Bokisi Ra Swivutiso

◼ Vana lavatsongo va Vakreste va nga hlanganyela nkarhi wo tanihi kwihi evutirhelini bya nsimu ku kondza va endliwa vahuweleri lava nga khuvuriwangiki?

Vatswari va Vakreste va lava leswaku vana va vona va kula va va malandza ya Yehovha lama tiyeke, lama tinyiketeleke. (1 Sam. 2:18, 26; Lk. 2:40) Hambi loko va ha ri vatsongo ngopfu, vana va mindyangu ya Vukreste va fanele va swi kota ku ri yimela kahle ripfumelo ra vona leri sekeriweke eBibeleni. Ku kula ka moya ka vana ku engeteriwa loko va fambisana ni vatswari va vona evutirhelini bya nsimu ku sukela evuhlangini. Kambe i swa nkoka leswaku vantshwa va susumetiwa hi mbilu loko va ta tsakela ntirho wa nsimu, va navela ku va vahuweleri lava nga khuvuriwangiki naswona va hambeta va hlanganyela entirhweni wa ku chumayela hi Mfumo. Ku laveka leswaku vatswari va va letela hi vukheta. (1 Tim. 4:6; 2 Tim. 2:15) Vahuweleri van’wana lava fanelekaka va nga pfuna loko vatswari va swi lava.—Vona Vutirheli Bya Hina, tluka 100.

Loko vana lava tikhomaka kahle va fambisana ni vatswari va vona va Vakreste entirhweni wa yindlu ni yindlu, va dyondza ndlela yo hlanganyela evutirhelini. Kambe a va nge tekiwi tanihi vahuweleri lava nga khuvuriwangiki ku kondza loko va va ni vuswikoti ni vutshila bya vona. Vatswari va Vakreste va nga kunguhata leswaku n’wana a nga hlanganyela ku fikela rini eku nyikeleni ka vumbhoni loko va ri karhi va tirha swin’we. Vana lava nga siki vaka vahuweleri lava nga khuvuriwangiki a va fanelanga va famba voxe ensin’wini kumbe va famba ni vana van’wana entirhweni wa nsimu. Vatswari va nga lunghisela vana va vona ntirho wa nsimu ni ku va pfumelela leswaku va hlanganyela hi tindlela to hambana-hambana, tanihi ku hlaya tsalwa, ku fambisa xiphephana kumbe magazini kumbe a komba n’wini wa muti xifaniso xa yin’wana ya tibuku. Loko n’wana a ya a kula, a nga ha swi kota ku hlanganyela hi xitalo ebulwini.

Hi vuleteri lebyinene, vana va nga dyondza ku twisisa nkoka wa vutirheli loko va landza nkongomiso wa vatswari va vona ni loko va tikhoma hi ndlela leyi xiximekaka. Vatswari a va fanelanga va siya vana va vona lava nga siki vaka vahuweleri lava nga khuvuriwangiki loko va ya enhlanganweni wa ntirho wa nsimu, va ehleketa leswaku van’wana va ta va langutela. Vatswari lava nga ni rirhandzu va byi vona vutihlamuleri bya vona bya ku langutela ntirho wa vana va vona. Kavula, vahuweleri van’wana lava nga ni vutihlamuleri va nga ha swi tsakela ku pfuna eku leteleni ka vana lavatsongo evandlheni lava swi tsakelaka swinene ku tirhela Yehovha evutirhelini.