Ku Laveka Vamakwerhu Va Xinuna Lava Engetelekeke Entirhweni Wa Vuphayona

¹ Pawulo u hi tsundzuxe ku “tirhela Hosi masiku hinkwawo.” (1 Kor. 15:58) Eka vo tala, leswi swi vula ku nghenela ntirho wa vuphayona. Eka lembe ra ntirho leri hundzeke, vanhu vo tlula 800 va engetelekile eka maphayona ya Afrika Dzonga ntsena!

² Enkarhini wa sweswi nhlayo leyikulu ya lava nga maphayona etikweni leri i vamakwerhu va xisati. (Ps. 68:11) Mawaku ntsako lowu wu nga ta va kona evandlheni loko vamakwerhu vo tala va xinuna vo nghenela vuphayona bya nkarhi hinkwawo! (Ps. 110:3) I ntiyiso leswaku vamakwerhu vo tala va ni mintirho yo tihanyisa ni vutihlamuleri bya ndyangu. Van’wana va tirha hi matimba leswaku va khathalela swilaveko swa moya swa vandlha. Ha va tlangela vavanuna lava lava tirhaka hi matimba hikwalaho ka Mfumo.—1 Tim. 4:10.

³ Hambiswiritano, xana vunyingi bya n’wina vamakwerhu mi nga swi kota ku nghenela ntirho wa vuphayona? Loko nsati wa wena a ri phayona, xana u nga n’wi joyina? Loko u wise ku tirha, xana a wu nge pfumeli leswaku a ku na ndlela yin’wana leyi enerisaka leyi u nga tirhisaka nkarhi wa wena ha yona ku tlula evutirhelini bya nkarhi hinkwawo? Loko u ri eku hetiseni xikolo nan’waka, xana u khongelele ku teka ntirho wa vuphayona tanihi goza ro sungula ra malunghelo lama engetelekeke ya vutirheli?—Ef. 5:15-17.

⁴ Makwerhu un’wana wa xinuna u xavise bindzu rakwe leri vuyerisaka swinene ivi a tirha ntirho wa nkarhinyana leswaku a ta kota ku phayona. Hikwalaho ka vurhangeri bya yena lebyinene, vana vakwe vanharhu eka lava mune va ve maphayona loko va ha ku heta xikolo. Lowa vumune a hisekela ku byi nghenela. Makwerhu loyi ni ndyangu wakwe va katekisiwe ngopfu.

⁵ Nyangwa Lowukulu Wu Pfulekile: Ntirho wa vuphayona wu nga pfula “nyangwa ya ntirho lowo saseka.” (1 Kor. 16:9) Vamakwerhu va xinuna lava nga maphayona va nga tirhisiwa swinene evandlheni. Ku hisekela ka vona nsimu swi engetela ku kula ka vona emoyeni ni ku hoxa xandlha eka nhluvuko wa vona wa swa le tilweni. Vuphayona byi nga pfula ndlela yo kuma malunghelo lama engetelekeke ya ntirho. Loko u heta lembe ro sungula u ri karhi u phayona, ku na nkateko wa ku nghena eXikolweni xa Ntirho wa Vuphayona. Malandza ya vutirheli ni vakulu lava titshameleke voxe va nga fanelekela ku ya eXikolweni xa Ndzetelo wa Vutirheli. Mimpatswa leyi tekaneke leyi fanelekaka yi nga endla xikombelo xa ku ya eXikolweni xa Gilead. Vamakwerhu va xinuna eku heteleleni va nga fanelekela ntirho wo famba-famba. Ina, vutirheli bya vuphayona byi pfula nyangwa wo ya emalunghelweni lawa lamakulu ya ntirho enhlengeletanweni ya Yehovha.

⁶ Vamakwerhu va xinuna lava nga nghenelaka ntirho wa vuphayona bya nkarhi hinkwawo va nga kuma ntsako lowukulu lowu tisiwaka hi ku hanana loku engetelekeke.—Mint. 20:35.