Xana Wa Vuyeriwa Loko U Kambisisa Tsalwa Ra Siku Ni Siku?

Xana ku dyondza ka wena Bibele swi katsa ku hlaya Tsalwa ra siku ni rungula ra kona leri kumekaka eka xibukwana lexi nge, Ku Kambisisa Matsalwa Siku Ni Siku? Loko swi nga ri tano, titolovete ku swi endla. Van’wana va hlaya tsalwa ra siku na mpundzu leswaku va ta kota ku anakanyisisa hi tinhla leti va ti kumeke siku rero. (Yx 1:8; Ps 119:97) I yini leswi u nga swi endlaka leswaku u vuyeriwa swinene eka Tsalwa ra siku? Hlaya Tsalwa leri nga tshahiwa hinkwaro leswaku u kota ku vona leswi ri vulavulaka hi swona. Ehleketa hi xikombiso xo karhi xa le Bibeleni lexi kombisaka nkoka wo tirhisa nsinya wa nawu lowu nga eka ndzimana ya siku. Kutani u swi tirhisa evuton’wini bya wena. Loko u pfumelela Rito ra Xikwembu ri ku pfuna loko u endla swiboho, ri ta ku kongomisa naswona ri ta ku vuyerisa swinene.—Ps 119:105.

Emakaya ya Bethele va kambisisa Tsalwa Ra Siku ni mpundzu. Sweswi mimbulavulo yin’wana ya kumeka eka Vuhaxi Bya JW eka xiyenge xa MINONGONOKO NI SWIENDLAKALO. Xana u tshame u yi hlalela? Kumbexana leswi ku vulavuriwaka ha swona hi swona swi nga ku pfunaka. Hi xikombiso, mhaka ya Lota yi nga ku pfuna njhani loko u endla swiboho?

HLALELANI VHIDIYO LEYI NGE, U NGA RHANDZI MISAVA (1YH 2:15) KUTANI MI HLAMULA SWIVUTISO LESWI LANDZELAKA:

• Hi wihi nsinya wa nawu lowu a ku vulavuriwa ha wona eka ndzimana ya namuntlha?

• Xana mhaka ya Lota yi ri kombisa njhani khombo ro rhandza misava ni swilo leswi nga eka yona?—Gn 13:12; 14:12; 19:3, 12, 13, 24-26

• Hi swi kombisa njhani leswaku hi rhandza Yehovha ku nga ri misava ni swilo leswi nga eka yona?