“U Nga Va Phayona Lerinene!”
1. Xana makwerhu un’wana wa xisati a a titwa njhani hi ntirho wakwe wa vuphayona?
1 Kathe B. Palm u tshame a ku: “A ku na ntirho wun’wana lowu a wu ta ndzi pfuna leswaku ndzi eneriseka kumbe ku endla leswaku ndzi vuyeriwa hi tlhelo ra moya.” U hete makume ya malembe a phayona emakun’wini ya le Chile, South America ni le matikweni man’wana. Kumbexana munhu un’wana u tshame a ku byela a ku: “U nga va phayona lerinene,” loko a ehleketa hi ndlela leyi maphayona ma tiphinaka ha yona.
2. Ha yini hi kuma ku eneriseka ka xiviri loko hi endla mintirho ya moya?
2 Vutomi Lebyi Enerisaka: Yesu la nga xikombiso xa hina u kume ku eneriseka ka xiviri hi ku endla ku rhandza ka Tata wakwe. (Yoh. 4:34) Kutani a a tiyisile loko a byela valandzeri vakwe leswaku munhu u kuma ku eneriseka ka xiviri loko a endla mintirho leyi fambisanaka ni vugandzeri bya Yehovha. Ha eneriseka loko hi endla mintirho leyi Yehovha a yi amukelaka. Ku engetela kwalaho, loko hi nyikela hi nkarhi wa hina wo tala, matimba ni rifuwo ra hina leswaku hi pfuna van’wana, hi ya hi tsaka swinene.—Mint. 20:31, 35.
3. I yini leswi hi nga tiphinaka ha swona loko hi heta nkarhi wo tala ensin’wini?
3 Loko hi ya hi heta nkarhi wo tala ensin’wini, hi ta tiphina hi ku sungula tidyondzo ta Bibele ni ku ti fambisa. Hambiloko vini va miti va nga tsakeli, loko hi ya hi va ni ntokoto naswona hi va ni vuswikoti ensin’wini, hi nga sungula ku swi xiya leswaku nsimu ya hina yi ni vanhu vo tala lava tsakelaka ku tlula ndlela leyi a hi yi teka ha yona eku sunguleni. Maphayona ma nga tirhisa dyondzo leyi ma yi kumeke loko ma ri eXikolweni xa Ntirho wa Vuphayona endzhaku ka loko se ma hete nkarhi wa kwalomu ka lembe ma phayona. (2 Tim. 2:15) Loko hi tiyisela, hi va hi ri eku byaleni ka timbewu ta ntiyiso leti nga ta veka mihandzu enkarhini lowu taka.—Ekl. 11:6.
4. I yini leswi vantshwa lava nga ekusuhi ni ku heta xikolo va faneleke va anakanyisisa ha swona?
4 Vantshwa: Xana se ma swi tiva leswi mi nga ta swi endla endzhaku ko pasa ntangha khume? Sweswi ntirho wa n’wina wa xikolo hi wona lowu mi pimelaka leswi mi faneleke mi swi endla. Xana mi ta wu tirhisela yini nkarhi lowu a mi wu tirhisela ku endla ntirho wa xikolo? Ematshan’weni yo heta nkarhi wo tala entirhweni wo tihanyisa, kumbexana mi nga khongela hi mhaka yo tivekela pakani yo va maphayona ya nkarhi hinkwawo. Vuphayona byi ta mi pfuna vutomi bya n’wina hinkwabyo hikuva mi ta dyondza ku chumayela vanhu va mindhavuko yo hambana-hambana, ku hlula swiphiqo swa munhu hi yexe, ku hlakulela ku tikhoma ni ku antswisa vuswikoti bya n’wina byo dyondzisa.
5. Xana vatswari swin’we ni vandlha va nga wu khutaza njhani ntirho wo phayona?
5 Vatswari, xana ma va pfuna vana va n’wina leswaku va tivekela tipakani to va maphayona ya nkarhi hinkwawo? Leswi mi swi vulaka ni xikombiso xa n’wina lexinene swi nga va pfuna leswaku va rhangisa timhaka ta Mfumo. (Mat. 6:33) Ray la sunguleke ku phayona loko a heta ntangha khume u ri: “Nkarhi hinkwawo Manana a a ndzi byela leswaku vuphayona byi endla leswaku munhu a hanya vutomi lebyi enerisaka.” Hinkwavo evandlheni va nga endla leswaku ntirho wo phayona wu tekiwa wu ri wa nkoka hikwalaho ka leswi va swi vulaka ni nseketelo lowu va wu kombisaka. Jose wa le Spain u ri: “Vandlha ra ka hina a ri teka ntirho wo phayona wu ri ntirho lowunene lowu vantshwa va nga wu endlaka. Leswi a va swi vula ni ndlela leyi a va wu tlangela ha yona swin’we ni nseketelo wa vona, swi endle leswaku swi ndzi olovela ku sungula ku phayona.”
