ku tsala Matsalwa lama kombisiweke ni marito-nkulu lama yelanaka na wona lawa va ma twaka ma phofuriwa hi swivulavuri. Vatswari van’wana va lunghiselela ku pfuxeta tinhla-nkulu leti humaka eka nongonoko wa siku loko va ri endhawini ya byetlelo kumbe loko va ri karhi va ya ekaya.

14 Kavula, vatswari vo tala va swi twisisa leswaku mboyamelo wa ntumbuluko wa vana i ku tlanga. Va pfumala ntokoto evuton’wini, naswona a va si vupfa. Hikwalaho, va fanele va dyondzisiwa nkarhi lowu va faneleke ku yingisela ha wona ni ndlela leyi va faneleke ku tikhoma ha yona eminhlanganweni. Leswi swi lava vulawuri lebyinene bya vatswari va vona. Vatswari van’wana va honise mhaka leyi. Hi minkarhi yin’wana, hambi loko vatswari va nga ha kombisa xichavo lexinene eka Yehova hi nkarhi wa xikhongelo, vana va vona va tlanga ni ku kavanyeta van’wana. Vatswari va fanele va tiva leswi vana va vona va swi endlaka hambi ku ri nkarhi wa xikhongelo. Nakambe, va endla yini loko va suka eswitshan’wini swa vona hi nkarhi wa nongonoko? Xana vana va tshikiwa va nga lawuriwi exikarhi kumbe endzhaku ka nongonoko wa ntsombano? (Swiv. 29:15) Vana van’wana va tikhome hi ndlela yo biha ni leyi nga lawulekiki naswona va nga xiximi vamakwerhu va xinuna ni va xisati lava kuleke lava ringeteke ku va lulamisa hi ndlela ya musa. Ku nga lawuleki ko tano ni mahanyelo lama nga faneliki Vakriste hakanyingi swi vangiwa hi ku tshikiwa ni ku pfumala ndzetelo ekaya. Entiyisweni swi fanele ku ololoxiwa. Vatswari hinkwavo va Vukriste va fanele ku lawula swinene vana va vona minkarhi hinkwayo loko va ri karhi va va kurisa “hi ku va laya ni ku va dyondzisa ta [Yehova, NW].”—Vaef. 6:4.

15 NTIRHISANO WA WENA LOWU TALEKE WA TLANGERIWA: Nkunguhato ni ntirho lowu xiyekaka swi endliwile ku endlela leswaku vutshamo lebyi aneleke, tibuku, swakudya ni malunghiselelo man’wana swi va leswi kumekaka eka un’wana ni un’wana loyi a nga kona entsombanweni. Ku tiyisekisa ku humelela ka malunghiselelo lawa, bandlha rin’wana ni rin’wana ri averiwe eka ntsombano wo karhi hi ku kongoma. Ntirhisano wa wena lowu taleke i wa nkoka leswaku ku siveriwa ku tala ku tlula mpimo. Kavula, ku nga ha va ni swiyimo leswi swi swi endlaka swi fanela leswaku vanhu va nga ri vangani va ya entsombanweni endhawini yin’wana. Hambi swi ri tano, vo tala va fanele va swi kota ku ya entsombanweni wa le xivandleni lexi va averiweke xona.—1 Vakor. 13:5; Vafil. 2:4.

16 Ntirhisano wa wena lowu taleke wa komberiwa emhakeni ya ku hlayisa switshamo. U komberiwa ku tsundzuka leswaku SWITSHAMO SWI NGA HLAYISERIWA NTSENA SWIRHO SWA LE KUSUHI SWA NDYANGU WA WENA NA MANI NA MANI LA NGA HA VAKA A FAMBA NA WENA EMOVHENI WA WENA N’WINI. U komberiwa leswaku u nga hlayiseli van’wana switshamo. Hi minkarhi yin’wana, switshamo swa hlayisiwa kambe swi nga hlayiseriwanga munhu wo karhi. Leswi a swi kombisi rirhandzu naswona swa kanganyisa eka varindzi ni van’wana lava lavaka switshamo leswi nga kona. Hi ku pfumelelana ni xitsundzuxo xa Bibele, hi fanele ku lwela ku kombisa rirhandzu ra vumakwerhu ni ku tirhisana hi laha ku taleke ni lunghiselelo leri amukelekaka ra ku hlayisa switshamo. A nga kona loyi a nyikiwaka switshamo swo tala ku tlula leswi laviwaka hi ntlawa wa ndyangu wa yena kumbe ntlawa wa movha lowu nga ekusuhi.—2 Pet. 1:7.

