ku Lunghiselela —I Xilotlelo Xa Ku Humelela

¹ Ku lunghiselela vutirheli ka ha ri emahlweni swi ta hi pfuna ku hlula ku kanakana kwihi na kwihi loku munhu a nga ha titwaka a ri na kona mayelana ni ku hlanganyela entirhweni wa nsimu. Loko u ri kusuhi ni ku nghena emutini, u ta tiva leswi u lavaka ku vula swona eka n’wini wa muti. A wu nge kali u chava mintlhontlho leyi u nga ha hlanganaka na yona. Loko u huma ensin’wini u tlhelela ekaya, u ta titwa u khutazekile, hi ku tiva leswaku u endle matshalatshala lamanene evutirhelini. Entiyisweni, ku lunghiselela swinene i xilotlelo xo lota vutshila bya hina byo chumayela ni ku dyondzisa.

² Pawulo u kandziyise ku lungheka hi ku hi khutaza leswaku hi “hisekela ku twarisa Evhangeli ya ku rhula ti va tintanghu ta [h]ina.” (Ef. 6:15) Leswi swi katsa ku endla mianakanyo ni timbilu ta hina swi lungheka kun’we ni ku va ni ntshembo ni langutelo ro swi rhandza. Loko hi lunghekele ku avelana ni van’wana ntiyiso, ntirho wa hina wu ta hakeriwa hi mihandzu ya Mfumo, leyi nga ta hi tsakisa.—Mint. 20:35.

³ Ndlela Yo Lunghiselela Ntirho Wo Chumayela: Hi fanele hi hlawula xingheniso lexi hi titwaka hi ntshunxekile ku xi tirhisa, kumbexana eka leswi ringanyetiweke ebukwini leyi nge Ku Hlamulana kumbe eka leswi kumekaka eka tluka ro hetelela ra Vutirheli Bya Hina Bya Mfumo. Anakanyisisa hi tsalwa leri u kunguhataka ku ri tirhisa, u tiyiseka hi marito kumbe swivulwa leswi u nga ta swi kandziyisa leswaku u humesela tinhla-nkulu ta wena erivaleni. A ku na xilaveko xo nhlokohata xingheniso; ematshan’wini ya sweswo, i swinene ku tsundzuka mhaka, u yi veka hi marito ya wena n’wini, naswona u yi phofula hi ndlela leyi u anakanyaka leswaku yi ta tsakisa muyingiseri wa wena.

⁴ Kambisisa buku leyi u kunguhataka ku yi fambisa, kutani u hlawula tinhla leti u tsakelaka ku vulavula ha tona. Hlawula xin’wana lexi u anakanyaka leswaku xi ta tsakisa vanhu va le nsin’wini ya n’wina. Anakanya hi ndlela leyi u nga ta cinca xingheniso xa wena ha yona eka vanhu vo hambana—wanuna, wansati, mudyuhari, kumbe muntshwa.

⁵ Xana u tshama u ringeta ku titoloveta ni un’wana? Hlanganani tanihi ndyangu kumbe ni vahuweleri van’wana leswaku mi bula hi swingheniso leswi nga tirhaka, kutani mi titoloveta swona mi tlakusa rito leswaku hinkwavo va ta swi tsundzuka kahle. Ringeta ku endla swiyimo leswi humelelaka ni minkaneto leyi u nga hlanganaka na yona ensin’wini. Ku titoloveta ko tano ku ta antswisa ku vulavula ka wena hi ku rhelela, ku engetela ku humelela ka wena eku chumayeleni, naswona ku engetela xivindzi xa wena.

⁶ Ku engetela eka ku lunghiselela ni ku titoloveta xingheniso xa wena, u fanele nakambe u tivutisa, ‘Xana swiambalo leswi ndzi kunguhataka ku swi ambala swi fanela nsimu? Xana ndzi na hinkwaswo leswi ndzi swi lavaka enkwameni wa mina, ku katsa ni tibuku leti ndzi kunguhataka ku ti tirhisa? Xana ti le ka xiyimo lexinene? Xana ndzi na yona buku ya mina leyi nge Ku Hlamulana, swiphephana, tirhekhodo ta yindlu na yindlu ni xo tsala?’ Ku lunghiselela ka ha ri emahlweni swi ta pfuna ku va na siku leri nga ni mihandzu ensin’wini.

⁷ Loko hi endle leswi hi nga swi kotaka leswaku hi tilunghiselela, hi fanele hi khongelela moya wa Yehovha leswaku wu hi pfuna ku va lava humelelaka. (1 Yoh. 5:14, 15) Ku nyikela nyingiso lowunene eku lunghiseleleni swi ta endla leswaku hi kuma ntsako entirhweni wa hina, loko hi ri karhi hi “hetisa tifanelo ta ntirho wa [hi]na.”—2 Tim. 4:5.