Ku Lunghiselela Ka Ha Ri Ni Nkarhi Swi Tisa Ntsako

¹ Ku hlanganyela evutirhelini bya nsimu ku hi tisela ntsako lowukulu. (Ps. 89:15, 16) Ina, ku lunghiselela i swa nkoka leswaku munhu a kuma ntsako wolowo hi ku hetiseka. Loko hi lunghiselela kahle, hi endla mintirho yo tala naswona hi ku endla mintirho yo tala, hi kuma ntsako lowukulu.

² Tirhisa Switirho Leswi Hi Nga Na Swona: Rhanga hi ku hlaya ni ku kambisisa rungula leri nga eka Vutirheli Bya Hina Bya Mfumo. Hakanyingi byi ni swingheniso leswi hleriweke kahle leswi endleriweke ku ku pfuna eku twariseni ka rungula ra Mfumo hi ku olova ni hi ndlela leyi humelelaka. U ta kuma swikombiso swa ku hlula ku kanetiwa loku tolovelekeke. Byi hlamusela tindlela leti kongomeke mayelana ni ku endla riendzo ro vuyela hi ndlela leyi humelelaka, hi xikongomelo xa ku sungula dyondzo ya Bibele. Swi le ka wena ku tiantswisela swingheniso leswi kukondza swi ku olovela ku swi tirhisa. Ku engetela kwalaho, ku ni buku leyi nge Ku Hlamulana, ku nga yona leyi nga ni swingheniso swo hambana-hambana ni tinhlamulo ta lava sivaka bulo, xisweswo yi ku pfuna ku va la humelelaka swinene eka swiyimo swo tala leswi u langutanaka na swona.

³ Kambisisa nkandziyiso lowu u nga ta wu fambisa ivi u hlawula yinhla yin’we kumbe timbirhi leti tsakisaka leti u nga ta ti komba n’wini wa muti. Mhaka leyi tlhontlhaka mianakanyo leyi u yi tweke emahungwini kumbe leyi u yi hlayeke, yi nga ha ku nyika xingheniso xo sungula bulo. Anakanya hi ku kanetiwa loku hi ntolovelo u langutanaka na kona, ivi u anakanyisisa hi tindlela ti nga ri tingani leti u nga hlamulaka ha tona. Kutani tinyike xinkarhana u titoloveta leswi u nga ta swi vula loko u nghena emutini.

⁴ Hlanganyela Eka Nhlangano Wun’wana Ni Wun’wana Wa Ntirho: Rhiya ndleve swinene eNhlanganweni wa Ntirho loko ku buriwa, ku tlhuvutsiwa ni loko ku kombisiwa ndlela leyi swi nga tirhisiwaka ha yona swiringanyeto leswi nga eka Vutirheli Bya Hina Bya Mfumo. Xiyisisa maendlelo lawa u vonaka onge u nga ma tirhisa eswinghenisweni swa wena. Tsundzuka swiyimo leswi tolovelekeke leswi u tshameke u langutana na swona evutirhelini ni ku anakanyisisa hi tindlela leti u nga chumayelaka ha tona hi ndlela leyi humelelaka. Burisana ni vahuweleri van’wana hi swiyimo leswi loko minhlangano yi nga si sungula ni loko se yi herile.

⁵ Tiyiseka leswaku loko u ‘lunghekele ntirho wun’wana ni wun’wana lowunene,’ u ta kuma ntsako lowukulu u tlhela u humelela eku pfuneni ka van’wana leswaku va kuma ndlela leyi yisaka evuton’wini.—2 Tim. 2:21.