Dzunisani Vito Ra Xikwembu Hi Xitalo

1 Hi tsaka swonghasi hi mikateko yo tala ya Yehova! EAfrika Dzonga hi lembe leri ra ntirho, ku ve ni tinhlohlori letintshwa ta vahuweleri ni tidyondzo ta le makaya ta Bibele. Nakambe ku ve ni nhlayo leyinene ya Xitsundzuxo yo lava ku ringana 125000. Vanhu vo tlula 128000 va ve kona eka Mintsombano ya Miganga ya “Ririmi Leri Tengeke” EAfrika Dzonga ni le matikweni lama nga kusuhi. Hi pfunekile eka mphakelo lowukulu wa swakudya swa moya lowu nyikeriweke eka nhlengeletano ya hina leyinene ya xifundza ni le ka minongonoko ya siku ra nhlengeletano yo hlawuleka. Nakambe hi kume minkateko yin’wana yo tala.

2 Xana hi nga ku kombisa njhani ku tlangela ka hina eka hinkwaswo leswi Yehova a hi endlelaka swona? Hi nga endla leswi hi ku dzunisa vito ra Xikwembu hi xitalo!—Ps. 145:21.

YANA EMAHLWENI U DZUNISA VITO RA XIKWEMBU

3 Xana hi nga ri dzunisa njhani vito ra Yehova hi xitalo hi August? Hi ta ya emahlweni hi fambisa tibroxara ta mpimo wa magazini. Hi ku lunghiselela hi vutlhari ni ku khoma mihlovo ya tibroxara leti entirhweni wa nsimu, hi ta tihlomisela ku dzunisa Yehova ni ku kota ku pfuna van’wana ku dyondza ndlela leyi na vona va nga n’wi dzunisaka ha yona.

4 Mhaka yo Vulavurisana hi leyi nge “Misava Leyintshwa— Hi Mani?” Hi nga ha lunghiselela swingheniso leswi faneleke leswi sekeriweke eka mhaka leyi nga eka matluka 9-15 ya buku leyi nge Reasoning. Vini van’wana va miti va ta vulavula na wena hi ku kongoma hi leswi varhangeri va misava va swi vulaka hi mintshembo leyi nga kona ya ku antswisa misava. Hambi leswi vanhu vo tala va navelaka swiyimo swa ku rhula, Yeremia 10:23 yi kombisa leswaku munhu a nge swi tlhanthli swiphiqo swa yena n’wini. Swa tsakisa ku tiva leswaku xitshembiso xa Xikwembu xo endla swo karhi hi swiyimo swa misava namuntlha a xi nge tsandzeki. Xitshembiso lexi xi kumeka eka 2 Petro 3:13. Nyikela broxara leyi faneleke.

LUNGHISELELA KAHLE

5 Ku lunghiselela i ka nkoka loko hi lava ku humelela ku dyondzisa van’wana. Ha yini u nga lunghiseleli ni swirho swin’wana swa ndyangu, ni un’wana la ku dyondziseke ntiyiso kumbe ni un’wana entlaweni wa wena wa dyondzo ya buku? Hi ku pfuxeta mhaka ya wena, u ta titwa u tiyiseka swinene ni ku va ni matimba loko u vulavula ni vanhu ensin’wini.

6 Timhaka ta hina ti fanele ti kombisa ku tsakela ka hina vanhu. Kandziyisa xitshembiso xa Bibele xa misava leyintshwa leswaku u nyika lava nga ni gome ni lava heleke matimba ntshembo. Loko n’wini wa muti a amukela broxara, u nga ha kombisa nongonoko wa dyondzo ya hina ya Bibele. Kumbe u nga ha vona swi fanerile ku endla tano eka riendzo ro vuyela.

7 Tanihi leswi hi fikelelaka makumu ya lembe leri ra ntirho ra nkoka, mawaku ntsako wo va vaamukeri va mikateko yo tala swinene leyi humaka eka Yehova! Loko muhuweleri un’wana ni un’wana o hlanganyela nkarhi na nkarhi evutirhelini bya nsimu vhiki rin’wana ni rin’wana ni ku vika ntirho wa yena ka ha ri ni nkarhi eku heleni ka August, ha tshemba leswaku hi ta heta lembe leri ra ntirho hi ri ni nhlohlori yin’wana ya vahuweleri! Onge hinkwerhu ka hina hi nga tirhisa n’hweti leyi yi saleke ya lembe leri ra ntirho ra 1991 ku dzunisa vito ra Yehova hi xitalo tanihi leswi hi languteleke ku tirhela Yehova hi laha ku nga heriki emisaveni leyintshwa hi ku chivirika.