Vantshwa—Xana Mi Endla Nhluvuko Hi Tlhelo Ra Moya?
LOKO Hideo a tsundzuka masiku ya le xikolweni xa sekondari u ri: “Hambileswi a ndzi va kona eminhlanganweni ya Vukreste, a ndzi nga swi naveli hi mbilu hinkwayo ku tirhela Yehovha. Ko tala a ndzi tivona ndzi ri munhu wa ndhuma eka vadyondzi-kulorhi naswona ndzi ri karhi ndzi yingayinga exitarateni ni ntombhi ya mina. A ndzi nga ri na tipakani leti kongomeke naswona a ndzi nga swi tsakeli ku endla nhluvuko hi tlhelo ra moya.” Ku fana na Hideo, vantshwa vo tala va vonaka va nga ri na xikongomelo, a va swi tsakeli ku fikelela tipakani leti pfunaka kumbe ku endla nhluvuko wo karhi.
Loko u ri muntshwa, swi nga ha endleka u tsakisiwa hi ku katseka eka ntlangu wo karhi kumbe eka vuhungasi byo karhi. Kambe, loko swi ta eka mintirho ya moya, swi nga ha endleka u nga titwi hi ndlela leyi fanaka. Xana swa koteka leswaku u tsakisiwa hi tipakani ta moya? Xiya marito lawa ya mupisalema: “Xitsundzuxo xa Yehovha xa tshembeka, xi tlharihisa la nga riki na ntokoto. . . . Xileriso xa Yehovha xi basile, xi hatimisa mahlo.” (Pisalema 19:7, 8) Rito ra Xikwembu ri nga kongomisa “la nga riki na ntokoto” leswaku a endla swilo hi vutlhari, ri ‘hatimisa mahlo ya yena.’ Ina, u nga tsakisiwa hi swilo swa moya. Kambe, xana ku laveka yini leswaku u titwa hi ndlela yoleyo? Xana u fanele u sungula kwihi?
Susumeteleka Ku Tirhela Xikwembu
Xo sungula, ku fanele ku va ni lexi ku susumetaka. Xiya mhaka ya Hosi Yosiya lontsongo wa le Yuda. Loko buku ya Nawu wa Yehovha yi kumiwile etempeleni, Yosiya u lerise leswaku yi hlayiwa naswona leswi a swi tweke swi n’wi khumbile swinene. Sweswo swi endle leswaku “Yosiya a susa swilo hinkwaswo swo nyenyetsa etikweni hinkwaro leri ri nga ra vana va Israyele.” (2 Tikronika 34:14-21, 33) Ku hlayiwa ka Rito ra Xikwembu ku susumetele Yosiya leswaku a endla leswi engetelekeke leswaku vugandzeri lebyi tengeke byi ya emahlweni.
Na wena u nga hlakulela ku navela ku tirhela Yehovha loko u hlaya Bibele minkarhi hinkwayo ni ku anakanyisisa hi leswi u swi hlayaka. Sweswo hi swona leswi susumeteke Hideo. U sungule ku va munghana lonkulu wa phayona rin’wana leri dyuhaleke, ku nga mutirheli wa nkarhi hinkwawo, la nga Mbhoni ya Yehovha. Phayona leri a ri ri xichudeni lexi hisekaka xa Bibele naswona a ri lwela ku hanya hi leswi ri swi dyondzaka eka yona. Hi ku khutaziwa swinene hi xikombiso xa phayona leri, Hideo u sungule ku endla leswi fanaka kutani a sungula ku swi navela hi mbilu hinkwayo ku tirhela Xikwembu swin’we ni ku pfuna vanhu van’wana. Nhluvuko wa yena wa moya wu endle leswaku a hanya vutomi lebyi nga ni xikongomelo.
Ku hlaya Bibele siku ni siku swi nga va ni nsusumeto wo karhi eka vantshwa. Takahiro u ri: “Nkarhi wun’wana ni wun’wana loko ndzi ya eku etleleni kutani ndzi tsundzuka leswaku a ndzi yi hlayanga Bibele siku rero, a ndzi pfuka ndzi yi hlaya. Hikwalaho ka sweswo, ndzi vone ndlela leyi Yehovha a ndzi kongomisaka ha yona. Ku hlaya Bibele siku ni siku swi ndzi pfune swinene leswaku ndzi endla nhluvuko wa moya. Leswi a ndzi tiyimisele ku hlanganyela hi xitalo entirhweni wa Yehovha, ndzi teke vuphayona bya nkarhi hinkwawo endzhaku ko pasa exikolweni xa le henhla. Naswona ndza tiphina swinene hi byona.”
