Xana U Nga Tirhela Yehovha Tanihi Phayona?
1 ENtsombanweni wa hina wa Muganga wa “Vabyarhi Va Ku Vonakala” lowu hi veke na wona, xivulavuri xi vutisile xi ku: “Xana u nga swi kota ku phayona? Xana u ta phayona?” Xi boxe leswaku swivutiso leswi i swa nkoka hikuva Armagedoni yi le kusuhi swinene, naswona leswi swi endla leswaku ntirho wa ku chumayela wu va wa xihatla ku tlula rini na rini.—1 Kor. 7:29a.
2 A swi kanakanisi leswaku vuphayona i ntirho wo tika. Wu lava ku tilaya ni ku hleleka kahle. Kambe, ntirho wa hina ‘a wu nge weli ehansi.’ (1 Kor. 15:58) Xana leswi swi nga vuriwa eka mintirho yin’wana leyi hi nga hlawulaka ku yi endla ni leyi yi hetaka nkarhi ni matimba ya hina? Ku rhandza Yehovha ku susumeta Vakreste leswaku va hiseka entirhweni wa yena, naswona ku hisekela ntirho wa Yehovha ku nghenise vo tala entirhweni wa vuphayona.—1 Yoh. 5:3; Nhlav. 4:11.
3 Malandza yo tala lamatsongo ya Yehovha lama ha ku hetaka xikolo xa le henhla ma ehleketisisa hi vuphayona. Swi fanerile hakunene. Hi wihi ntirho-vutomi wun’wana lowu nga wa nkoka swinene ku tlula vutirheli bya nkarhi hinkwawo? (Mt. 6:33) Mahungu lamanene ya Mfumo wa Xikwembu ma fanele ku chumayeriwa; lowu i ntirho wa Yehovha naswona i lunghelo lerikulu swinene ku wu endla ku sukela evuntshweni bya wena!—Mt. 24:14.
4 Xana n’wina vatswari ma va khutaza vana va n’wina leswaku va nghenela ntirho wa nkarhi hinkwawo? Xana vana va n’wina va swi vona leswaku mi lava timbilu, moya-xiviri, mianakanyo ni matimba hinkwawo ya vona leswaku swi va entirhweni lowu wo hlawuleka? (Mar. 12:30) Vahuweleri vo tala lavatsongo va tilunghisela ntirho wa vuphayona bya nkarhi hinkwawo hi ku nghenela ntirho wa vuphayona bya nkarhinyana nkarhi wun’wana ni wun’wana loko va ha ri exikolweni. Hakunene ku tinyiketela koloko eka Yehovha ku tsakisa mbilu ya yena!—Swiv. 27:11.
5 Kavula, a hi hinkwerhu lava hi nga ni swiyimo leswi swi hi pfumelelaka ku endla ntirho wa vuphayona. Hambi swi ri tano, ku nga khathariseki leswaku u nghenele vukati kumbe u tshama wexe, kumbe u ntsongo kumbe u kurile hi malembe, xana u tshame u anakanya hi ku khongelela ku tirhela Yehovha tanihi mutirheli wa mahungu lamanene loyi a nga phayona? (Kol. 3:23) Vatekani vo tala lava ha riki vantshwa va tikarhatela ku kurisa vutirheli bya vona leswaku un’we a kota ku phayona kumbe va phayona hinkwavo.
6 Loko sweswi u nga ta swi kota ku phayona nkarhi hinkwawo, xana u nga kota ku phayona nkarhinyana? Kumbexana vahuweleri vo tala evandlheni ra n’wina va kunguhata ku phayona nkarhinyana hi April. Xana u nga hlanganyela na vona? Hambi leswi malandza ya Yehovha hinkwawo yo tshembeka ma kumaka mikateko yo tala, mikateko leyi engetelekeke yi ta kumiwa hi lava va nga exiyin’weni xa ku heta nkarhi lowu engetelekeke entirhweni wa Mfumo, va lavisisa lava fanaka ni tinyimpfu.—Mint. 20:35.