Dyondzisa Vana Va Wena Ku Dzunisa Yehovha
1. Xana vana lavatsongo va nga n’wi dzunisa Yehovha?
1 Pisalema 148:12, 13 yi khutaza vafana ni vanhwanyana leswaku va ‘dzunisa vito ra Yehovha.’ Matsalwa ma tamele swikombiso swo tala swa vana lava endleke tano. Hi xikombiso, “Samuwele a a tirhela emahlweni ka Yehovha a ri mufana.” (1 Sam. 2:18) A ku ri “nhwanyana lontsongo” la byeleke nsati wa Namani leswaku muprofeta wa Yehovha le Israyele a nga hanyisa Namani eka nhlokonho lowu a a ri na wona. (2 Tih. 5:1-3) Loko Yesu a nghena etempeleni a ya endla mintirho ya matimba “vafana” hi vona lava huweleleke va ku: “Ha khongela, a ku ponisiwe N’wana wa Davhida!” (Mat. 21:15) Xana vatswari va nga va dyondzisa njhani vana va vona ku dzunisa Yehovha?
2. Ha yini swi ri swa nkoka leswaku vatswari va vekela vana va vona xikombiso lexinene?
2 Xikombiso: Vatatana lava nga Vaisrayele, a va lerisiwe leswaku vona hi voxe va fanele va rhanga va rhandza Yehovha ni ku hlayisa milawu ya yena etimbilwini ta vona vini ku ri kona va nga ta nghenisa ntiyiso etimbilwini ta vana va vona. (Det. 6:5-9) Loko u bumabumela ntirho wa nsimu naswona u chumayela vhiki ni vhiki, vana va wena na vona va ta wu rhandza naswona va ta wu vona wu ri wa nkoka ni ku va lowu enerisaka.
3. Xana makwerhu un’wana xi n’wi pfune njhani xikombiso xa vatswari vakwe?
3 Makwerhu un’wana wa xisati u ri: “Loko ndza ha ri ntsongo, ku ya ensin’wini hi mahelo-vhiki endyangwini wa ka hina a ku ri tshamela-maxelo. A ndzi swi vona leswaku hakunene vatswari va mina va tiphina hi ku chumayela. Hi kule hi ri karhi hi vona ntirho wa nsimu wu ri nchumu wo tsakisa.” Makwerhu loyi u ve muhuweleri la nga khuvuriwangiki a ha ri ni malembe ya nkombo naswona sweswi se u ni malembe ya 33 a ri entirhweni wa nkarhi hinkwawo.
4. Xana swi vula yini ku hambeta u letela vana?
4 Ku Hambeta U Dyondzisa: Tirha nsimu ni vana va wena. Kumbexana vona va nga ha tirha ku gongondza, ku nyika n’wini wa muti xiphephana kumbe ku hlaya tsalwa. Leswi swi ta va tsakisa ngopfu ni ku va pfuna leswaku va va ni xivindzi ni ku va ni vuswikoti byo chumayela rungula ra Mfumo. Loko va ri karhi va kula va nga engetela leswi va swi endlaka ensin’wini. Hikwalaho, va pfune leswaku va endla nhluvuko ni ku tivekela tipakani ta swa moya.
5. I yini leswi lavekaka leswaku n’wana a fanelekela ku va muhuweleri la nga khuvuriwangiki?
5 Loko u vona leswaku vana va wena va faneleka ku va vahuweleri lava nga khuvuriwangiki niloko swi tikomba leswaku va swi tsakela, u nga ha dyi nkarhi vulavula ni vakulu. Loko va ri vahuweleri swi ta va endla va titwa va ri ni vutihlamuleri byo dzunisa Yehovha. Tsundzuka leswaku n’wana a nga boheki ku tiva swo tala hi ntiyiso ku fana ni vanhu lavakulu lava khuvuriweke ku ri kona a nga ta fanelekela ku va muhuweleri. Xana n’wana wa wena wa ti twisisa tidyondzo ta Bibele ta xisekelo? Xana u hanya hi nkongomiso wa Bibele wa mahanyelo? Xana wa swi tsakela ku huma nsimu ni ku tiviwa tanihi Mbhoni ya Yehovha? Loko swi ri tano, vakulu va nga ha vula leswaku wa faneleka ku va muhuweleri la nga khuvuriwangiki.—Vona buku leyi nge Ku Hleleriwa Ku Endla Ku Rhandza Ka Yehovha, matl. 79-82.
6. Ha yini ku nga ri ku tlanga hi nkarhi loko vatswari va letela vana va vona?
6 Ku dyondzisa vana leswaku va dzunisa Yehovha hi mbilu hinkwayo swi lava matshalatshala. Hambiswiritano, a ku na xo tsakisa ku fana niloko vatswari va vona vana va vona va endla nhluvuko hi tlhelo ra moya. Xa nkoka ngopfu, Yehovha wa tsaka loko vana va byela van’wana mintirho ya yena yo hlamarisa.