6. I yini leswi hi nga swi endlaka loko sweswi hi vona onge a hi nge swi koti ku va maphayona?
6 Ku Hlula Swihinga: Kambe ku vuriwa yini loko u tibyela leswi, ‘A ndzi swi naveli ku va phayona.’ Loko ku ri hileswaku leyi hi yona ndlela leyi a wu titwa ha yona eku sunguleni, khongela eka Yehovha u n’wi byela ndlela leyi u ti twaka ha yona u ku, ‘A ndzi tshembi leswaku ndzi nga swi kota ku phayona kambe ndzi lava ku endla leswi ku tsakisaka.’ (Ps. 62:8; Swiv. 23:26) Kutani lava nkongomiso wakwe eRitweni rakwe ni le nhlengeletanweni yakwe. Maphayona yo tala ma rhange hi ku ‘nantswa’ vuphayona hi ku va maphayona ya nkarhinyana, naswona ntsako lowu ma veke na wona wu ma susumetele ku va maphayona ya nkarhi hinkwawo.—Ps. 34:8.
7. Hi nga ku hlula njhani ku kanakana loku hi nga na kona leswaku hi kota ku fikelela tiawara ta 70 leti lavekaka?
7 Ku vuriwa yini loko u nga tiyiseki loko u ta swi kota ku fikelela tiawara leti lavekaka ta 70? Ha yini u nga vulavuli ni maphayona lama nga eka swiyimo leswi fanaka ni swa wena? (Swiv. 15:22) Kumbexana endzhaku ka sweswo u nga titsalela swiyimiso swo hlayanyana. U nga ha swi xiya leswaku ku tixavela nkarhi wa nsimu eka mintirho leyi nga riki ya nkoka swa olova ku tlula ndlela leyi a wu ehleketa ha yona eku sunguleni.—Efe. 5:15, 16.
8. Ha yini hi fanele hi tshamela ku kambisisa swiyimo swa hina?
8 Tlhela U Kambela Swiyimo Swa Wena: Swiyimo swa munhu swi tshama swi ri karhi swi cinca. I swa nkoka ku tshamela ku kambela swiyimo swa wena. Hi xikombiso, xana u le kusuhi ni ku huma penceni entirhweni wa wena? Randy la nga hatla a huma u ri: “Xiboho lexi xi ndzi pfune leswaku ndzi sungula ku phayona swin’we ni nsati wa mina, naswona xi endle leswaku swi hi olovela ku ya tirha laha ku nga ni xilaveko lexikulu. Ndzi kume mikateko yo tala hikwalaho ka xona, kambe nkateko lowu yi tlulaka hinkwayo i ku va ni ripfalo lerinene.”
9. I yini leswi mimpatswa yi faneleke yi swi kambisisa?
9 Endzhaku ko kambela swiyimo swa yona hi vukheta, mimpatswa yin’wana yi xiye leswaku a swi bohi leswaku havambirhi va tirha. I ntiyiso leswaku leswi swi nga ha koxa leswaku ndyangu wu olovisa vutomi bya wona, kambe a wu nge pfuki wu tisorile hi ku endla tano. John, loyi nsati wakwe a ha ku tshikaka ntirho leswaku a va phayona, u ri: “A ku na lexi ndzi tsakisaka ku tlula ku tiva leswaku nsati wa mina u tshama a khomekile entirhweni wa Yehovha.”
10. I yini leswi susumetaka Vakreste leswaku va anakanyisisa hi ntirho wa vuphayona?
10 Xikombiso Xa Rirhandzu Ni Ripfumelo: Yehovha u endle leswaku ntirho wo chumayela ku va wona wa nkoka lowu hinkwerhu hi nga wu endlaka. Ku nga ri khale mafambiselo lawa ya swilo ma ta lovisiwa naswona ku ta ponisiwa ntsena lava vitanaka vito ra Yehovha. (Rhom. 10:13) Loko hakunene hi n’wi rhandza hi timbilu hinkwato naswona hi swi tlangela leswi a hi endleleke swona, hi ta susumeteleka ku yingisa xileriso xa N’wana wakwe xo chumayela hi ku hiseka. (Mat. 28:19, 20; 1 Yoh. 5:3) Ku engetela kwalaho, ku pfumela leswaku hi hanya eminkarhini ya makumu swi ta hi susumetela ku tirhisa nkarhi lowu nga sala leswaku hi tinyiketela swinene entirhweni wo chumayela, ematshan’weni yo tirhisa misava leyi hi xitalo.—1 Kor. 7:29-31.
11. Hi fanele hi swi teka njhani loko munhu un’wana a hi byela leswaku hi nga va maphayona lamanene?
11 Ku va phayona ra nkarhi hinkwawo a hi ku fikelela ntsena tiawara leti nhlengeletano yi ti lavaka; kambe i xikombiso xa ku tinyiketela ka hina eka Xikwembu. Kutani loko munhu un’wana a ku byela leswaku u nga va phayona lerinene, swi teke tanihi xikhutazo. Kutani anakanyisisa u tlhela u khongelela leswaku na wena u nghenela ntirho lowu enerisaka lowu vo tala se va nga eku wu endleni.
[Marito lama tshahiweke exihlokweni lama nga eka tluka 4]
Vatswari, xana ma va pfuna vana va n’wina leswaku va tivekela tipakani to va maphayona ya nkarhi hinkwawo?
[Marito lama tshahiweke exihlokweni lama nga eka tluka 5]
Yehovha u endle leswaku ntirho wo chumayela ku va wona wa nkoka lowu hinkwerhu hi nga wu endlaka.