Khutaza Ku Landzelela Tipakani Ta Moya
1 A ku si tshama ku va ni vantshwa vo tarisa xileswi lava hlanganyeleke eku chumayeleni ka mahungu lamanene ya Mfumo! Makume ya magidi ma amukela xitsundzuxo lexi nga eka Eklesiasta 12:1: “Anakanya Muvumbi wa wena hi masiku ya vuntshwa bya wena.” I yini lexi susumetelaka vantshwa lava leswaku va hlanganyela nkarhi na nkarhi evutirhelini, naswona ha yini vo tala swinene va vona va nghenela ntirho wa vuphayona?
2 A swi kanakanisi leswaku vo tala va tekelela mahanyelo ya muntshwa la xiyekaka Timotiya. Mana wa yena ni kokwa wakwe va n’wi nyike mpfuno wa dyondzo ya moya ku sukela evuhlangini naswona va n’wi khutaze leswaku a landzelela tipakani ta moya. (2 Tim. 3:14, 15) Xisweswo, loko ku ve ni nkarhi wa malunghelo ya ntirho lama engetelekeke, a a faneleka naswona a a lunghekile.—Mintirho 16:1-3.
3 Vantshwa lava engetelekeke va nga khutaziwa njhani leswaku va landzelela tipakani ta moya? I masungulo ya muxaka muni lama faneleke ku endliwa? Vatswari va nga ku aka njhani ku tlangela ka vana va vona ka ntiyiso ni ku va pfuna va tivekela tipakani ta nkarhi wo leha?
4 Veka Masungulo Ya Matsalwa: Vatswari va fanele va tiyiseka leswaku leswi va swi dyondzisaka vana va vona swi huma eka Yehova, leswaku swi ta ‘tlharihisa vana va vona leswaku va pona.’ (2 Tim. 3:15) Tikarhatele swinene ku hlakulela eka vona rirhandzu leri enteke ra Rito ra Xikwembu, Bibele. Leswi swi lava dyondzo ya Bibele ya nkarhi na nkarhi, leyi dyondzisaka, leyi fanelaka swilaveko swa vona, kun’we ni ku va kona eminhlanganweni nkarhi na nkarhi. Leswaku vantshwa va va ni ripfumelo leri tiyeke leri nga ta va susumetela ku landzelela tipakani ta moya, va fanele va va ni nongonoko wa dyondzo ya vona vini ivi va kurisa vuxaka bya vona na Yehova.—1 Vates. 5:21; Vahev. 11:1.
5 Vantshwa va Vakriste va nga landzelela swilaveko swa moya hi ku olova loko vatswari va vona ni van’wana lava kuleke ebandlheni va veka xikombiso lexinene ni ku kombisa “ku tsaka ka Yehova.” (Neh. 8:10) Hi ku kombisa ntsako, hinkwerhu ka hina hi nga pfuna vantshwa ku twisisa leswaku swilaveko swa Vukriste bya ntiyiso a swi tiki.—1 Yoh. 5:3.
6 Vantshwa vo tala va susumetiwe swinene hi maphayona, varhumiwa ni valanguteri lava famba-fambaka lava nga tirha na vona entirhweni wa nsimu kumbe lava nga va khutaza. Vatswari va nga pfuna hi ku rhambela vatirhi va nkarhi hinkwawo lava vekaka xikombiso emakaya ya vona leswaku va ta dya swakudya kumbe eminkarhini yin’wana va va rhambela vunakulobye bya Vukriste. Yesu Kriste u nyikele xikombiso lexinene ngopfu xa ku nyikela nyingiso lowu ringaniseriweke eka lavantshwa.—Marka 10:13-16.
7 Ku Veka Tipakani: Loko vana va ri ni nkongomiso lowu faneleke wa vatswari, hakanyingi va tivekela tipakani ta moya va ha ri vatsongo. Loko vantshwa se va kunguhatile hi pakani ya moya leyi faneleke leyi va lavaka ku yi fikelela, ku nga ha va ntirho wa vuphayona, ku tirha laha xilaveko xi kuleke kona, ntirho wa le Bethele kumbe wa vuphayona byo hlawuleka ni swin’wana, vatswari ni van’wana lava kuleke va nga va khutaza swinene leswaku va tirhela epakanini ya vona, va nyikela swiringanyeto leswi tirhaka leswi nga va susumetelaka.
8 Bandlhla rinwana ni rin’wana ri fana ni ndyangu. Kutani un’wana ni un’wana wa hina u fanele a tsakela ku pfuna vantshwa leswaku va hambeta va famba entiyisweni ni ku endla nhluvuko wa moya. Hi nga endla leswi hi ku tiyisekisa rirhandzu ra hina eka vona ni ku va khutaza leswaku va landzelela tipakani ta moya.