Letela Vana Va Wena Leswaku Va Chumayela
1. Xana Pisalema 148:12, 13 yi khutaza vatswari lava nga Vakreste leswaku va endla yini?
1 Yehovha u rhamba vantshwa leswaku va n’wi dzunisa. (Ps. 148:12, 13) Hikwalaho, vatswari lava nga Vakreste a va dyondzisi vana va vona ntiyiso wa Bibele ni milawu ya mahanyelo ntsena. Va tlhela va va letela leswaku va va vachumayeri va mahungu lamanene. Xana va nga va letela njhani loko va ri karhi va kula?
2. Xana xikombiso lexinene xa mutswari xi nga va khumba njhani vana va wena?
2 Va Vekele Xikombiso Lexinene: Muavanyisi Gidiyoni u byele vavanuna vakwe va 300 a ku: “Mi fanele mi dyondza hi ku languta mina.” (Vaav. 7:17) Hi ntumbuluko vana va tekelela vatswari va vona. Loko tatana un’wana la tirhaka nivusiku a vuya entirhweni hi Mugqivela nimixo, ematshan’weni yo etlela, u teka vana vakwe kutani a famba na vona evutirhelini bya nsimu hambiloko a karhele. Hi ku endla tano, u va dyondzisa leswaku ntirho wa nsimu hi wona lowu faneleke wu rhangisiwa. (Mat. 6:33) Xana vana va wena va ku vona u tsakile loko u endla swilo swo hambana-hambana swa moya, swo tanihi ku khongela, ku hlaya Bibele, ku hlamula ni ku chumayela? I ntiyiso leswaku a wu nge va vekeli xikombiso hi ndlela leyi hetisekeke. Kambe vana va wena va ta gandzela Yehovha hi ndlela leyi u va dyondziseke ha yona, loko va vona matshalatshala ya wena yo n’wi tirhela.—Det. 6:6, 7; Rhom. 2:21, 22.
3. Hi tihi tipakani ta moya leti vatswari va nga pfunaka vana va vona leswaku va tivekela tona ni ku ti fikelela?
3 Tivekele Tipakani: Vatswari va tikarhata leswaku va dyondzisa vana va vona ku famba, ku vulavula, ku ambala ni swin’wana. Loko va kula, va fanele va vekeriwa tipakani letintshwa. Loko vatswari va kona va ri Vakreste, va tlhela va pfuna vana va vona leswaku va tivekela tipakani ta moya ni ku ti fikelela hi ku ya hi malembe ni vuswikoti bya vona. (1 Kor. 9:26) Xana wa va dyondzisa vana va wena leswaku va hlamula hi marito ya vona ni leswaku va tilunghiselela tinkulumo ta Xikolo xa Vutirheli bya le Tilweni? (Ps. 35:18) Xana wa va pfuna leswaku va katseka eka swiyenge swo hambana-hambana swa vutirheli? Xana wa va pfuna leswaku va ta khuvuriwa naswona va ehleketa hi ntirho wa nkarhi hinkwawo? Xana wa va pfuna leswaku va tihlanganisa ni vahuweleri lava hisekelaka ntirho wo chumayela lava nga ta va khutaza?—Swiv. 13:20.
4. Xana vana va vuyeriwa njhani hi ku va ni vatswari lava sungulaka ku va dyondzisa leswaku va va vachumayeri va ha ri vatsongo?
4 Mupisalema u te: “Oho Xikwembu, u ndzi dyondzisile ku sukela evuntshweni bya mina ku ya emahlweni, ku fikela sweswi ndzi hambeta ndzi vulavula hi mintirho ya wena yo hlamarisa.” (Ps. 71:17) Sungula ku dyondzisa vana va wena va ha ri vatsongo leswaku va va vachumayeri. Ku va pfuna hi tlhelo ra moya va ha ri vatsongo swi ta va pfuna ni loko se kurile!—Swiv. 22:6.