Xana U Nga Nghena Hi “Nyangwa Leyikulu Leyi Yisaka eNtirhweni”?
1. Hi yihi “nyangwa leyikulu leyi yisaka entirhweni” leyi hi pfulekeleke?
1 Loko muapostola Pawulo a pfuleriwe “nyangwa leyikulu leyi yisaka entirhweni,” u hisekele ku tirhisa nkarhi lowu a nga na wona leswaku a chumayela rungula ra Mfumo hambiloko ku ri ni vakaneti vo tala. (1 Kor. 16:9) Namuntlha vahuweleri va Mfumo va kwalomu ka 642 000 emisaveni hinkwayo va nghene hi nyangwa leyikulu ya ntirho, hi ku va va nghenela vuphayona bya nkarhi hinkwawo.
2. Ha yini swi ri swinene ku tshamela ku kambisisa xiyimo xa hina?
2 Swiyimo Swa Cinca: Hambileswi swiphiqo leswi hi nga na swona sweswi swi nga ha hi endlaka hi nga koti ku tirha nsimu nkarhi wo leha, swiyimo swa cinca. Hikwalaho, i swinene leswaku hi tshama hi ri karhi hi kambisisa xiyimo xa hina vini naswona hi nga yimeli leswaku swiyimo swi va swinene. (Ekl. 11:4) Xana u muntshwa la nga ekusuhi ni ku heta xikolo? Xana u mutswari la nga ni vana lava nga ta sungula ku nghena xikolo ku nga ri khale? Xana u le kusuhi ni ku tshika ntirho? Ku cinca koloko ku nga ha ku nyika nkarhi wo tala lerova u kuma nkarhi wo va phayona ra nkarhi hinkwawo. Makwerhu wa xisati loyi a nga tshama a karhatiwa hi mavabyi u endle xiboho xo va phayona loko a ri ni malembe ya 89 hi vukhale. Ha yini? Leswi se a ku hundze lembe a nga si boheka ku ya exibedlhele, u vone leswaku rihanyo ra yena ri ta n’wi pfumelela ku phayona.
3. Xana van’wana va swi cince njhani swiyimo swa vona leswaku va ta kota ku va maphayona ya nkarhi hinkwawo?
3 Emhakeni ya Pawulo, eku sunguleni xikongomelo xa yena a ku ri ku endzela vamakwerhu va le Korinto. Kambe u cince leswi a a kunguhate swona hikwalaho ka mahungu lamanene. Vo tala lava nga maphayona ya nkarhi hinkwawo namuntlha, va boheka ku cinca swo tala leswaku va kota ku phayona. Van’wana va olovise vutomi bya vona lerova swi lava leswaku va tirha ntirho wa nkarhinyana ntsena leswaku va kota ku hakelela swilo swo tihanyisa leswi nga ha laviki mali yo tala. Va tiphinile hi lunghelo ra ntirho leri va nga na rona. (1 Tim. 6:6-8) Vatekani van’wana va cince swo karhi evuton’wini bya vona leswaku ku tirha nuna ntsena kutani nsati a va phayona.
4. Xana hi nga endla yini loko hi nga tiyiseki leswaku hi ta ti fikelela tiawara leti lavekaka?
4 U nga hatliseli ku tibyela leswaku a wu nge phayoni hikwalaho ko chava leswaku a wu nge swi koti ku fikelela tiawara leti lavekaka. Ko laveka ntsena tiawara to tlula timbirhi hi siku. Loko u nga tiyiseki leswaku u nga swi kota ku ti fikelela, ringeta ku va phayona ra nkarhinyana ku ringana n’hweti kumbe timbirhi kambe xikongomelo xa wena ku ri ku fikelela pakani ya tiawara ta 70. Leswi swi ta ku pfuna leswaku u titwisa ntsako lowu u wu kumaka hi ku va phayona. (Ps. 34:8) Bula ni lava va nga maphayona. Swi nga ha endleka va hlule swiphiqo leswi fanaka ni swa wena. (Swiv. 15:22) Kombela Yehovha leswaku a katekisa matshalatshala ya wena yo ndlandlamuxa ntirho wa wena wo chumayela.—1 Yoh. 5:14.
5. Ha yini ku va phayona ra nkarhi hinkwawo ku nga ri ku tlanga hi nkarhi?
5 A Hi Ku Tlanga Hi Nkarhi: Ku va phayona ra nkarhi hinkwawo swi tisa mikateko yo tala. Swi ku pfuna leswaku u kuma ntsako lowukulu hikwalaho ka ku hanana ka wena hi mbilu hinkwayo. (Mint. 20:35) Vuphayona byi ta antswisa vuswikoti bya wena byo ri tamela khwatsi Rito ra Xikwembu leri nga ntiyiso. (2 Tim. 2:15) Byi ta ku pfuna ku vona tindlela to tala leti Yehovha a ku pfunaka ha tona. (Mint. 11:21; Filp. 4:11-13) Nakambe ku phayona swi ta ku pfuna leswaku u va ni timfanelo ta moya, to tanihi ku tiyisela naswona swi ta ku tshineta ekusuhi na Yehovha. (Yak. 4:8) Xana u nga nghena hi nyangwa leyi leyikulu ya ntirho, hi ku va phayona ra nkarhi hinkwawo?