Xana Vana Va Wena U Va Vekele Tipakani Tihi?
1 Ku humelela evuton’wini swi titshege hi ku veka ni ku fikelela tipakani ta nkoka. Lava landzelelaka tipakani leti nga vuliki nchumu kumbe leti nga riki ta ntiyiso va hetelela va khomisiwe tingana naswona va nga ti fikelelanga. Swi lava vutlhari ku twisisa leswaku hi swihi swikongomelo leswi u faneleke ku swi landzelela leswaku u “ta amukela vutomi bya xiviri.” (1 Tim. 6:19) Kunene ha nkhensa leswi Yehovha, hi ku tirhisa Rito rakwe ni nhlengeletano yakwe, a hi kombisaka kahle ndlela leyi hi faneleke ku famba ha yona!—Esa. 30:21.
2 Hi ku nyikela nkongomiso wo tano wa rirhandzu, Yehovha u vekela vatswari xikombiso lexinene. Ematshan’weni yo swi tshikela emavokweni ya vana va vona lava nga riki na ntokoto leswaku va hlawula ndlela leyinene, vatswari vo tlhariha va va dyondzisa hi ndlela leyi va faneleke ku famba ha yona, naswona loko va kurile, “[va] nga ka [va] nga hambuki.” (Swiv. 22:6) Vatswari va Vakreste va swi tiva hikwalaho ka ntokoto wa vona leswaku va nga ka va nga tshembi vulawuri bya vona vini; va fanele ku titshega hi Yehovha. (Swiv. 3:5, 6) Xilaveko lexi hi lexikulu ni le ka vana, lava nga riki na vutivi ngopfu ni ku pfumala ntokoto.
3 Vatswari va nga vekela vana va vona tipakani ta nkoka leti nga ta va pfuna ku langutisisa eka “leswi nga swinene ku tlula swin’wana.” (Flp. 1:10) Va nga ha sungula hi dyondzo ya ndyangu, va khutaza vana ku tlangela nkoka wa yona ni ku dyondza eka yona. I swinene eka vana leswaku va va ni mukhuva wo lunghiselela minhlangano ya vandlha ka ha ri emahlweni ni ku lunghekela ku hlamula hi marito ya vona vini. Ku hlanganyela entirhweni wo chumayela nkarhi na nkarhi i swa nkoka. Vana lavantsongo va nga hoxa xandla hi ku fambisa swiphephana, ku hlaya matsalwa kumbe ku fambisa timagazini. Loko va swi kota ku hlaya, ku tsarisa eXikolweni xa Vutirheli bya le Tilweni swi nga engetela nhluvuko wa vona wa moya. Ku faneleka tanihi muhuweleri la nga khuvuriwangiki kumbe ku fanelekela nkhuvulo i goza ra nkoka ro ya emahlweni.
4 Loko vana va vona va tshinelela malembe ya kondlo-a-ndzi-dyi, kumbe hambi loko va ha ri vantsongo, vatswari va fanele ku vulavula na vona hi ku kongoma malunghana ni pakani ya ntirho-vutomi. Vatsundzuxi va le xikolweni ni vadyondzi-kulobye va nga va kucetela hi ku olova leswaku va landzela tipakani ta misava ni swilo leswi vonakaka. Vatswari va fanele ku pfuna vana va vona leswaku va hlawula tidyondzo leti nga ta va nyika vuleteri lebyi faneleke, ti va hlomisela ku khathalela swilaveko swa vona swa nyama handle ko veka swilaveko swa Mfumo etlhelo. (1 Tim. 6:6-10) Va nga ha khutaziwa ku hlakulela “nyiko” (NW) ya ku titshamela-wexe ivi endzhakunyana, loko va kunguhata ku nghenela vukati, va ta swi kota ku sungula vutihlamuleri lebyo tika bya vukati. (Mt. 19:10, 11; 1 Kor. 7:36-38) Ku vulavula hi ndlela leyinene malunghana ni vuphayona, ku tirha laha xilaveko xi nga xikulu kona, ntirho wa le Bethele kumbe ntirho wa vurhumiwa swi nga khutaza vana hambi loko va ha ri vatsongo leswaku va va ni ku navela ku tirhisa vutomi bya vona hi ndlela leyi nga ta tsakisa Yehovha, yi vuyerisa van’wana ni ku va tisela mikateko.
5 A swi tiendlekeli ku va ni vantshwa vo tala lava hlayisaka mimpimanyeto leyi tlakukeke ya Vukreste ni ku landzela tipakani ta swa le tilweni enhlengeletanweni namuntlha. Ku humelela ko tala ka vona i mfanelo ya vatswari va rirhandzu. Loko u ri mutswari, xana vana va wena va vonaka va kongome kwihi? Xana va ya emahlweni hi laha ku humelelaka evuton’wini lebyi languteke swilaveko swa Mfumo? Tsundzuka, nchumu wun’we lowu nga wa nkoka swinene lowu u nga wu endlaka i ku nghenisa ntiyiso eka vana va wena ni ku vulavula ha wona masiku hinkwawo. U nga ha katekisiwa hi ndyangu lowu tirhelaka Yehovha hi ku tshembeka.—Det. 6:6, 7; Yox. 24:15.