Ku engetela eku hlayeni ka Bibele, hi xihi xin’wana lexi nga ku pfunaka leswaku u va ni nsusumeto lowukulu wa ku dzunisa Yehovha? Tomohiro u dyondzisiwe ntiyiso wa Bibele hi mana wa yena. U ri: “Loko ndzi ri ni malembe ya 19 hi vukhale, ndzi khumbiwe swinene hi rirhandzu ra Yehovha ni gandzelo ra nkutsulo wa Yesu, endzhaku ka loko ndzi yi hlaye hi vuenti buku leyi nge, Life Does Have a Purpose. Ku tlangela koloko ka rirhandzu ra Xikwembu ku ndzi susumetele leswaku ndzi endla leswi engetelekeke entirhweni wa Yehovha.” (2 Vakorinto 5:14, 15) Ku fana na Tomohiro, vantshwa vo tala va khutaziwa leswaku va endla nhluvuko wa moya hi ku va ni dyondzo ya vona vini ya Bibele minkarhi hinkwayo.
Hambiswiritano, ku vuriwa yini loko u nga si swi navela hi mbilu hinkwayo ku tirhela Yehovha? Xana u kona loyi u nga kombelaka mpfuno eka yena? Muapostola Pawulo u tsarile: “Hikuva Xikwembu [xi tirha] endzeni ka n’wina leswaku mi va ni matimba ya ku rhandza ni ku endla.” (Vafilipiya 2:13) Loko u kombela Yehovha leswaku a ku pfuna, u ta ku chululela moya wa yena wo kwetsima, mahala, lowu nga ta ku nyika matimba ku nga ri ya “ku endla” ntsena kambe ni ya “ku rhandza.” Leswi swi vula leswaku moya wo kwetsima wa Xikwembu wu ta kurisa ku navela ka wena ka ku lava ku endla hilaha u nga kotaka hakona entirhweni wa Yehovha naswona wu ta ku pfuna leswaku u kula emoyeni. Kutani, tshemba matimba ya Yehovha, u tiyisa mbilu!
Tivekele Tipakani
Loko se u tiyimiserile ku tirhela Yehovha hilaha ku heleleke, u fanele u tivekela tipakani leswaku u kota ku endla nhluvuko hi tlhelo ra moya. Muntshwa wa Mukreste, la vuriwaka Mana, u te: “Ku tivekela tipakani swi ndzi pfunile swinene. Ematshan’weni yo tlhentlhela endzhaku, ndzi ve ni xivindzi xo ya emahlweni. Leswi a ndzi tivekele tipakani, ndzi khongele Yehovha leswaku a ndzi kongomisa, naswona ndzi swi kotile ku endla nhluvuko handle ko kavanyetiwa.”
Tipakani ta wena ti fanele ti va leti swi olova ku ti fikelela. Ku hlaya ndzima yin’we ya Bibele siku ni siku ku nga va pakani leyinene. Nakambe u nga ha sungula tsima ro endla ndzavisiso. A hi endle xikombiso hi nkandziyiso lowu kumekaka hi Xinghezi. U nga ha dyondza timfanelo ta Yehovha leti xaxametiweke ehansi ka xihlokwana lexi nge, “Qualities by Name” ehansi ka nhloko-mhaka leyi nge, “Jehovah” eka Watch Tower Publications Index. Ku ni swihlokwana swa kwalomu ka 40 leswi u nga swi kambisisaka, kutani a swi kanakanisi leswaku nkambisiso wa wena wu ta ku tshineta eka Yehovha naswona wu ta endla leswaku u n’wi tirhela hilaha ku engetelekeke. (Rungula leri fanaka ri nga kumeka ni le bukwini leyintshwa leyi nge Tshinela Eka Yehovha.) Tipakani tin’wana leti swi olovaka ku ti fikelela ti katsa ku nyikela tinhlamuselo hambi ku ri kan’we eka nhlangano ha wun’we wa Vukreste lowu lavaka leswaku ku va ni ku hlanganyela ka vayingiseri, ku tiva xirho hambi xi ri xin’we xa vandlha eka nhlangano wun’wana ni wun’wana ni ku tiyiseka leswaku ri nga peli u nga khongelanga eka Yehovha swin’we ni ku vulavula ha yena eka vanhu van’wana.
Loko u nga si tsarisa eXikolweni xa Vutirheli bya le Tilweni, yoleyo yi nga ha va pakani leyinene leyi u nga tivekelaka yona. Xana se wa hlanganyela entirhweni wo chumayela? Loko swi nga ri tano, u nga ha tirhela ku va muhuweleri la nga khuvuriwangiki. Pakani leyi landzelaka yi nga ha va ku tikarhatela ku va ni vuxaka na Yehovha nileswaku u tinyiketela eka yena. Vantshwa vo tala va lwela ku hanya hi ku landza ku tinyiketela ka vona hi ku tivekela pakani ya ku va vatirheli va nkarhi hinkwawo.
