Kambisisa Rito Ra Yehovha Siku Ni Siku!

¹ Siku rin’wana ni rin’wana ri ta ni miringo leyintshwa leyi ringaka ripfumelo ra wena. Kumbexana, munhu wa misava loyi u n’wi toloveleke u tshamela ku ku gangisa. Kumbexana mudyondzisi wa wena u lava leswaku u dyondzela ntirho wa ku tihanyisa kumbe muthori wa wena u lava leswaku u tirha tiawara to tala. Kumbexana vuvabyi bya wena byi nyanya ku biha. Hambiloko wo tshuka u weriwa hi miringo yo tano, a yi weli wena ntsena. Yehovha u tiyimisele ku ku nyika vutlharhi bya ku langutana na yona. Ku kambisisa tindzimana ta Bibele ni tinhlamuselo ta xibukwana lexi nge Ku Kambisisa Matsalwa hi yin’wana ya tindlela leti u nga dzikisaka ha tona Rito ra Yehovha embilwini ya wena nkarhi ni nkarhi. Xana u ri tirhisa hi xitalo lunghiselelo leri?

² Mpfuno Wa Kumeka: Esaya 30:20 yi hlamusela leswaku Yehovha i “Muleteri Lonkulu,” loyi vanhu va Xikwembu va nga lavaka mpfuno eka yena. A nga ku nyika leswi u swi lavaka leswaku u langutana ni miringo leyi ringaka ripfumelo ra wena. Njhani? Ndzimana leyi landzelaka yi ri: “Tindleve ta n’wina ti ta twa rito endzhaku ka n’wina ri ku: ‘Ndlela hi leyi. Fambani hi yona.’” Namuntlha, Yehovha u vula “rito” rakwe hi ku tirhisa Matsalwa ni tibuku ta “hlonga ro tshembeka.” (Mat. 24:45) Ku ni ndzalama ya vutlharhi eka swihloko swa Xihondzo xo Rindza swa nkarhi lowu hundzeke, leswi vulavulaka hi swiyimo swo hambana-hambana swa vutomi bya Vukreste. Ku dyondza leswi tshahiweke eka xibukwana lexi nge Ku Kambisisa Matsalwa swi ku pfuna ku aka xitlati xa vutivi lebyi pfunaka ku langutana ni miringo ya minxaka hinkwayo.—Esa. 48:17.

³ Tivekele Nkarhi Wa Ku Ri Hlaya: Manana un’wana hambileswi nimixo a a va a khomekile swinene, a a nga tshiki ku hlaya ni ku burisana ni n’wana wa yena hi ndzimana ya siku ni tinhlamuselo ta yona loko n’wana a ri karhi a fihlula. Ndzimana ya siku ni xikhongelo a ku ri marito lawa n’wana loyi a ma twa mixo wun’wana ni wun’wana a nga si ya exikolweni. Marito lawa hi wona a ma tiyisa jaha leri loko vanhwanyana va ri gangisa, ma ri pfune ku yima ri tiyile loko moya wa vutiko wu tinyike matimba, ma ri pfune ku nyikela vumbhoni hi xivindzi eka swichudeni-kulobye ni vadyondzisi. Hambileswi a ko va yena Mbhoni ntsena exikolweni xa kona, a nga kalanga a titwa onge u cukumetiwile.

⁴ Titshege hi Yehovha ni Rito rakwe leswaku u kuma ndzetelo ni nkongomiso. Loko u endla tano, Yehovha u ta va munhu wa xiviri eka wena, u ta fana ni munghana wo tshembeka eka wena. Titshege hi yena siku ni siku! Onge mahlo ya wena ma nga va ‘mahlo lama vonaka Muleteri wa wena Lonkulu,’ wena kun’we ni vanhu va timiliyoni lava kambisisaka Rito ra Xikwembu siku ni siku emisaveni hinkwayo.