Swivutiso Swa Vahlayi

◼ Hikwalaho ka rungula lerintshwa ehenhleni ka vanhu lava nga khuvuriwangiki lava sungulaka vutirheli bya le rivaleni, xana xichudeni xa Bibele xi nga rhambiwa nkarhinyana ku vona ndlela leyi ntirho wu endliwaka ha yona?

Kahle-khale, vanhu lava nga khuvuriwangiki lava fambaka ni Timbhoni ta Yehova evutirhelini bya nsimu i vanhu lava fanelekaka tanihi vahuweleri va mahungu lamanene.

Vanhu vo tala va xixima Timbhoni ta Yehova hikwalaho ka ntirho wa tona lowu nga ni ntikelo ni lowunene wo ‘endla vadyondzisiwa, va va dyondzisa’ hi yindlu na yindlu na hi tidyondzo ta le makaya ta Bibele. (Matewu 28:19, 20) Kutani ke, xana vanhu va nga fika eka makumu wahi hi munhu loyi a fambaka ni Mbhoni evutirhelini lebyi? Hi laha ku twisisekaka va nga fikelela makumu ya leswaku nakulobye na yena i mutirheli kumbe loyi a nga kusuhi swinene ni ku va yena.

Kavula, ku hlawula ku nga ri kungani ku nga ha ta emianakanyweni.

Eka swiendlakalo leswi nga tolovelekangiki vakulu lava fanelekaka va pfumelele muviki wa mahungu, profesa wa le kholichi kumbe un’wana la fanaka na vona ku famba ni Mbhoni evutirhelini bya yindlu na yindlu leswaku a vona ndlela leyi byi endliwaka ha yona. Kavula, ku languteka ka munhu ni swiendlo swa yena eka swiendlakalo swo tano a swi fanelanga ku himpfilitana ni mimpimanyeto ya hina. Naswona Mbhoni yi nga ha lava ku byela vini va miti leswaku nakulobye i muviki kumbe profesa loyi a tsakelaka ku xiya ndlela leyi hi endlaka ntirho wa hina lowu nga ni ntikelo wa Bibele ha yona.

Nakambe, vatswari va Vakriste va famba ni vana va vona evutirhelini hambi loko va ri vantsongo swinene kumbe handle ka swona va nga tilulamiselanga ku va vahuweleri lava va nga khuvuriwangiki. Vatswari lava xisweswo a va tshiki vana va vona va nga khathaleriwanga. Ku va na vona entirhweni wa nsimu ku pfumelela vatswari ku vulavula ni vana va vona ehenhleni ka Rito ni tindlela ta Xikwembu loko va ‘famba egondzweni.’ (Deuteronoma 6:4-7) Kambe leyi i mhaka ya vutomi bya ndyangu wa Vukriste, hayi mhaka ya Mbhoni leyi fambaka ni munhu un’wana tanihi muxiyi ntsena. Kavula, ku dyondzisa ko tano ka vutswari ku lunghiselela vana nkarhi lowu va nga ta dzunisa Yehova tanihi vahuweleri ha wona.—Matewu 21:15, 16; ringanisa Organized to Accomplish Our Ministry, matluka 99, 100.

Kambe ke, ku vuriwa yini hi munhu loyi Mbhoni yi fambisaka dyondzo ya Bibele na yena, munhu loyi a tilulamiseleke ku va mudyondzisiwa? U ni xivangelo lexinene xo byela maxaka, vatirhi-kulobye, vaakelani ni van’wana malunghana ni “mintirho leyikulu ya Xikwembu” leyi a yi dyondzeke eMatsalweni. (Mintirho 2:11) Handle ko kanakana, ku ta fika nkarhi lowu ha wona a vonaka xilaveko xo hlanganyela na Timbhoni ta Yehova emalunghiselelweni lama hlelekeke yo “twarisa Rito ra Xikwembu.”—Mintirho 13:5.

Sweswinyana Xihondzo xo Rindza xi andlale magoza lama faneleke xichudeni xo tano xi nga si joyina Timbhoni ta kwalaho evutirhelini, xi va muhuweleri la nga khuvuriwangiki. Swa twala leswaku u fanele a va ni vutivi bya xisekelo bya Bibele, u fanele ku twisisa naswona a pfumelelana ni mimpimanyeto ya Xikwembu ya mahanyelo, naswona u fanele a navela ku hlanganyela evutirhelini bya le rivaleni na Timbhoni ta Yehova hi byakwe. Kutani vakulu vambirhi va bandlha va nga va ni bulo leri pfunaka ni leri khutazaka ra tinhla to tano na yena ni Mbhoni leyi dyondzaka Bibele na yena.a Leswi swi fanele ku endliwa xichudeni xa Bibele xi nga si rhamberiwa ku famba ni muhuweleri evutirhelini bya nsimu ku kuma vuleteri lebyi engetelekeke.

Hi laha ku twisisekaka, loko xichudeni xi faneleka ku ya evutirhelini bya nsimu ivi xi endla tano ro sungula, xi nga ha lava ku famba ni muhuweleri leswaku xi dyondza ndlela leyi ntirho wo chumayela kahle-kahle wu endliwaka ha yona hi minkarhi yi nga ri yingani. Mutirheli loyi a nga na xona a nga ha nyikela vuleteri hakantsongo-ntsongo, byo tanihi ku xi kombela ku pfunanyana hi ku hlaya matsalwa, ivi hi ku famba ka nkarhi a xi pfumelela ku nyikela vumbhoni eka n’wini wa yindlu hi xoxe. Xisweswo, a nga yisa xiviko xa ntirho wa yena wa nsimu wo sungula loko a hlanganyela eku nyikeleni ka vumbhoni ensin’wini hi xiviri. Ku hlanganyela ka yena loku yaka emahlweni entirhweni lowu ku twanana ni marito ya Yesu lama nge: “Mudyondzisiwa a nga tluli mudyondzisi wa yena; kambe mudyondzisiwa un’wana ni un’wana la dyondzekeke swinene, ú ta va tani hi mudyondzisi wa yena.”—Luka 6:40.

[Nhlamuselo ya le hansi]