Hambileswi swi nga hoxangiki ku tivekela tipakani evuton’wini, u fanele ku papalata ku va ni moya wa ku phikizana ni van’wana. Sweswo swi ta ku tisela ntsako lowukulu.—Vagalatiya 5:26; 6:4.
Swi nga ha endleka leswaku u titwa onge a wu na ntokoto naswona swa ku tikela ku tivekela tipakani letinene. Kutani landzela xitsundzuxo xa Bibele lexi nge: “Rhiya ndleve u yingisa marito ya lavo tlhariha.” (Swivuriso 22:17) Kuma mpfuno eka vatswari va wena kumbe eka Vakreste van’wana lava wupfeke. Swi le rivaleni leswaku vatswari swin’we ni vanhu van’wana, va fanele va va lava anakanyelaka ni lava khutazaka emhakeni leyi. Vantshwa va nga ha hetiwa matimba hi ku tshikileriwa hi ku lwela ku fikelela pakani leyi va vekeriweke yona hi vanhu van’wana naswona swi nga ha endla leswaku mhaka ya ku veka tipakani yi nga pfuni nchumu. Swi ve tano eka nhwanyana un’wana loyi a nga te: “Vatswari va mina a va tshamela ku ndzi vekela tipakani, to tanihi ku tsarisa eXikolweni xa Vutirheli bya le Tilweni, ku hlanganyela entirhweni wa nsimu, ku khuvuriwa ni ku va phayona. Ndzi lwe hi matimba leswaku ndzi fikelela ha yin’we ya tona. Loko ku ri ni leyi ndzi yi fikeleleke, vatswari va mina a va nga ndzi bumabumeli, ematshan’weni ya sweswo, a va ndzi vekela yin’wana leswaku ndzi lwela ku yi fikelela. Hikwalaho ka sweswo, minkarhi hinkwayo a ndzi titwa ndzi sindzisiwa ku fikelela tipakani. Swi ndzi hete matimba naswona ndzi titwe ndzi tirhela endzhaku.” I yini lexi a xi hoxile? Tipakani teto hinkwato a ti ri ta nkoka kambe a ti nga ri ta yena. Leswaku u humelela, u fanele u susumeteleka ku tivekela tipakani hi wexe!
Anakanya hi Yesu Kreste. Loko a ta emisaveni, a a swi tiva leswi Yehovha, Tata wa yena a a swi languterile eka yena. Ku endla ku rhandza ka Yehovha, a ku ngo va pakani eka Yesu, kambe a ku ri xiavelo lexi a a fanele a xi hetisisa. Xana Yesu u xi tekise ku yini xiavelo xa yena? U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Yesu a a tsakisiwa hi ku endla ku rhandza ka Yehovha naswona u hanye hi ku landza leswi Tata wa yena a a swi languterile eka yena. Eka Yesu a swi fana ni swakudya—u kume ntsako ni ku eneriseka hi ku hetisisa ntirho lowu a a languteriwe ku wu endla. (Vaheveru 10:5-10) Na wena u nga kuma ntsako loko u susumeteleka ku endla leswi vatswari va wena va ku khutazaka leswaku u swi endla.
U Nga Tshiki Ku Endla Leswi Nga Swinene
Loko se u tivekele pakani, tirha hi matimba leswaku u yi fikelela. Vagalatiya 6:9 yi ri: “Hi nga tshiki ku endla leswi nga swinene, hikuva hi nguva leyi faneleke hi ta tshovela loko hi nga karhali.” U nga tshembeli ntsena ematimbeni ya wena kumbe eka vuswikoti bya wena. Swi nga ha endleka u hlangavetana ni swihinga naswona minkarhi yin’wana swilo swi ku fambela ximatsi swa xinkarhana. Kambe Bibele ya hi tiyisekisa: ‘Tivisa Xikwembu tindlela ta wena hinkwato, kutani xona xi ta lulamisa tindlela ta wena.’ (Swivuriso 3:6) Yehovha u ta ku seketela loko u ri karhi u tirha hi matimba leswaku u fikelela tipakani ta wena ta moya.
Ina, hi ku hlakulela ku navela ku tirhela Yehovha ni ku lwela ku fikelela tipakani ta moya, u ta endla leswaku “ku ya emahlweni ka wena ku vonaka eka vanhu hinkwavo.” (1 Timotiya 4:15) Kutani u ta tsakela ku tirhela Xikwembu u ri ni xikongomelo.
[Xifaniso lexi nga eka tluka 9]
Ku hlaya Bibele ni ku anakanyisisa hi leswi u swi hlayaka swi ta ku susumetela ku tirhela Yehovha
[Xifaniso lexi nga eka tluka 10]
Yesu a a hanya hi ku landza leswi Tata wa yena a a swi languterile eka yena