Chumayela Hi Ndlela Ya Xikwembu Ya Ku Rhula Ni Nsirhelelo
1 Vanhu va endle makungu yo tala ya ku rhula ni nsirhelelo, kambe a ma kona lama enetaka swilaveko leswikulu swa vanhu emisaveni hinkwayo. Hambi leswi rivengo ra vukhongeri, ra rixaka ni ra matiko swin’we ni makungu ni makwanga ya politiki, swi vonakaka swi ri swihinga leswikulu swa misava leyi nga ni nsirhelelo ni ku rhula, Vakreste va ntiyiso va swi tiva leswaku swihinga leswikulu i Sathana Diyavulosi ni ku ala ka munhu ku titsongahata eka Yehovha Xikwembu.—Ps. 127:1; Yer. 8:9; 1 Yoh. 5:19.
2 Hi January, hi ta ringeta ku pfuna vaakelani va hina va vona leswaku ndlela ya Xikwembu ya ku rhula ni nsirhelelo hi yona ntsena ni leswaku Yehovha u ni murhi lowukulu wa swiphiqo swa vanhu.
3 Ku Tirhisa Buku Leti Fambisiwaka: Hi nga avela van’wana rungula leri akaka hi ku tirhisa tibuku leti fambisiwaka hi January. Ntiyiso Lowu Yisaka eVuton’wini Lebyi Nga Heriki na Xana Vutomi Lebyi Byo Va Na Sweswi Ntsena? Tibuku leti ti ta fambiseriwa vanhu hi nxavo lowu hungutiweke wa R1,00 yin’we. Buku yin’wana ni yin’wana ya khale ya matluka ya 192 leyi humesiweke emahlweni ka 1980 yi nga ha fambisiwa na yona. (Hi kombela mi xiya: Hi tindzimi tin’wana ku nga ha va ku fambisiwa tibuku leti hambaneke. Hi kombela mi languta eswitivisweni swa ririmi ro karhi leswa-ku mi vona tibuku leti faneleke ku fambisiwa.)
4 Timiliyoni ta vanhu namuntlha ti ni gome, naswona ti langutele nkarhi wa ku hanyisiwa ni wa ku rhula, nsirhelelo ni ntshamiseko wa ntiyiso. Buku leyi nge Ntiyiso yi ve xihlovo xa ntiyiso xa xikhutazo eka vanhu vo tala ku tlula malembe ya 20. Ku rhula ka ntiyiso ni nsirhelelo hi nga ku kuma eka xihlovo xin’we, Yehovha Xikwembu. Tanihi leswi Yehovha a nga xihlovo xin’we xa ku rhula ka ntiyiso, vanhu va fanele va “tlhandlukela e nṭhav̌eni ya Yehova” kutani va leteriwa hi tindlela ta yena. (Mik. 4:2, 3) Buku leyi yi ta pfuna vanhu va timbilu letinene leswaku va tiva ndlela leyi Yehovha, hi Mfumo wakwe, a nga ta tisa ha yona ku rhula ni nsirhelelo lowu nga heriki emisaveni leyi.
5 Vanhu vo tala va tivutisa loko matshalatshala lama endliwaka sweswi ya ku rhula ma ta humelela. Buku leyi nge Ntiyiso yi nga va chavelela hi vutivi bya leswaku Xikwembu xi ta tisa ku rhula loku nga heriki evanhwini. Xikongomelo xa xona hi misava a xi pfumeleli leswaku vanhu va lovisa misava. Ndlala, vusweti ni ku kala makaya i swiphiqo swa siku na siku swa timiliyoni ta vanhu va tiko leri. Buku leyi nge Ntiyiso yi komba nhlamulo ya ntiyiso ya swiphiqo leswi. Ku kala nsirhelelo ka munhu hi xiyexe hikwalaho ka vugevenga lebyi andzaka swi endla vo tala va titwa va ri mahlonga emakaya ya vona. Buku leyi nge Ntiyiso yi kombisa murhi lowu nyikeriwaka hi Matsalwa.
6 Mahanyelo ya manguva lawa, ku katsa ni ku tirhisiwa ko biha ka matimba ya rimbewu lama humaka eka Xikwembu, swi onhe vutomi bya vanhu ni mindyangu ya ntsandza-vahlayi. Buku leyi nge Ntiyiso yi komba mimpimanyeto ya Xikwembu ni nsirhelelo lowu nyikiwaka lava hlawulaka ku hanya ha yona. Hikwalaho ka yini hi nga kambi tluka ra yona ra leswi nga endzeni, ni tindzima ta buku leyi, leti ti nga tsakisaka vanhu va le nsin’wini ya hina?
7 Sungula Tidyondzo Ta Bibele: Dyondzo ya Bibele yi fanele yi nyikeriwa nkarhi wun’wana ni wun’wana loko hi fambisa buku. Nakambe hi khutaziwe ku sungula tidyondzo hi xiphephana, broxara kumbe magazini. Loko u twa leswaku n’wini wa muti u na yona yin’wana ya tibuku ta hina, hi vutlharhi, kombisa ndlela leyi yi nga tirhisiwaka ku dyondza Bibele ha yona. Swiphephana ni tibroxara i switirho leswinene swo swi tirhisa loko vanhu va nga swi koti ku teka tibuku ta hina.
8 Nsirhelelo wa ntiyiso wu ta ta hi le ka Muvumbi ntsena, Yehovha Xikwembu. Hi lava ku pfuna vo tala hi laha swi kotekaka ha kona leswaku va pfula timbilu ta vona ni mianakanyo ya vona, va yi pfulela ntiyiso wa Rito ra Xikwembu, kutani va kuma ntshembo lowu ri hi nyikaka wona. Onge hi nga swi tirhisa kahle swipfuneto swo dyondzisa leswi hi nga na swona eku chumayeleni ka ndlela ya Xikwembu ya ku rhula ni nsirhelelo.—Esa. 2:3, 4.