Lowu I Nkarhi Wo Chumayela!
1. Ha yini lowu wu ri nkarhi wo chumayela?
1 “Chavani Xikwembu mi xi vangamisa.” Rungula leri ri karhi ra twarisiwa ehansi ka nkongomiso wa tintsumi eka “matiko hinkwawo ni tinyimba hinkwato ni tindzimi hinkwato ni vanhu hinkwavo.” Ha yini? “Hikuva nkarhi wa ku avanyisiwa hi [Xikwembu] wu fikile.” Namuntlha, hi hanya ‘enkarhini wolowo wa ku avanyisiwa,’ lowu nga ta chaputa loko ku lovisiwa mafambiselo lawa ya swilo. I swa nkoka leswaku vanhu va ‘gandzela Loyi a endleke tilo ni misava ni lwandle ni minseledyana ya mati.’ A ku na ntirho wun’wana lowu endliwaka namuntlha lowu nga wa nkoka ku fana ni lowa ku twarisa “mahungu lamanene lama nga heriki.” Ina, lowu i nkarhi wo chumayela!—Nhlav. 14:6, 7.
2. Xana malandza ya Yehovha ma swi kombisa njhani leswaku ma wu tiva nkarhi lowu hi hanyaka eka wona?
2 Eka malembe ya khume lama hundzeke, malandza ya Yehovha ma hete tiawara ta 12 wa tibiliyoni entirhweni wo chumayela hi Mfumo ni ku endla vadyondzisiwa. Vo tala va tshike ku endla swo karhi evuton’wini bya vona leswaku va kota ku heta nkarhi wo tala entshovelweni wa moya. (Mat. 9:37, 38) Hi xikombiso, n’wexemu, eka n’hweti yin’wana ni yin’wana ku ve ni vahuweleri va 850 000 hi xiringaniso lava veke maphayona. Eka lava nga maphayona ya nkarhi hinkwawo, va fanele va heta tiawara ta 70 hi xiringaniso n’hweti yin’wana ni yin’wana va ri entirhweni wo chumayela. Kasi eka lava nga maphayona ya nkarhinyana, ku laveka tiawara ta 50.
3. Hi kwihi ku cinca loku vahuweleri va faneleke va ku endla leswaku va ta kota ku phayona?
3 Leswi Lavekaka Leswaku U Va Phayona: Leswi maphayona ma swi tivaka leswaku “nkarhi lowu seleke wu komile,” ma tikarhatela ku hanya vutomi byo olova. (1 Kor. 7:29, 31) Ma kuma tindlela to hunguta swilo leswi dyaka mali leswaku ma nga ha heti nkarhi wo tala entirhweni wa ku tihanyisa. Hi xikombiso, man’wana ma rhurhele etindlwini letitsongo. Man’wana ma xavise swilo swa wona leswi ma nga kotaka ku hanya hambi ma nga ri na swona. (Mat. 6:19-21) Hakanyingi ma boheka ku tshika ku hlongorisa swilo leswi vonakaka. Hinkwaswo leswi ma swi endlela leswaku ma ta kota ku heta nkarhi wo tala ma ri ensin’wini. (Efe. 5:15, 16) Hikwalaho ko phikelela leswaku va rhangisa swilaveko swa van’wana ni ku titshega hi Yehovha hi xikhongelo, vahuweleri vo tala va kote ku hlela xiyimiso lexinene lexi va pfunaka leswaku va kota ku phayona.
4. Hi wahi magoza lawa u nga ma tekaka lama nga ku pfunaka leswaku u kota ku fikelela pakani ya wena yo phayona?
4 Xana u nga va phayona? Ha yini u nga vutisi maphayona lawa swi ma fambelaka kahle, leswaku wona ma swi endlisa ku yini? Tirha na wona nsimu, hi ndlela yoleyo u ta tiphina ku fana na wona. Hlaya swihloko leswi vulavulaka hi vuphayona leswi nga etibukwini ta nhlengeletano. Tivekele tipakani letinene leti nga ta ku pfuna leswaku u hetelela u ri phayona. Loko ku ri ni swihinga leswi ku sivelaka ku phayona, swi chululele eka Yehovha hi xikhongelo, u tlhela u n’wi kombela leswaku a ku pfuna u swi hlula.—Swiv. 16:3.
5. Vuphayona byi hi pfuna njhani ku antswisa vuswikoti bya hina ensin’wini?
5 Ntsako Ni Mikateko: Vuphayona byi antswisa vuswikoti bya hina byo tirhisa Rito ra Xikwembu, ku nga mhaka leyi hi nyikaka ntsako lowukulu. Nhwanyana un’wana la nga phayona u te: “I nkateko lowukulu eka mina leswi ndzi kotaka ku tamela Rito ra Xikwembu khwatsi. Phela, loko u phayona, u yi tirhisa ngopfu Bibele. Sweswi loko ndzi famba hi yindlu ni yindlu, ndzi kota ku tsundzuka matsalwa lawa ma fanelaka munhu loyi ndzi vulavulaka na yena.”—2 Tim. 2:15.
6. Vuphayona byi n’wi dyondzisa yini munhu?
6 Vuphayona byi tlhela byi hi dyondzisa tindlela to tala to antswisa mahanyelo ya hina. Byi nga pfuna vantshwa ku dyondza ndlela yo tirhisa nkarhi wa vona hi vutlhari, ndlela yo hlayisa mali, hambi ku ri ku hanyisana ni van’wana. Vo tala byi va endla va kula hi tlhelo ra moya. (Efe. 4:13) Ku tlula kwalaho, maphayona ma tala ku va ni lunghelo ro vona ndlela leyi Yehovha a ma pfunaka ha yona.—Mint. 11:21; Filp. 4:11-13.
7. Xana vuphayona byi hi pfunisa ku yini leswaku hi tshinela eka Yehovha?
7 Nkateko wun’wana lowukulu ngopfu lowu vuphayona byi hi pfunaka ha wona i ku hi tshineta eka Yehovha. Leswi swi nga hi tiyisa loko hi langutana ni miringo. Makwerhu wa xisati la tiyiseleke miringo yo tika u te: “Vuxaka bya mina na Yehovha lebyi ndzi byi tiyiseke hi ku phayona byi ndzi pfune ku tiyisela miringo yoleyo hinkwayo.” U tlhele a ku: “Ndza tsaka swinene leswi ndzi heteke malembe ya mina ya vutswatsi ndzi tirhela Yehovha entirhweni wa nkarhi hinkwawo. Ma ndzi pfune ku tinyiketela ku endla ntirho lowu a ndzi nga lorhi ni leswaku ndzi ta wu kota.” (Mint. 20:35) Onge na hina hi nga tiphina hi mikateko leyi yo tala loko hi ri karhi hi endla hinkwaswo leswi hi nga swi kotaka entirhweni wo chumayela lowu nga wa nkoka ngopfu.—Swiv. 10:22.