Ku Twarisa Mahungu Lamanene Hi Nkarhi Wa Wena Wo Wisa

¹ Hakanyingi hi December ni le ku sunguleni ka January hi va ni nkarhi wo tala wa mintirho ya munhu hi xiyexe. Hi fanele hi hlela ka ha ri emahlweni loko hi lava ku tirhisa nkarhi wa hina leswaku hi titwa hi enerisekile. I makungu wahi lawa hi nga ma endlaka sweswi ku tiyisekisa leswaku nkarhi wa hina hi wu tirhisela swa le tilweni?

² Nhlayo leyikulu ya vanhu lava tsakelaka, va vuyeriwa eka mimpfuno ya moya ya lunghiselelo ra hina ra dyondzo ya le kaya ya Bibele, ya vhiki na vhiki. Sweswinyana ku karhi ku fambisiwa tidyondzo ta le kaya ta Bibele to tlula 50 000! Nhluvuko wa vona wa moya wu titshege ngopfu hi mpfuno lowu va wu kumaka eka hina. Swi nga va nkateko eka vona leswaku va va kona eka ntsombano wa muganga. Hi nga va endla va xalamukela mimpfuno ya wona yo tala ya moya ni ku va pfuna hi malunghiselelo ya vona yo famba, kumbexana hi va rhamba leswaku va famba na hina kumbe ni van’wana lava va nga ha vaka ni ndhawu emimovheni ya vona.

³ Ku va kona entsombanweni swi nyika minkarhi leyi engetelekeke yo nyikela vumbhoni hi xitshuketa. Ku kunguhata ka ha ri emahlweni ku fanele ku katsa ku paka mphakelo wa tibuku ta sweswinyana, ku katsa ni mphakelo wa Buku Yanga Ya Timhaka Ta Bibele. Hi nga nyikela vumbhoni eka vanhu lava tirhaka eswitichini swa petirolo, etihodela ni le tikhefini, swin’we ni le ka lava tirhisaka vutleketli bya mani na mani. Leyi i ndlela leyinene yo tiphina hi mintokoto yo tala.

⁴ Nkarhi na nkarhi vantshwa va tirhisa December na January tanihi nkarhi wo wisa. Hambi leswi vutihungasi lebyinene byi pfunaka, xana wun’wana wa nkarhi lowu wu nga tirhiseriwa ku hlanganyela entirhweni wo nyikela vumbhoni, tanihi ku phayona nkarhinyana? Vatswari va nga sungula sweswi ku pfuna vana va vona leswaku va endla makungu. Kumbexana vana lava humaka emindyangwini yo hambana-hambana va nga tsarisa ivi va tirha swin’we tanihi ntlawa. Van’wana lava nga swi kotiki ku tsarisa va nga ringeta ku endla swo tala, ngopfu-ngopfu entirhweni wa le xikarhi ka vhiki.

⁵ Vo tala va ta kuma nkarhinyana wo wisa emintirhweni ya vona yo tihanyisa naswona va ta va va ya etindhawini tin’wana. Ku endla makungu yo va kona eminhlanganweni ya bandlha ra kwalaho ni ku hlanganyela na vona ensin’wini swi nga va xikhutazo lexinene. Swi nga ha endleka u ya endhawini leyi ku nga ni nsimu leyikulu leyi nga tirhiwiki ngopfu, leswi ku endlaka u kota ku nyikela vumbhoni eka vanhu lava nga ri twiki ko tala rungula ra Mfumo.

⁵ Vantshwa vo tala va ha ku heta xikolo. Leswi swi endla leswaku va anakanyisisa swinene hi tipakani ta vona evuton’wini. Vantshwa lava kunguhataka vumundzuku bya vona hi ku tivekela tipakani ta le tilweni, handle ko kanakana va ta katekisiwa. (1 Yoh. 2:15-17) Xiboho xo nghenela ntirho wa vuphayona bya nkarhi hinkwawo xi nga endla leswaku u hanya vutomi lebyi enerisaka, lebyi katsaka malunghelo yo tala lama hlawulekeke. Makungu lama hi hlayisaka hi tiyile entirhweni wa Yehova ma ta tisa mimpfuno leyi nga heriki eka hina ni van’wana.—1 Tim. 4:15, 16.