Xiyimiso Xa Ndyangu Xa Ndzimana Ya Siku
1 Siku ni siku vatswari lava nga ni rirhandzu va tirha hi matimba leswaku va lunghiselela vana va vona swakudya leswinene. I swa nkoka swinene ku va phamela swakudya swa moya leswi humaka eRitweni ra Xikwembu. (Mat. 4:4) Ndlela yin’wana leyi u nga pfunaka vana va wena leswaku va va ni torha ra swakudya swa moya va tlhela va ‘kula leswaku va ta ponisiwa,’ i ku va ndyangu hinkwawo wu tinyika nkarhi wa ku kambisisa ndzimana ya siku ni tinhlamuselo ta kona siku ni siku. (1 Pet. 2:2) Xana ndzimana ya siku mi nga yi hoxa kwihi exiyimisweni xa n’wina xa ndyangu?
2 Hi Nkarhi Wa Swakudya: Ku sungula siku ra n’wina hi ku burisana hi ndzimana ya siku swi ta pfuna ndyangu wa n’wina leswaku wu anakanya hi Yehovha siku hinkwaro. (Ps. 16:8) Manana un’wana a a tiyiseka leswaku u hlaya a tlhela a bula hi ndzimana ya siku ni tinhlamuselo ta kona swin’we ni n’wana wa yena loko a ri eku fihluleni, ivi a khongela na yena a nga si ya exikolweni. Leswi swi n’wi tiyisile leswaku a nga landzuli ripfumelo rakwe loko a langutane ni miringo ya politiki, a ala ku tikhoma hi ndlela yo biha, naswona a kota ku va ni xivindzi xo chumayela swichudeni ni vadyondzisi vakwe. Hambileswi a a ri Mbhoni a ri yexe exikolweni xexo, a nga si tshama a titwa a ri ni xivundza.
3 Loko mi nga swi koti ku bula hi ndzimana ya siku nimixo, mi nga ha yi kambisisa tanihi hi ndyangu kumbexana loko mi lalela. Van’wana va bula ni hi leswi va hlangavetaneke na swona ensin’wini ni hi tinhla leti va ti tsakeleke loko va ri karhi va tihlayela Bibele. Vo tala a va ma rivali mabulo yo tsakisa lawa va vaka na wona loko va ri karhi va lalela swin’we tanihi ndyangu.
4 Nimadyambu: Mindyangu yin’wana yi kambisisa ndzimana ya siku loko yi lunghiselela ku ya eku etleleni. Nakambe wolowo i nkarhi lowunene wo khongela swin’we tanihi ndyangu. Loko siku ni siku vana va wena va ku twa u vulavula hi Yehovha u tlhela u khongela eka yena, va swi vona leswaku i Xikwembu xa xiviri.
5 Onge Yehovha a nga katekisa matshalatshala ya n’wina yo dyondzisa vana va n’wina ntiyiso loko mi ri karhi mi xi tirhisa swinene xibukwana lexi nge Ku Kambisisa Matsalwa Siku Ni Siku.