Vatswari—Letelani Vana Va N’wina Ku Sukela Loko Va Ha Ri Tincece
1 “Letela mufana hi ndlela leyi nga yakwe; hambiloko a kurile a nge hambuki eka yona.” (Swiv. 22:6) Vatswari, loko mi lava leswaku vana va n’wina va nga “hambuki” endleleni ya ntiyiso, mi fanele ku sungula rini ku va letela? Mi fanele ku sungula loko va ha ri tincece!
2 Loko Pawulo a vula leswaku Timotiya u kume dyondzo ya moya ‘ku sukela loko a ha ri ricece,’ swi le rivaleni leswaku u dyondzisiwe ku sukela evuhlangini. (2 Tim. 3:14, 15) Hikwalaho ka sweswo, Timotiya u kule a va wanuna lonene wa moya. (Filp. 2:19-22) Vatswari, na n’wina mi fanele ku sungula ku letela vana va n’wina ‘ku sukela loko va ha ri tincece’ leswaku va ta kuma dyondzo leyi yi va faneleke leswaku va ta “kulela eka Yehovha.”—1 Sam. 2:21.
3 Va Wundle Hi Dyondzo Leyi Nga Ta Va Kurisa: Tanihi leswi swimilana swi lavaka ku tshama swi ri karhi swi cheletiwa leswaku swi ta va mirhi leyikulu, ni vana hi ku hambana-hambana ka vukhale bya vona va lava ku tshama va ri karhi va wundliwa hi ntiyiso wa Bibele leswaku va ta kula va va malandza ya Xikwembu lama wupfeke. Ndlela ya nkoka yo dyondzisa vana ntiyiso ni ku va pfuna leswaku va va ni vuxaka na Yehovha i ku dyondza Bibele tanihi ndyangu minkarhi hinkwayo. Kambe vatswari, xiyisisani ndlela leyi n’wana ha un’we a rhiyaka ndleve ha yona. Vana lavatsongo, va ta vuyeriwa swinene hi tidyondzo to tala leti komeke ku ri ni tidyondzo ti nga ri tingani leti leheke.—Det. 11:18, 19.
4 U nga tshuki u byi tekela ehansi vuswikoti bya vana va wena byo dyondza. Va rungulele matimu ya vanhu va le Bibeleni. Va byele ku mpfampfarhuta swifaniso swa swiendlakalo swa le Bibeleni kumbe va endla mintlango hi swiendlakalo swa le Bibeleni. Ti tirhise hi vutlhari tikhasete ta hina ta tivhidiyo ni leti ti yingisiwaka kunene, ku katsa ni ta tidrama ta le Bibeleni. Endla leswaku dyondzo ya ndyangu yi pfumelelana ni vukhale swin’we ni vuswikoti byo dyondza bya vana va wena. Ndzetelo wa le masungulweni wo va xisekelo, hikwalaho wu fanele ku nghenisiwa hakatsongo-tsongo; kambe loko n’wana a ri karhi a kula, ndzetelo wa wena wu ta ya wu andza naswona wu engeteleka. Endla leswaku ndzetelo wa Bibele wu hanya naswona ku nga dyondziwi nchumu wun’we. Vana va wena va fanele ‘ku hlakulela ku navela’ Rito, hikwalaho endla leswaku dyondzo yoleyo yi tsakisa hilaha u nga kotaka ha kona.—1 Pet. 2:2.
5 Endla Leswaku Va Katseka eVandlheni: Vekela vana va wena tipakani leti nga ta va pfuna leswaku va endla nhluvuko, leswaku va ta kota ku hlanganyela evandlheni hi ku helela. Xana pakani ya vona yo sungula yi nga va yihi? Vatswari van’wana lava nga ni vana vambirhi lava ha riki vatsongo va te: “Hi sungule ku va dyondzisa ku tshamiseka loko va ri eHolweni ya Mfumo.” Hi ku famba ka nkarhi, va pfune leswaku va hlamula hi marito ya vona eminhlanganweni, nileswaku va tivekela pakani ya ku tsarisa eXikolweni xa Vutirheli bya le Tilweni. Tipakani letinene leti va nga tivekelaka tona evutirhelini bya nsimu, ku nga va ku fambisela munhu xiphephana, ku hlaya tsalwa, ku fambisa magazini ni ku endla leswaku va burisana ni vini va miti hi ndlela leyi twisisekaka.
6 Vana Xikombiso Lexinene: Xana vana va wena va ku twa u vulavula naswona u khongela Yehovha siku ni siku? Xana va ku vona u dyondza Rito ra yena, u va kona eminhlanganweni, u ya ensin’wini naswona u tsakela ku endla ku rhandza ka Xikwembu? (Ps. 40:8) I swa nkoka leswaku va ku vona u endla tano naswona mi swi endla swin’we. Nhwanyana un’wana loyi sweswi se a kuleke, u vule leswi landzelaka hi mana wa yena loyi a kuriseke vana va tsevu kukondza va va Timbhoni leti tshembekeke: “Leswi swi hi tsakiseke ngopfu i xikombiso lexi Manana a hi vekeleke xona—mintirho ya yena a yi vulavula.” Mutswari la nga ni vana va mune u te: “Xiga lexi nge ‘hi fanele ku rhangisa Yehovha evuton’wini bya hina,’ a xi ngo va risimu ra chele kambe a ku ri ndlela leyi hi hanyaka ha yona.”
7 Vatswari, letelani vana va n’wina ku sukela loko va ha ri swihlangi, mi va dyondzisa ntiyiso lowu humaka eRitweni ra Xikwembu, mi va vekela tipakani leti nga ta va pfuna leswaku va endla nhluvuko naswona mi va swikombiso leswinene ngopfu eka vona. A mi nge tisoli hi sweswo!