Minhlangano Ya Ntirho Ya December

Hi vhiki ra ntsombano hi kombela mi vona “XIYA” ehansi ka Minhlangano ya Ntirho eka Vutirheli Bya Hina Bya Mfumo bya September 1991.

Vhiki Leri Sungulaka Hi December 2

Risimu 108

15 min: Switiviso swa bandlha ni Switiviso leswi hlawuriweke leswi humaka eka Vutirheli Bya Hina Bya Mfumo. “Xikolo Xa Vutirheli Bya Mfumo Xi Nyika Dyondzo Ya Le Tilweni.” Katsa tinhlamuselo ta timagazini ta December leti vulavulaka hi ku tlangela holideyi. Boxa tinhla leti kongomeke leti nga kandziyisiwaka entirhweni wa nsimu. Khutaza ku seketela ntirho wa timagazini hi Mugqivela. Hi kombela u pfuxeta “Switsundzuxo Swa Ntsombano Wa Muganga” eka xiengetelo xa Vutirheli Bya Mfumo bya July 1991 “Lunghiselela Sweswi Ku Va Kona Eka Ntsombano Wa Muganga Wa ‘Varhandzi Va Ntshunxeko’ Wa 1991.”

18 min: “Xana Wa Wu Tlangela Nkoka Wa Yona?” Swivutiso ni tinhlamulo. Kombisa ku nyikeriwa ka buku ya Timhaka Ta Bibele, ko sungula ku nga ha tameriwa hi muhuweleri la kuleke, kasi ka vumbirhi ku nga tameriwa hi muntshwa a nyikela buku ya Timhaka Ta Bibele eka mudyondzi-kulobye, a tlhela a kombisa ndlela leyi buku yi nga dyondziwaka ha yona.

12 min: Bula ni vatswari hi xilaveko xo vonana ni vadyondzisi va xikolo, swikolo swi nga si pfula, ngopfu-ngopfu malunghana ni xiyimo xa hina hi ndzetelo wa vukhongeri, xikhongelo, mintirho ya le ndzhaku ka xikolo ni ku amukela vufambisi kumbe swikhundla swo hlawuriwa. Kombisa ndlela leyi mutswari ni n’wana va vulavulaka ni mudyondzisi ha yona. Vulavurisana ni vahuweleri lavatsongo hi xiyimo xa le xikolweni xa vona hi timhaka leti. Ringeta leswaku vana va hlamusela leswi humelelaka mayelana ni mintirho leyi, eswikolweni swa vona, u kandziyisa nkoka wa ku nga hlanganyeli. Kandziyisa xilaveko xo landzelela nkongomiso lowu nyikeriwaka hi “nandza la tshembekaka, wo tlhariha,” hi ku tshembeka. Tirhisa broxara leyi nge School. Vakulu va ta kambisisa ku tiyisekisa loko vatswari va wu yingisile nkongomiso lowu nyikeriweke. Loko mutswari a nga swi koti ku vulavula ni mudyondzisi lontshwa ku nga si sungula masiku yo wisa ya xikolo, kutani handle ko tsandzeka, mutswari u fanele a famba ni n’wana loko xikolo xi pfula hi lembe lerintshwa. Mutswari u fanele a hlamusela mudyondzisi hi xiyimo xa hina etimhakeni leti katsaka vugandzeri bya ntiyiso ni vukala-tlhelo. Loko (va-)mutswari a lava mpfuno, a nga kombela nkulu leswaku a famba na yena. Swiphiqo leswikulu swi nga papalatiwa loko leswi swi endliwa.

Risimu 221 na xikhongelo xo pfala.

Vhiki Leri Sungulaka Hi December 9

Risimu 166

5 min: Switiviso swa bandlha. Hlanganisa Marungula Ya Swa Mfumo. Khutaza hinkwavo ku hlanganyela hi xitalo ensin’wini mahelo-vhiki lawa, ni ku tiyisekisa leswaku swiviko swa ntirho wa nsimu swa n’hweti leyi swa tisiwa.

25 min: “Ku Twarisa Mahungu Lamanene—Hi Nkarhi Wa Wena Wo Wisa.” Nkulumo ni bulo ra ndyangu.

(5 min.) Mutshama-xitulu u bula hi tindzimana timbirhi to sungula ivi a nghenisa bulo ra ndyangu. Vumoya bya ndyangu a byi fanelanga byi honisiwa hi nkarhi wo wisa. Tinhloko ta mindyangu ti fanele ti tiyiseka leswaku swilaveko swa moya swa khathaleriwa nkarhi hinkwawo.—Deut. 6:6, 7.

