Swakudya Swa Moya Swa Siku Na Siku—I Swa Nkoka eNdyangwini Wa Vukriste
1 “Munhu a nga ka a nga hanyi hi vuswa ntsena, kambe ú ta hanya hi marito hinkwawo lama humaka enon’weni wa Xikwembu.” (Mat. 4:4) Marito wolawo i ya ntiyiso swonghasi! Tanihi leswi hi lavaka swakudya swa nyama siku rin’wana ni rin’wana, kutani siku na siku hi fanele ku dya swakudya swa moya. Ku hi pfuna leswaku hi tiwundla nkarhi na nkarhi hi Rito ra Xikwembu, Sosayiti yi humese xibukwana lexi nge Ku Kambisisa Matsalwa Siku Na Siku. Tanihi ndyangu wa Vukriste, xana mi vekela nkarhi etlhelo siku rin’wana ni rin’wana wa ku kambisisa ndzimana ya siku?
2 Vatswari Va Fanele Ku Veka Xikombiso: Loko hi tshama hi khomekile, swa olova ku tshiketa ku kambisisa ndzimana ya siku, hi ehleketa leswaku swi ta endliwa hi nkarhi wun’wana. Kambe loko vatswari va xiya xilaveko xa moya xa ndyangu wa vona, va ta kuma nkarhi, ina va endla nkarhi, siku rin’wana ni rin’wana wa ku endla sweswo loko ndyangu wu ri swin’we. (Mat. 5:3) Va ta swi endla hi ku kandziyisa tinhla eka tinhlamuselo ta Xihondzo xo Rindza ni ku bula hi leswaku rungula ni ndzayo yoleyo swi nga tirhisiwa njhani hi ndlela leyinene, ku nga ri hi ku hlaya ndzimana ya siku ntsena ni vana va vona. I ntiyiso, swi nga ha lava matshalatshala ni ku titoloveta leswaku hi swi tolovela, kambe mimbuyelo ya kona yi fanerile. (Ringanisa Mintirho 17:11, 12.) Kutani vatswari, tikarhateleni ku veka xikombiso lexinene!
3 Kuma Nkarhi Lowu Faneleke: Hi wihi nkarhi lowunene wa leswaku ndyangu hinkwawo wu hlangana swin’we ku ta bula hi ndzimana, yi nga endliwi mhaka leyi nga hleriwangiki? Swa pfuna ku sungula siku hi ku kambisisa ndzimana ya Bibele. Emakaya ya Bethele ni ya varhumiwa emisaveni hinkwayo, siku ri sunguriwa hi vugandzeri bya ni mixo, lebyi katsaka bulo ro koma ra ndzimana ya siku. Leswi swi pfuna vamakwerhu ku sungula siku ra vona kahle, va anakanyisisa hi switsundzuxo swa Yehova siku na siku.—Ps. 1:1, 2; Vafil. 4:8.
4 Mindyangu ya Vukriste na yona yi nga pfuneka eka mabulo ya ni mixo ya Bibele. Vana va nga pfuniwa ku langutana ni minxungeto ya vumoya bya vona leyi va hlangavetanaka na yona exikolweni. Loko nkarhi wun’wana ndyangu wu nga swi koti ku tshama wu bula hi ndzimana ya siku, vatswari va nga ehleketa hi malunghiselelo man’wana leswaku swakudya leswi swa nkoka swa moya swi nga kayeriwi. Hi xikombiso, loko tatana a fanele a ya entirhweni vana va nga si pfuka ni mixo, kumbexana manana a nga endla nkarhi wo bula ni vana hi ndzimana. Hi hala tlhelo, mindyangu yin’wana yi hlela ku bula hi ndzimana ya siku ni madyambu hikuva va va swin’we hi nkarhi wolowo. Ndyangu wun’wana ni wun’wana wu nga endla xiyimiso lexi fanelaka swiyimo swa wona kahle.
5 Swakudya swa moya swa siku na siku i swa nkoka endyangwini wa Vukriste. Rhangisani ku kambisisa ndzimana ya siku. (Vafil. 1:10) Ku bula hi ndzimana ya Bibele siku rin’wana ni rin’wana swi ta hi pfuna ku namarhela misinya ya milawu yo lulama, ni milawu ya Yehova. Ntirhisano wa xirho xin’wana ni xin’wana xa ndyangu wu ta endla lunghiselelo leri ri pfuna swinene eka hinkwavo.