Lunghiselelo Ra Dyondzo Ya Buku Ya Bandlha Xiyenge 2: Xilaveko Xo Lunghiselela Ni Ku Hlanganyela

1 Rito ra Yehova ri twarisa leswaku ku katekile munhu loyi a kumaka ku twisisa ni loyi a kumaka vutlhari, hikuva hakelo i yikulu. (Swiv. 3:13, 14, 16-18) Vutlhari bya moya i bya nkoka naswona byi ponisa vutomi. Byi pfumelela Mukriste ku tirhisa vutivi lebyi a byi kumeke eka Rito ra Xikwembu hi ndlela leyinene leswaku a gandzela hi ku chivirika, a tlhantlha swiphiqo swa siku na siku ni ku endla swiboho mayelana ni tipakani ta yena evuton’wini.

2 Dyondzo ya Buku ya Bandlha yi endleriwe ku hi pfuna ku dyondza ni ku tirhisa Rito ra Xikwembu naswona hi ndlela leyi hi kula evutlharini ni le ku twisiseni ka moya. Hikwalaho, ku hlanganyela eka Dyondzo ya Buku ya Bandlha nkarhi na nkarhi swi fanele swi va xiphemu xa nkoka xa nongonoko wa hina wa munhu hi xiyexe leswaku hi kuma vutlhari.—Swiv. 4:7-9.

LUNGHISELELA HI VUKHETA

3 Van’wana va lava hlanganyeleke ni bandlha ra lembe xidzana ro sungula a va tinyiketelanga swinene ku dyondza ntiyiso ni ku fambisana ni ku vonakala loku yaka emahlweni. Va tshame va ri vana eka Kriste naswona xisweswo a va tolovelananga ni rito ra ku lulama. (Vahev. 5:11-13) Muapostola Pawulo u khutaze bandlha ku “kongoma eku hetisekeni.” (Vahev. 6:1) Kavula, leswi a swo lava ku yingisela ntsena loko van’wana va hlamusela ntiyiso. Mianakanyo ni ku lavisisa swa laveka ku pfuxa ‘miehleketo ya hina leyi nga ni ku twisisa’ kutani hi fanele hi tinyiketela swinene.—2 Pet. 3:1, 2; Luka 13:24.

4 Ku lungiselela Dyondzo ya Buku ya Bandlha hi vukheta ku kurisa ku twisisa ka hina naswona ku aka ku tlangela mhaka. Hambi swi ri tano, ku lunghiselela loku humelelaka ku lava leswi tlulaka ku hlaya tindzimana ni ku khwatihata tinhlamulo ta xisekelo ta swivutiso hi xihatla ntsena. Hi lava nkarhi wo twisisa mhaka hi ku ehleketisisa hi leswi yi swi vulaka ni nkoka wa yona eka hina hi hexe. Languta matsalwa lama tshahiweke kutani u ehleketa leswaku ma nghena njhani eka tinhla leti nga eka tindzimana. Languta marito lawa u nga ma twisiseki kahle.

5 Eka van’wana va hina, dyondzo ya munhu hi xiyexe yi nga ha va ntirho wo nonon’hwa naswona wu dya nkarhi; kambe, vona ndlela leyi yi vuyerisaka ha yona! Pawulo u kombetele eka mimbuyelo ya dyondzo yo tano ya matimba, a ku: “Kambe swakudya leswi tiyeke i swa lava kuleke, i swa lava miehleketo ya vona yi vupfeke, lava toloveleke ku hlawula leswinene eka leswo biha.” (Vahev. 5:14) Dyondzo yo tano ya munhu hi xiyexe yi hi pfuna ku kula hi vupfa, leswaku hi ta kota ku hlawula goza lerinene loko hi hlangavetana ni swiboho leswi hi fanelaka ku swi endla.

HLANGANYELA

6 Hi fanele hi lwela ku hlanganyela eka nhlangano wun’wana ni wun’wana. Ha yini? Tinhlamulo ta hina leti lunghiseleriweke kahle a hi xikombiso xa ripfumelo ra hina ntsena, kambe ti tlhela ti khutaza ni ku aka vamakwerhu. (Varhoma 10:10; Vahev. 10:23-25) Ku hlanganyela hi ku chivirika eka Dyondzo ya Buku ya Bandlha nakambe ku endla xiphemu xa nkoka eku kuleni ka hina hi tlhelo ra moya. Loko lava nga ni ntokoto, vana, vanhu lavantshwa lava tsakelaka va hlamula hi ku ntshunxeka hinkwavo, ntlawa wu tsakela tinhlamulo leti hambaneke leti fuweke. Leswi swa dyondzisa ni ku phyuphyisa eka hinkwavo.—km 3/86 tl. 3.

7 Loko hi lunghiselela Dyondzo ya Buku ya Bandlha hi vutlharhi, hi va kona nkarhi na nkarhi, hi hlanganyela hi ku ntshunxeka, ku lavisisa ka hina vutlhari ku ta humelela naswona hi ta “kuma ku tiva ka Xikwembu.”—Swiv. 2:4, 5.