17 A swi pfumeleriwi ku hlayisa switshamo swa siku leri tlhandlamaka. Ndhawu ya ntsombano a yi fanelanga ku pfuriwa ku nga si ba 7:00 a.m. eka un’wana ni un’wana handle ka vatirhi vo tirhandzela lava tirhaka emahlweni ka nkarhi wolowo. A nga kona eka vatirhi lava loyi a nga ta pfumeleriwa ku hlayisa switshamo ku kondza ku va endzhaku ka 7:00 a.m., loko van’wana va pfumeleriwa ku nghena emuakweni. Varindzi va ta va eswivandleni leswi va averiweke swona emahlweni ka nkarhi wolowo ku langutela leswi endliwaka, leswaku va papalata ku tluriwa ka swikongomiso swa Sosayiti swa ku hlayisa switshamo. U komberiwa ku tirhisana hi xitalo ni varindzi loko va hetisisa xiavelo xa vona ku pfuna hinkwavo lava nga kona.

18 Ku ringanyetiwa leswaku ku avanyisa lokunene ku tirhisiwa eku teni ni swilo swa munhu hi xiyexe endhawini ya ntsombano. Enkarhi lowu hundzeke van’wana va te ni swigwitsirisi leswikulu kumbe swilo swin’wana swo tika ni leswikulu leswi a swi nga koteki ku vekiwa ehansi ka switshamo swa vona. Leswi swi vekiwe endleleni kumbe ehenhla ka switshamo. Leswi swi vangele leswaku van’wana va nga kumi vutshamo, naswona minkarhi yin’wana swi lwisane ni milawu ya ndzilo ni ya vuhlayiseki. Hi fanele ku kombisa ku ehleketelela etimhakeni to tano.

19 Hi laha swi endliweke ha kona lembe leri nga hundza, Sosayiti yi ta endla swakudya swi kumeka hi nxavo lowunene eka lava nga kona entsombanweni. Mawaku malunghiselelo lamanene swonghasi, ma endlaka swi olova ku pfuneka ni ku tsakela nongonoko. A swi kanakanisi leswaku mpfuno wo tano wa nhlengeletano ya Xikwembu wu ta hi susumetela ku kombisa ku tlangela hi ku nkhensa hi tindlela leti vonakaka. (Swiv. 11:25) Hi kombela leswaku u xiya leswaku u nga tlangisi swakudya kumbe malunghiselelo man’wana ya ntsombano.

20 Entiyisweni, vanhu va Yehova va swi tlangela ku hlangana kun’we etindhawini letinene leswaku va pfuneka eka nongonoko wa swa moya lowu lunghiseleriweke. Nakambe hi tlangela mintirho yo tala ni swipfuneto leswi nyikeriweke eka minhlangano yo tano. Hi nkhathalelo lowukulu, leswi lavaka mali yo tala, eka Sosayiti, ku endliwa malunghiselelo ya vutshamo lebyi aneleke, ku nghenisa swikurisa marito leswi durhaka, ku fambisa Ndzawulo ya Ntirho wa Swakudya leyi humelelaka ni ku tamela nhlayo ya malunghiselelo man’wana ni mintirho leyi endlaka ku va kona entsombanweni ku tsakisa naswona ku phyuphyisa hi tlhelo ra moya.

21 Timali ta leswi ti hlanganisiwa hi minyikelo ni nseketelo wa n’wina wa ku tirhandzela ni ku seketeriwa ka ntirho wa Sosayiti wa misava hinkwayo. Hi ku xiya minxavo leyi tlakukeke ya swilo swo hambana-hambana ni swilaveko swin’wana, u nga ha tsakela ku rhumela munyikelo ka ha ri na nkarhi endhawini ya ntsombano laha bandlha ra ka n’wina ri nga ta va ri ri kona. Loko u hlawula ku tsala cheke, yi nga ha hakeriwa eka “Watch Tower Convention.” Ku ku pfuna, mabokisi lama tsariweke kahle ya munyikelo ma ta vekiwa eka switirho hinkwaswo swa ntsombano. Minyikelo hinkwayo ya tlangeriwa swinene, naswona Sosayiti yi tsakela ku mi nkhensa ka ha ri emahlweni hi ku hanana ni nseketelo wa n’wina wa vun’we wa swilaveko swa Mfumo hi ndlela leyi. Munhu un’wana u phofule leswaku mali ya munyikelo a yi ringanyetiwi: ‘Swi tikomba swi tsakisa swinene ku tiva leswaku swi siyeriwe hina—hi ku enta ka ku tlangela ka hina vini. Kutani hi ku nkhensa hi titwa hi susumeteleka ku nyikela hi laha ku engetelekeke ku tlula leswi tolovelekeke.’ Ha tshemba leswaku hinkwerhu hi ta susumeteleka ku vona vutihlamuleri bya hina ha un’we-un’we malunghana ni timali leti naswona hi ta khomisana hi xitalo hi ku hlanganyela hi mpimo lowu swiyimo swa hina swi wu pfumelelaka.—Luka 6:38.

