Ku Tirhisana Ni Mufambisi Wa Dyondzo Ya Hina Ya Buku Ya Vandlha
1 Dyondzo ya Buku ya Vandlha yi endla xiphemu xa nkoka eku kuriseni ka vuswikoti bya hina tanihi vatirheli va mahungu lamanene. Mintlawa yi endliwa yi va yitsongo leswaku ku va ni moya lowu kufumelaka, lowu fanaka ni wa le ndyangwini wa dyondzo ya Bibele ni yin’wana ya tibuku ta Sosayiti. Mintlawa leyi leyitsongo nakambe yi endla leswaku ku va ni swiyimo leswinene swo leteriwa leswaku hi humelela ngopfu evutirhelini bya nsimu. Vanhu va kuma xikhutazo xa munhu hi yexe ni nyingiso hi lunghiselelo ra dyondzo ya buku. Hi nga khomisana njhani hi xitalo ni mufambisi kutani hi vuyeriwa eka lunghiselelo leri ro xonga?
2 Ku Hlanganyela eVutirhelini Bya Nsimu Hi Ku Hiseka: Vutihlamuleri byin’wana lebyikulu bya mufambisi wa dyondzo ya buku i ku pfuna xirho xin’wana ni xin’wana xa ntlawa leswaku xi hiseka evutirhelini. Emhakeni leyi, buku leyi nge Vutirheli Bya Hina, eka tluka 44 yi hi tsundzuxa leswaku “ku chivirika ni ku hiseka loku a ku kombisaka entirhweni wa nsimu swi ta vonaka eka vahuweleri.” Minkarhi yin’wana mufambisi u ta tirha swin’we ni swirho swa ndyangu wakwe, kambe u ta swi tsakela nakambe ku famba ni van’wana eka swivumbeko swo hambana-hambana swa vutirheli loko swiyimo swakwe swi pfumela. Xana u nga seketela minhlangano ya ntirho wa nsimu nkarhi na nkarhi? Loko u endla tano swi ta tlangeriwa swinene hi mufambisi wa dyondzo ya wena ya buku ni vahuweleri van’wana.
3 Minhlangano ya ntirho wa nsimu yi hleriwe eswivandleni leswi fanelekaka leswaku hinkwavo va hlanganyela hi ku hiseka entirhweni wo chumayela. Handle ko rivala swiyimo swa ndhawu, ntlawa wun’wana ni wun’wana wu ta lwela ku hatla wu sungula evutirhelini. Vahuweleri ni maphayona yo tala va humelela kahle loko va ya emahlweni ni vutirheli hi mahelo-vhiki ku fikela loko dyambu ri rhenga.
4 Xana u nga lava ku pfuniwa eka xiphemu xin’wana xa ntirho? Kumbexana mufambisi wa dyondzo ya wena ya buku a nga hlela leswaku muhuweleri la fanelekaka entlaweni a tirha na wena. Eku heleni ka n’hweti, tiyiseka leswaku u hatlisa u yisa xiviko xa wena xa ntirho wa nsimu. Mufambisi wa dyondzo ya buku ni matsalana va ta tlangela ntirhisano wa wena eka xivandla lexi xa nkoka.—Ringanisa Luka 16:10.
5 Loko Mulanguteri Wa Ntirho A Endzela Ntlawa: Mulanguteri wa ntirho hakanyingi u endzela ntlawa wun’we wa dyondzo ya buku n’hweti yin’wana ni yin’wana leswaku a khutaza ku tirha swinene evutirhelini bya nsimu. Yingiserisisa nkulumo ya timinete ta 15 leyi a yi nyikelaka emakun’wini ya dyondzo ya buku, tanihi leswi yi nga ta nyika ndzayo yo pfuna ntlawa leswaku wu antswisa eka tinhla tin’wana ta ntirho wo chumayela. Mulanguteri wa ntirho na yena u chivirikela ku tirha ni swirho swo hambana-hambana swa dyondzo ya buku eku heleni ka vhiki. Tiyiseka leswaku wa vuyeriwa hi lunghiselelo leri ro hlawuleka leswaku u pfuniwa hi ntokoto ni vuswikoti byakwe ensin’wini.
6 Xikombiso xa hina vini xa ntirhisano ni ku tiyimisela ku pfuna lava nga riki na ntokoto swi ta hoxa xandla eku akeni ka moya lowu kufumelaka, wa xinghana eka Dyondzo ya Buku ya Vandlha tanihi leswi hi “[endlelaka] vanhu hinkwavo leswinene, ngopfu-ngopfu va ndyangu wa lava pfumeleke.”—Gal. 6:10.