Engetela Ku Hlanganyela Ka Wena Eku Hangalaseni Ka Timagazini

¹ Ku hangalasa timagazini i yin’wana ya tindlela letikulu leti rungula ra Mfumo ri haxiwaka ha tona ensin’wini ya hina. Eminkarhini ya sweswinyana ku fambisiwa ka timagaini ku le hansi emavandlheni yo tala. Hi June 1992 nhlayo-xikarhi ya ku fambisiwa ka timagazini eAfrika Dzonga a yi ri 3,8 muhuweleri ha wun’we, kasi n’wexemu a yi ri 5,2. Xana mhaka leyi yi nga lulamisiwa njhani? Hikwalaho ka yini u nga tirhisi swiringanyeto swimbirhi leswi landzelaka?

² Tlharihela Timagazini: Hambi leswi xiyimo lexi xi yaka xi biha xa ikhonomi xi nga ha khumbaka ku fambisa ka hina timagazini, ha tshemba leswaku ndlela ya ku humelela evutirhelini lebyi i ku seketela malunghiselelo ya vandlha ya ntirho wa timagazini hi mbilu hinkwayo. Vunyingi bya hina, Mugqivela wun’wana ni wun’wana ni mpundzu, ni nhlikanhi, hi kuma nkarhi lowunene wa ku hlanganyela eku hangalaseni ka timagazini. Mavandlha lamanyingi na wona ma tivekela nkarhi wa ntirho wa timagazini exikarhi ka vhiki leswaku ku pfuniwa vahuweleri lava nga swi kotiki ku tirha entirhweni wa nsimu hi Migqivela. Vo tala va nga kuma leswaku ku nyikela vumbhoni ni madyambu swi va nyika nkarhi lowunene wa ku fambisa timagazini hi yindlu na yindlu. Ntirho wa le xitarateni, ntirho wa le switolo, ku nyikela vumbhoni hi xitshuketa ni mintila ya timagazini hinkwato i tindlela letinene leti hi nga hlanganyelaka ha tona eku hangalaseni ka timagazini. Entirhweni wa hina wa nkarhi na nkarhi wa ntirho wa yindlu na yindlu, hi nga ha fambisa timagazini ta sweswinyana loko nyiko ya n’hweti yi nga tekiwi. Loko hi xalamukela ku endla leswi, ni ku tlharihela timagazini, swi nga hi tisela ntsako.

³ Tivekele Pakani Ya Wena: Pakani leyinene ya munhu ha un’we yi nga va yihi emhakeni leyi? U nga ha lwela ku fambisa nhlayo-xikarhi ya magazini wun’we hi awara yin’we leyi u nga entirhweni ha yona n’hweti na n’hweti. Pakani ya wena n’wini yi fanele yi va leyinene, u xiyisisa swiyimo swa wena ni nkarhi lowu u kotaka ku wu heta entirhweni wa nsimu.

⁴ Hi nhlengeletano yakwe leyi vonakaka, Yehovha u hambeta a hi nyika leswi hi swi pfumalaka leswaku hi engetela ku hlanganyela ka hina eku hangalaseni ka timagazini. Tanihi leswi ntirho wo tano wu dzunisaka Yehovha, hi ta kuma ntsako lowukulu lowu tisiwaka hi ku hlanganyela hi laha ku engetelekeke evutirhelini hi timagazini.—Yoh. 15:8.