Ku Tlangela Nkutsulo
1 Ku navela ku tlangela munghana kumbe xaka leri feke swi tolovelekile eka vanhu vo tala. Ku navela loku ku nga va kukulu swinene loko murhandziwa a fe a ri endleleni yo ponisa vutomi bya van’wana. Hinkwavo lava nga ni ntshembo wa vutomi lebyi nga heriki va ni swivangelo leswikulu swo tlangela nkutsulo hi ku va kona eXitsundzuxweni xa rifu ra Kreste hi April 6.—2 Kor. 5:14; 1 Yoh. 2:2.
2 Tlangela Rirhandzu Ra Yehovha: Mawaku ndlela leyi swi fanelaka ha yona leswaku hi komba ku tlangela ka hina loku enteke ka Mupfuni wa hina lonkulu, Yehovha Xikwembu, loyi a lunghiseleleke nkutsulo! (1 Yoh. 4:9, 10) Vuenti bya rirhandzu ra Yehovha byi kombisiwa hi nyiko leyi hlawulekeke leyi a yi nyikeke tanihi nkutsulo wa hina, ku nga ri yin’wana ya timiliyoni ta tintsumi leto lulama, kambe N’wana wakwe la velekiweke a ri swake, la rhandzekaka swinene. (Swiv. 8:22, 30) N’wana loyi a tivaka Yehovha swinene, Yesu Kreste, u hi tsundzuxile: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.”—Yoh. 3:16.
3 Tlangela Rirhandzu Ra Yesu Kreste: Hi laha ku fanaka, swi fanerile leswaku hi komba ku tlangela loku enteke eka Yesu Kreste, loyi a nyikeleke vutomi byakwe byi va nkutsulo wa lavo tala. (Mt. 20:28) Rirhandzu rakwe ri kombisiwa hi ku titsongahatela ku rhandza ka Yehovha malunghana ni nkutsulo. Ehleketa hi ndlela leyi a sukeleke swiyimo swo tsakisa swin’we ni Tata wakwe ni timiriyadi ta tintsumi to lulama leswaku a va nkutsulo wa hina. Ntlhontlho wa ku hanya exikarhi ka vanhu lava nga ni xidyoho ni ku va ehansi ka vona ni ku tiva leswaku ku endla nkutsulo a swi ta lava leswaku a fa, a swi n’wi hetanga matimba. Ematshan’wini ya sweswo, u “tek[e] xiyimo xa nandza, a velekiwa a ri la fanaka ni vanhu. [Ku tlula sweswo, NW] . . . ú titsongahatile, a va loyi a yingisaka ku fikela eku feni, a fa hi rifu ra [mhandzi ya nxaniso, NW].”—Flp. 2:5-8.
4 Xana Nkutsulo Hi Wu Tlangerisisa Ku Yini?: Ku tlangela ka hina nkutsulo a ku fanelanga ku va ku nkhensa ntsena. Hi fanele hi dyondza hi lunghiselelo ra Xikwembu ra ku ponisiwa hi Yesu Kreste. (Yoh. 17:3) Kutani hi pfumela eka nkutsulo. (Mint. 3:19) Endzhaku ka sweswo, hi fanele hi susumeteleka ku tinyiketa eka Yehovha Xikwembu hi ku tinyiketela ni nkhuvulo. (Mt. 16:24) Loko hi namarhela ku tinyiketela ka hina, hi fanele hi tinyika nkarhi wo byela van’wana hi nkutsulo wo saseka wa ku ponisiwa.—Rhom. 10:10.
5 Un’wana ni un’wana wa hina a nga swi kota ku fikelela swilaveko leswi. Mikiya 6:8 ya hi tiyisekisa: “Leŝi Yehova a ŝi lav̌aka e ka wena, hi leŝaku u endla le’ŝi lulameke, u ranḍa tintŝalo, ni ku famba hi ku tiṭongahata e mahlweni ka Šikwembu ša wena.” Hi laha ku fanaka, Davhida u vule leswi eka Yehovha: “Hikwaŝo ŝi huma ka wena, kutani leŝi hi ku humeselaka ŝona hi nyikiwile hi v̌oko ra wena.”—1 Tikr. 29:14.
6 Leswaku hi kurisa ku tlangela ka hina lunghiselelo ra Yehovha ro saseka, hikwalaho ka yini hi nga hlayi ivi hi bula hi tindzima 112 ku ya ka 126 ebukwini leyi nge Nghwazi tanihi ndyangu ku nga si fika siku ra Xitsundzuxo? Hi ndlela leyi, hinkwerhu hi nga lungheka emianakanyweni leswaku hi ta tlangela nkutsulo enkhubyeni wa Xitsundzuxo lowu nga ta va kona hi April 6, 1993.