Tinyiketele Evutirhelini Bya Nsimu Xiyenge 2: Ku Pfuxa Ku Chivirika
1 Swa olova ku chivirikela ntirho loko hi wu tsakela. Naswona swa tiveka leswaku munhu u tsakela ku endla xilo lexi a xi lunghiseleleke. Entiyisweni sweswo swi tano leswaku hi hetisisa vutirheli bya hina hi xitalo.—2 Tim. 4:5.
KU LUNGHISELELA I KA NKOKA
2 Ku chivirika ka hina evutirhelini bya nsimu ku titshege hi ndlela leyi hi lunghiseleleke ha yona ni leswaku hi ya kangani entirhweni. Hi xikombiso, loko un’wana loyi hi hlanganaka na yena evutirhelini bya yindlu na yindlu a ti vula leswaku i Mumoslem, xana hi ta ku yini? Muhuweleri la lunghiseleleke kahle a nga ha hlamula a ku: “Swa tsakisa sweswo. A ndzi si vulavula ni Mamoslem yo tala. Kambe ndzi hlaye swin’wana hi tidyondzo ti nga ri tingani ta vukhongeri bya wena eka buku-mpfuno leyi. [Pfula eka tluka 23 ya buku ya Reasoning.] Yi vula leswaku u pfumela leswaku Yesu a a ri muprofeta kambe Mu?ammad a a ri muprofeta wo hetelela ni wa nkoka ngopfu. Xana a swi tano ke? [Yimela nhlamulo.] Xana wa pfumela ni leswaku Muxe a a ri muprofeta? [Yimela nhlamulo, u pfumelelana na yona.] Xana ndzi nga ku komba eka Matsalwa yo Kwetsima leswi Muxe a swi dyondzeke eka Xikwembu hi vito ra Xikwembu?” Kutani u nga hlaya Eksoda 6:3. Hi ndlela leyi, u nga ha va u sungule ku vulavurisana loku tsakisaka.
3 Swa nonon’hwa eka vo tala va hina ku tsundzuka matluka yo karhi. Kambe hi ku lunghiselela ni ku pfuxeta kuntsongo, hi nga ha tirhisa xiyenge lexi vuriwaka “Conversation Stoppers” lexi nga ekusuhi ni le ku sunguleni ka buku ya Reasoning. Leswi katsiweke eka xiphemu xolexo i matluka ma nga ri mangani ya rungula ro hi pfuna ku hlamula vanhu lava tivulaka va vukhongeri byo karhi.
4 Buku ya Reasoning nakambe yi na xiphemu lexinene xa swingheniso. Ha yini u nga fananisi swingheniso swa wena ni leswi? Hi nga ha lava ku twananisa mhaka ya hina ni xiyimo. Emakumu ya tinhloko-mhaka to tala leti nga eka buku ya Reasoning, ku na xiphemu lexi nge “If Someone Says,” lexi nyikelaka mhaka leyinene yo hlamula swivutiso swo karhi kumbe ku kaneta loku kongomisiweke emhakeni. Hambi swi ri tano, mhaka leyi hinkwayo leyinene ya nkoka ya pfuna hi ku ya hi mpimo lowu hi yi tirhisaka ha yona eku lunghiseleleni ka hina.
NDLELA YO LUNGHISELELA
5 Xalamukela tibuku tin’wana ni tin’wana leti nga ta hlamuseriwa eka Nhlangano wa Ntirho kutani u va na tona leswaku u ta langutisa eka yona hi nkarhi wa bulo kumbe minkombiso. Hi ndlela leyi, u nga ha pfuneka hi xitalo swinene eka ku lunghiselela ka van’wana.
6 Swa pfuna ku heta nkarhi wo karhi u lunghiselela ntirho. Tiyiseka leswaku u na tibuku leti u ti lavaka. Teka timinete ti nga ri tingani u langutisa Mhaka yo Vulavurisana. Pfuxeta matsalwa lama tirhisiweke kutani u languta tinhla leti ku vulavuriwaka ha tona eka buku leyi nga ta fambisiwa. Ku endla leswi tanihi ndyangu swi nga pfuna.
7 Vanani ni swiyimiso swo titoloveta. Mi nga ha titoloveta hi minkarhi yo hambana-hambana—endzhaku ka Dyondzo ya Buku ya Bandlha, swinkhubyana swa xinghana, eka ntlawa wa movha ni le makaya. Ku nyikela tinkulumo ni ku vulavurisana ni ku kombisa ndlela yo langutana ni ku kaneta swi nga ha tsakisa swinene ni ku nyikela nkarhi lowunene wo lota vutshila bya hina.
8 Ku lunghiselela ka vutlhari ku ta aka ku chivirikela ka hina nsimu leswaku hi va vatirhi va vutshila kutani hi tshovela ntsako lowu enerisaka.—Yoh. 2:17.