22 VANA KONA EKA NTSOMBANO WA MUGANGA WA “VARHANDZI VA NTSHUNXEKO”! Hi ku va kona eka Ntsombano wa Muganga wa “Varhandzi Va Ntshunxeko” ni ku nyikela nyingiso lowukulu eka nongonoko, hi ta tiyisa ku tlangela ka hina ntshunxeko lowu taka ha Kriste ni ku tirhisa ntshunxeko wa Vukriste kahle. Endla malunghiselelo ya wena sweswi leswaku u hlanganyela eka risimu ro pfula ni ku va kona eka minongonoko hinkwayo ku fikela exikhongelweni xo pfala hi Sonto ni ndzhenga.

[Bokisi leri nga eka tluka ]

Switsundzuxo Swa Ntsombano Wa Muganga

VUTSHAMO: Vahuweleri vo tala va ta endla malunghiselelo ya vona vini ya ndhawu yo tshama. Hambi swi ri tano, loko u lava leswaku vahleri va ntsombano va ku lunghiselela ndhawu u nga ha kuma fomo ya “Room Request” eka matsalani wa bandlha. Vamatsalani va bandlha va fanele ku tiyiseka leswaku va yisa tifomo ta Xikombelo xa Vutshamo eka adirese leyi faneleke ya ntsombano hi xihatla.

TIPIREME TA VANA: Eswivandleni swo tala, tipireme ta vana ti nga ka ti nga tirhisiwi etindhawini ta hlengeletano ya le rivaleni. Milawu ya ndzilo yi sivela ku tipaka etiphasejini, etindleni kumbe exikarhi ka tilayini ta switshamo. Tanihi leswi mintshungu leyikulu yi nga ha tlimbanaka, tipireme ta vana ngopfu-ngopfu ti ni khombo hayi eka vana ntsena kambe ni le ka wihi na wihi loyi a nga ha welaka ehenhla ka tona. Kutani hi kombela mi nga ti na tona exivandleni xa ntsombano. Hambi swi ri tano, switshamo swa vana kumbe swa movha swa amukeriwa, tanihi leswi leswi swi nga tsimbiwaka eswitshan’weni ekusuhi ni vatswari. Ntirhisano wa n’wina emhakeni leyi wu ta tlangeriwa.

NKHUVULO: Lava yaka eku khuvuriweni va fanele va va eswitshan’weni swa vona exivandleni lexi vekiweke, nongonoko wu nga si sungula hi Mugqivela ni mixo. Mpahla leyi ringaniseriweke yo hlambela ha yona ni thawula swi fanele swi ta ni un’wana ni un’wana loyi a kunguhataka ku khuvuriwa. Endzhaku ka nkulumo ya nkhuvulo na xikhongelo hi xivulavuri, mutshami wa xitulu wa nongonoko u ta nyika swiletelo swo koma eka lava va yaka eku khuvuriweni ivi endzhaku a tivisa risimu. Loko ndzimana yo hetelela yi sunguriwa, varindzi va ta kongomisa lava yaka eku khuvuriweni exivandleni xa nkhuvulo kumbe emimovheni leyi nga ta va yisa kona loko vayingiseri lavan’wana hinkwavo va hetisa ku yimbelela risimu. Tanihi leswi nkhuvulo wo kombisa ku tinyiketela ka munhu ku nga mhaka ya nkoka ni ya munhu hi xiyexe exikarhi ka munhu na Yehova, a ku na lunghiselelo ra leswi vuriwaka ku khuvuriwa ka xinghana laha eka rona vanhu vambirhi kumbe ku tlula lava yaka eku khuvuriweni va angarhanaka kumbe va khomana hi mavoko loko va ri karhi va khuvuriwa. A swi bohi leswaku lava yaka eku khuvuriweni va humesa papila leri humaka eka vakulu ri kombisa leswaku va fanelekela nkhuvulo. Hambi ku ri vakulu va bandlha a va nge yisi nxaxamelo wa mavito ya lava nga ta khuvuriwa.

