Yearbook I Xihlovo Xa Xikhutazo
1 Swiviko ni mintokoto malunghana ni mintirho ya Yehovha leyi hlamarisaka, swa phyuphyisa nkarhi hinkwawo eka malandza ya Xikwembu. (Yobo 38:4, 7; Swiv. 25:25; Lk. 7:22; Mint. 15:31) Hi yona mhaka leyi Yearbook of Jehovah’s Witnesses yi nga xihlovo xa xikhutazo.
2 Yearbook yin’wana ni yin’wana yi nyika swiviko leswi akaka leswi humaka emisaveni hinkwayo mayelana ni mintirho ni leswi endliwaka hi Timbhoni ta Yehovha. Mintokoto leyi tiyisaka ripfumelo yi kandziyisa nkongomiso, ni nsirhelelo ni mikateko ya Yehovha eka vanhu vakwe. Yearbook yi vulavula hi vavanuna ni vavasati vo tiya lava siyeke makaya, vanghana ni matiko ya vona leswaku va yisa ntiyiso wa Bibele eka vanhu va matiko-nkulu hinkwawo ni swihlala swo tala swa lwandle.
3 Yearbook yi susumetele vahlayi vo tala leswaku va engetela ntirho wa vona eka Xikwembu. Muhlayi un’wana u tsarile: “A ndzi koti ku yi hlaya hi ku hatlisa. Leswi se ndzi swi hlayeke swa khutaza swinene. Swi ndzi endla ndzi swi twa leswaku ndzi nga endla swo tala eku chumayeleni ka mahungu lamanene loko ndzi vona leswi van’wana va swi endlaka ehansi ka ntshikilelo.”
4 Lembe rin’wana ni rin’wana ku sukela hi 1927, Yearbook of Jehovah’s Witnesses yi ve xihlovo xa ntiyiso xa swiviko ni mintokoto leyi tiyisaka nhlana. Xana u vuyeriwa hi xitalo eka xihlovo lexi xo hlawuleka xa xikhutazo? Leswaku u vuyeriwa, tiyiseka leswaku u hlaya Yearbook loko wa ha ku yi kuma. Kutani elembeni hinkwaro, u pfuxeta swiyenge swo karhi swa yona leswaku u kuma xikhutazo lexi laviwaka hi wena ni ndyangu wa wena.