Fambisa Tidyondzo Ta Bibele Hi Buku Leyi Nge Hanya Hi Masiku
1 Wansati un’wana loko a vulavula hi buku leyi nge Hanya Hi Masiku u phofule mintlhaveko yakwe a ku: “Ku fananyana ni Bibele, ndzi kume buku leyi yi ri leyi kongomeke swinene, leyi tsakisaka ni leyi susumetaka swinene eka tibuku leti ndzi tshameke ndzi ti hlaya!” Hinkwerhu ha pfumela leswaku leyi i buku leyinene eka leti tshameke ti humesiwa leswaku yi pfuna vanhu va twisisa Bibele, ngopfu-ngopfu ni ku va khutaza leswaku va va vadzunisi lava gingiritekaka va Yehovha.
2 Hi 1982, lembe leri buku leyi nge Hanya Hi Masiku yi humesiweke ha rona, 28 783 wa vahuweleri a va fambisa nhlayo-xikarhi ya tidyondzo ta Bibele ta 17 791 eAfrika Dzonga. Sweswi, vahuweleri va 54 939 va fambisa tidyondzo ta Bibele ta 53 352. Ku fikela sweswi, ku kandziyisiwe 62 wa timiliyoni ta buku leyi nge Hanya Hi Masiku hi tindzimi ta 115. Mawaku vuyelo lebyinene lebyi buku leyi yi nga na byona entirhweni wa hina wa misava hinkwayo!
3 Veka Tipakani: Ku kula loku ko hlamarisa ku vangiwa hi mikateko ya Yehovha ni ku hiseka ka vanhu vakwe leswaku va pfuna vanhu lavanene hi rungula ra Bibele leri ponisaka vutomi. (Rhom. 10:13-15; 1 Tim. 2:4) Hi lemuka ku biha ka minkarhi ni xilaveko xo gingiriteka eku twariseni ka Mfumo wa Xikwembu.
4 Leswi nhlengeletano yi yaka emahlweni, hina hi le ka xiyimo xihi? Xana hi tiyimisele ku va ni xiphemu lexi teleke entirhweni wa nkoka wo endla vadyondzisiwa? Leswaku hi endla leswi hi fanele hi tivekela tipakani. Xana hi nga gingiriteka hi laha ku engetelekeke eku landzeleleni ka lava tsakelaka? Hikwalaho ka yini u nga tivekeli pakani yo sungula dyondzo leyintshwa ya Bibele en’hwetini ya February?
5 I Mani Loyi A Nga Fambisaka Dyondzo Ya Bibele?: Vahuweleri lavanyingi lava humaka etindhawini to hambana-hambana va tiphinile hi ku fambisa dyondzo ya Bibele hi buku leyi nge Hanya Hi Masiku. Ku olova ka yona ku endla leswaku swi olova ku fambisa dyondzo, ku pfuna ni vahuweleri lavantshwa leswaku va hlanganyela entirhweni lowu wa nkoka. Ku engetela kwalaho, vunyingi bya hina hi tihlayele yona, kutani hi swi toloverile leswi yi swi tameleke. Muhuweleri un’wana loyi a a nga si fambisa tidyondzo ta Bibele, loko a nga si tirhisa buku leyi nge Hanya Hi Masiku u tsale leswi a tlangela: “Ndzi ni tidyondzo tinharhu, kasi ya vumune yi lunghele ku sungula. Ndzi kala marito yo nkhensa hikwalaho ko endla leswaku tidyondzo ta Bibele ti olova ku ti fambisa.”
6 Vantshwa na vona, va hlanganyela swinene entirhweni wa dyondzo ya Bibele hi ku tirhisa buku leyi nge Hanya Hi Masiku. Makwerhu un’wana lontsongo u veka buku yakwe ehenhla ka desika exikolweni. Leswi swi pfule ndlela ya mabulo lamanene ni tidyondzo ta Bibele to hlayanyana. Vana van’wana va tirhise ku tshinelela ko kongoma hi ku kombela vatswari lava va hlanganaka na vona evutirhelini bya yindlu na yindlu leswaku va khoma dyondzo ya Bibele ni vana va vona. Vana va hina a hi swihlangi, va nga swi kota ku vulavula hi xitshembiso xa Yehovha xa vutomi lebyi nga heriki emisaveni ya paradeyisi.
7 Ku nga khathariseki leswaku u ntsongo kumbe u nkulu, ntsako wun’wana lowu u nga wu kumaka evutirhelini i ku fambisa dyondzo ya le kaya ya Bibele. Kutani, un’wana ni un’wana wa hina onge a nga khongelela ku pfuniwa hi Yehovha, a tirhisa nkarhi wun’wana ni wun’wana ku twarisa ntshembo wa hina erivaleni. Tirhisa buku leyi nge Hanya Hi Masiku leswaku u pfuna van’wana va dyondza ndlela leyi va nga hlanganyelaka ha yona eku dzuniseni ka Yehovha, Xikwembu xa hina.—Ps. 148:12, 13.