(18 min.) Bulo ra ndyangu ri hlanganisa tinhla leti nga eka tindzimana 3-6. Nhloko ya ndyangu yi burisana ni ndyangu hi malunghiselelo lama lavekaka ku tiyisekisa leswaku nkarhi wo wisa wu ta katsa mintirho ya moya. Xirho xin’wana xa ndyangu xi kume adirese ni minkarhi ya minhlangano ya bandlha ra ndhawu leyi va nga ta yi endzela. Ndyangu wu na tibuku leti eneleke to hlanganyela evutirhelini bya nsimu ni bandlha, swin’we ni ku tirhisa minkarhi yo nyikela vumbhoni hi xitshuketa. Ku boxiwa swiyimo leswi va nga ha hlangavetanaka na swona, leswi swi nga ta nyika nkarhi wo nyikela vumbhoni. Nhloko ya ndyangu yi yisa nyingiso eka makungu yo va kona eka Ntsombano wa Muganga wa “Varhandzi Va Ntshunxeko” ivi a va tsundzuxa leswaku eku heleni ka siku rin’wana ni rin’wana ra ntsombano va ta endla mpfuxeto, a hlamusela mimpfuno yo endla tano. Ndyangu hi ku komisa wu boxa tinhla leti faneleke leti humaka eka xiengetelo enkandziyisweni wa Vutirheli Bya Hina Bya Mfumo wa July malunghana ni mahanyelo lamanene loko hi ri entsombanweni. Hinkwavo va langutele hi mahlo-ngati ku kuma swo tala swa le tilweni eka nkarhi wa vona wo wisa.

(2 min.) Mutshama-xitulu u gimeta hi ku kandziyisa xilaveko xa leswaku tinhloko ta mindyangu ti tiyiseka leswaku ti nga honisi swilaveko swa moya swa ndyangu ku nga khathariseki makungu wahi ni wahi lawa va ma endlaka.

15 min: Swilaveko swa bandlha, kumbe, “Xana Wa Yi Kaneta Mimboyamelo Ya Vudyoho?” Nkulumo leyi sekeriweke eka Xihondzo xo Rindza xa August 15, 1991, matluka 29-31.

Risimu 196 na xikhongelo xo pfala.

Vhiki Leri Sungulaka Hi December 16

Risimu 169

10 min: Switiviso swa bandlha. Katsa xiviko xa timali swin’we ni xibumabumelo xa minyikelo ya Sosayiti leyi endliweke hi bandlha. Boxa malunghiselelo ya bandlha ya ku nyikela vumbhoni hi holideyi.

20 min: “Ku Gingiriteka eNtirhweni Wa Yehova.” Bulo ra swivutiso ni tinhlamulo. Nkombiso hi ndyangu wa vanhu va mune. Tatana u burisana ni ndyangu hi xiyimiso xa nkarhi wa vona wa January, a tirhisa khalendara ya 1992. U anakanyisisa hi masiku lawa ma nga ta vekeriwa etlhelo ya ntirho wa nsimu ni ndlela leyi a nga ta tirhisana ni xirho xin’wana ni xin’wana xa ndyangu ha yona.

15 min: “Vuphayona—Ntirho Lowu Tisaka Tihakelo Leti Fuweke.” Ku kambisisa hi swivutiso ni tinhlamulo. Vulavurisana ni maphayona mambirhi. Hi swihi swihinga leswi va bohekeke ku swi hlula leswaku va nghenela ntirho wa vuphayona? I yini leswi va susumeteleke leswaku va phayona? I yini leswi va pfuneke leswaku va humelela eku phayoneni ka vona? Khutaza hinkwavo leswaku va anakanyisisa hi swiyimo swa vona vini hi xikhongelo.

Risimu 40 na xikhongelo xo pfala.

Vhiki Leri Sungulaka Hi December 23

Risimu 197

10 min: Switiviso swa bandlha. Kombisa ku fambisiwa ka timagazini ta sweswinyana. Ringeta ku simeka ntila wa timagazini hambi kwihi laha swi kotekaka kona.

25 min: “Ku Hlanganyela Eku Andzeni Ka Mfumo.” Bulo ra xihloko xa xiengetelo hi swivutiso ni tinhlamulo. Khutaza hinkwavo ebandlheni ku endla hi ku ya hi rungula leri nyikeriweke eka xiengetelo hi ku hambeta va nyikela nseketelo wa vona wa mbilu hinkwayo entirhweni wo aka.

10 min: “Hlaya Leswaku U Engetela Vutivi Bya Wena.” Yi fanele ku tameriwa hi mulanguteri wa Xikolo Xa Vutirheli Bya Le Tilweni. Nkulumo leyi sekeriweke eka Awake! ya July 22, 1991, matluka 25-7, leyi kandziyisaka xilaveko xo va vahlayi vo antswa. Pfuna vayingiseri va twisisa leswaku ku kota ku hlaya kahle ntsena a swi enelanga; hi fanele hi kurisa ku twisisa lokunene.

Risimu 201 na xikhongelo xo pfala.