Ntsako Lowu Tisiwaka Hi Vutirheli Bya Nkarhi Hinkwawo

¹ Tanihi muntshwa, handle ko kanakana u anakanyisise hi vumundzuku bya wena. Swivuriso 21:5 yi hi byela leswaku “makungu ya lava va gingiritekaka ma endla leswi pfunaka.” U ta pfuneka loko u anakanyisisa swinene hi tipakani ta wena evuton’wini. Loko u kunguhata vumundzuku bya wena, anakanyisisa hi ku nghenela ntirho wa nkarhi hinkwawo. Ha yini?

² Loko wo ya eka vanhu lava kuleke lava phayoneke va ha ri vantshwa kutani u va vutisa leswaku va titwa njhani hi leswi va swi endleke, u ta kuma leswaku hinkwavo va vula mhaka yin’we: “Wolowo wu ve nkarhi lowunene ngopfu evuton’wini bya mina!” Makwerhu loyi a tsakisiweke hi ntirho wa nkarhi hinkwawo ku sukela loko a ha ri jaha u vule leswi landzelaka endzhaku ka malembe: “Swa tsakisa swinene loko u anakanyisisa hi nkarhi wa vuntshwa bya wena kutani u kuma leswaku u yingise ndzayo ya vutlhari leyi nge: ‘Sweswi tsundzuka Mutumbuluxi wa wena Lonkulu emasikwini ya vujaha bya wena.’” (Ekl. 12:1) Swi lava leswaku wena ni vatswari va wena mi kunguhata ka ha ri sweswi leswaku u kuma ntsako wa muxaka wolowo wa ha ri jaha kumbe nhwana.

³ Vatswari, Va Khutazeni Ku Nghenela Ntirho Wa Nkarhi Hinkwawo: Tanihi Tatana wa rirhandzu, Yehovha u mi komba ndlela leyi mi faneleke mi famba ha yona. (Esa. 30:21) Hi ku tirhisa vukongomisi byo tano bya rirhandzu, u mi vekela xikombiso lexinene tanihi vatswari lava nga Vakreste. Ematshan’weni yo tshika vana va n’wina leswaku va tihlawulela ndlela leyi va rhandzaka ku famba ha yona, va dyondziseni ndlela leyi va faneleke va famba ha yona hi vutlhari loko va lava ku katekisiwa hi Yehovha. Kutani loko va kurile, ndlela leyi mi va dyondziseke ha yona yi ta va pfuna ku “hambanisa leswi lulameke ni leswi hoxeke.” (Hev. 5:14) Vanhu lava kuleke va swi tiva kahle leswaku a hi vutlhari ku tshemba mianakanyo ya vona; va fanele va titshega hi Yehovha leswaku a lulamisa tindlela ta vona. (Swiv. 3:5, 6) Xilaveko lexi i xikulu swinene eka vantshwa hikuva a va na ntokoto ngopfu evuton’wini.

⁴ Vatswari, loko vana va n’wina va tshinelela malembe ya kondlo-a-ndzi-dyi kumbe va ha ri vatsongo, vulavulani na vona hi ku kongoma malunghana ni tipakani ta vona. Vatsundzuxi va vana va xikolo, vadyondzisi ni vadyondzi-kulobye va ta ringeta ku va kucetela leswaku va hlongorisa swilo swa misava. Pfunani vana va n’wina ku hlawula tidyondzo leti nga ta va pfuna ku khathalela swilaveko swa vona swa nyama kambe va kota ku rhangisa timhaka ta Mfumo. (1 Tim. 6:6-11) Hakanyingi leswi nga va pfunaka leswaku va kota ku khathalela swilaveko swa vona ni ku phayona hi nkarhi lowu fanaka i ku kuma dyondzo ya xikolo xa le henhla ni/kumbe ku dyondzela ntirho wo karhi.

⁵ Khutazani vantshwa leswaku va nga hatli va nghenela vukati. Loko endzhaku va lava ku nghenela vukati, va ta kota ku byarha vutihlamuleri lebyi tikaka bya vukati. (Vona ndzimana 19 eka xiengetelo xa Vutirheli Bya Hina Bya Mfumo bya June 2001 lexi nge “Xana U Nga Tiendla U Va La Kumekaka?”) Vulavulani hi ndlela leyi akaka malunghana ni ntirho wa vuphayona, ku tirha laha xilaveko xi kuleke kona, ntirho wa Bethele ni wa vurhumiwa, mi pfuna vantshwa kumbe vana leswaku va navela ku hanya vutomi bya vona hi ndlela leyi tsakisaka Yehovha, leyi nga ta pfuna van’wana ni leyi nga ta va tisela ntsako.

⁶ Vantshwa, Rhangisani Ntirho Wa Nkarhi Hinkwawo: Vantshwa, a swi kali swi lava leswaku mi titshuva nhloko malunghana ni leswi ntirho wa vuphayona wu nga swona. Mi nga wu ringeta hi n’wexe hi ku nghenela vuphayona bya nkarhinyana loko swiyimo swi mi pfumelela hi nkarhi wo ya exikolweni ni loko xi pfarile. Kutani mi ta swi vona leswaku ntirho wa vuphayona wu tsakisa njhani! Ha yini mi nga kunguhati ku phayona nkarhinyana etinh’wetini leti taka?

⁷ Loko u ri makwerhu wa xinuna la ha riki muntshwa enhlengeletanweni ya Xikwembu, tlhela u anakanyisisa swinene hi ku lwela ku fanelekela ku va nandza wa vutirheli. (1 Tim. 3:8-10, 12) Nakambe, loko malembe ya wena ma pfumela, anakanyisisa hi loko u ta swi tsakela ku endla xikombelo xo ya tirha eBethele kumbe u ya eXikolweni xa Ndzetelo wa Vutirheli. Ntokoto lowu u nga ta wu kuma entirhweni wa vuphayona wu ta ku dyondzisa tidyondzo ta nkoka, to tanihi ndlela yo hanya hi ku namarhela xiyimiso, ku hleleka hi ndlela yo antswa, ku kota ku hanyisana ni van’wana ni ku tikarhatela ku byarha vutihlamuleri bya wena. Leswi hinkwaswo swi ta ku pfuna ku kota ku tamela malunghelo lamakulu endzhaku.

⁸ Nchumu wa nkoka lowu nga endlaka leswaku hi humelela entirhweni wa nkarhi hinkwawo i ku va ni moya wa ku hisekela timhaka ta swa le tilweni. Muapostola Pawulo u hi khutaze leswaku hi va ni langutelo ro tano, a tlhela a kombisa mikateko ya kona: “Xin’wana ni xin’wana lexi mi xi endlaka, xi endleni hi moya-xiviri hinkwawo kukota loko mi xi endlela Yehovha, . . . hikuva ma swi tiva leswaku eka Yehovha hi kona laha mi nga ta amukela hakelo leyi faneleke ya ndzhaka.” (Kol. 3:23, 24) Onge Yehovha a nga ku katekisa hi ku endla leswaku u kuma ntsako lowukulu entirhweni wa nkarhi hinkwawo!