NTIRHO WO PFUNETA: Mpfuno wo tirhandzela wa laveka leswaku ntsombano wa muganga wu famba khwatsi. Hambi leswi u nga kotaka ku tirha xiyenge ntsena xa ntsombano, mintirho ya wena yi ta tlangeriwa. Loko u nga pfuna, u komberiwa ku vika eka Ndzawulo ya Ntirho wo Pfuneta loko u fika entsombanweni. Vana lava nga ehansi ka malembe ya 16 hi vukhale na vona va nga hoxa xandla eku humeleleni ka ntsombano, kambe va fanele ku tirha ni mutswari kumbe munhu un’wana lonkulu loyi a nga ni vutihlamuleri. Hi khutaza hinkwavo vatirhi vo tirhandzela ku fika hi nkarhi entirhweni wa vona. Malunghana ni valanguteri va ndzawulo kumbe valanguteri va xiyenge xa ndzawulo i swa nkoka swinene leswaku va va eka swiavelo swa vona ka ha ri emahlweni. Loko u ta hlwela hi xivangelo xo karhi kutani hi kombela u tivisa mulanguteri wa ntsombano.

TINSIMU: Tanihi leswi ku yimbelela ku nga xiyenge xa vugandzeri bya hina, hi khutaza hinkwenu ku titoloveta tinsimu leti landzelaka leti nga ta va xiphemu xa nongonoko: 19, 34, 172, 85, 136, 117, 121, 13, 155, 113, 105, 215, 174, 10, 53, 191, 212. Loko mi ri karhi mi dyondza tinsimu, hi ringanyeta leswaku mi tirhisa tikhasete ta Sosayiti.

MINKARHI YA NONGONOKO: I ndlela ya vutlhari naswona swi kombisa ku tlangela ku va eswitshan’weni swa hina loko nongonoko wu sungula. Sweswo swi ta va hi 10:20 a.m. hi siku ro sungula. Endla makungu yo tshama minongonoko yi kondza yi hela. Risimu ro pfala ni xikhongelo swi ta va kwalomu ka 4:00 p.m. hi siku ro hetelela.

TIBEJE: U komberiwa ku ambala beje leyi khavisiweke hi ndlela leyi hlawulekeke entsombanweni ni loko u ri karhi u ya ni ku vuya exivandleni xa ntsombano. Leswi hakanyingi swi swi endla swi koteka leswaku hi nyikela vumbhoni lebyinene loko hi ri karhi hi famba. Tibeje ti fanele ku kumiwa hi ku tirhisa bandlha ra ka n’wina, tanihi leswi ti nga taka ti nga kumeki emintsombanweni.

NHLANGANO WA BETHELE: Ku ta va ni nhlangano hi siku ra vumbirhi, wa vahuweleri vahi ni vahi lava tinyiketeleke lava nga exikarhi ka malembe ya 19 na 35 hi vukhale lava tsakelaka ku nghenela ntirho wa Bethele. Switiviso swi ta endliwa entsombanweni malunghana ni nkarhi lowu kongomeke ni ndhawu ya nhlangano lowu.

KU TITIVISA KA VUPHAYONA: Maphayona hinkwawo ya nkarhi hinkwawo ni lama hlawulekeke, ni valanguteri lava famba-fambaka, varhumiwa ni lava nga entirhweni wa Bethele va fanele ku ta ni khadi ra vona ra “Pioneer Service Identification” (S-202) entsombanweni. Lava nga enxaxamelweni hi tin’hweti ta ntsevu enkarhini wa ntsombano wa muganga lowu va nga eka wona va nga ha amukela mathikithiki ya ntsombano lama ringanaka R20 hi ku humesa khadi ra vona. Hlayisa khadi leri hi vukheta tanihi mali. Ri nga ka ri nga siviwi hi rin’wana entsombanweni. Swilo swihi na swihi leswi humesiwaka swa mahala kumbe tibuku tin’wana leti nga ni mintsengo ya vuphayona ti ta kumeka eka maphayona endlwini ya tibuku ntsena.

MARITO YO TSUNDZUXA: Ku nga khathariseki leswaku u paka kwihi, u fanele ku khiya movha wa wena minkarhi hinkwayo naswona u nga tshuki u sukela nchumu wo karhi lowu vonakaka endzeni. Hlayisa mindzhwalo ya wena yi khiyeleriwile endzeni ka buti ya movha, loko swi koteka. Nakambe, tilangutele eka makhamba ni vasechi lava kokiwaka hi tinhlengeletano letikulu. Leswi swi katsa ku ka u nga tshiki nchumu wa nkoka wu nga khathaleriwanga eswitulwini emintsombanweni. Tivoneleni.