Seketela Hi Ku Helela Xiyimiso Xa Minhlangano Ya Le Rivaleni Ya Vandlha Ra Ka N’wina

¹ Emalembeni yo hlayanyana lama hundzeke jaha rin’wana ri kume xiphephana lexi a xi tivisa minhlangano ya vandlha ra kwalaho. Tanihi leswi a lava ntiyiso, u ehlekete ku ya eNhlanganweni wa le Rivaleni hi Sonto yoleyo, u hatle a fika eholweni. Muhuweleri u n’wi xewete kahle naswona loko va ha vulavurisana, u n’wi byele hi dyondzo ya Bibele, kambe u yi arile. Hambi swi ri tano, u tsakisiwe ngopfu hi nkulumo ya le rivaleni leyi a yi lunghiseleriwe kahle lerova u cince miehleketo yakwe, naswona endzhaku ka nhlangano u amukele dyondzo. Jaha leri ri endle nhluvuko hi xihatla naswona ri khuvuriwile endzhaku ka tin’hweti to hlayanyana. Hi nga dyondza tidyondzo tinharhu leti pfunaka eka ntokoto lowu.

² Yo sungula, Nhlangano wa le Rivaleni wu tivisiwile. Xana wa swi tirhisa swiphephana leswi kandziyisiweke ku tivisa xiyimiso xa minhlangano ya vandlha ra ka n’wina? Loko mutshama-xitulu a tivisa xihloko xa nkulumo ya le rivaleni leyi nga ta nyikeriwa vhiki leri landzelaka, ehleketa hi vanhu va le nsin’wini ya ka n’wina lava ngopfu-ngopfu va nga tsakisiwaka hi mhaka ya kona, ku nga khathariseki leswaku hi nkarhi wolowo va hlaya tibuku ta hina kumbe e-⁠e. Vanhu van’wana a va swi lavi ku hlaya, kumbe swi va nonon’hwela ngopfu ku hlaya, kambe va nga ha tsakela ku yingisela nkulumo ya nhloko-mhaka ya Matsalwa.

³ Ya vumbirhi, munhu lontshwa u amukeriwe hi malwandla. Loko u kunguhata ku fika eholweni ka ha ri ni nkarhi swinene, u nga ha pfuxela vamakwenu va xinuna ni va xisati, ku katsa ni lava tsakelaka, lava nga kona. (Hev. 10:​24) Loko munhu lontshwa a ta ro sungula, swi nga endleka a nga swi tivi leswi nga ta endleka. Hlamusela leswaku minhlangano ya hina yi sungula hi risimu ni xikhongelo, naswona u n’wi byela ndlela leyi nhlangano wu nga ta fambisiwa ha yona. Loko swi fanela, n’wi rhambe leswaku a tshama na wena leswaku mi ta tirhisa swin’we Bibele ni buku ya wena ya tinsimu. N’wi byele leswaku a vulavula na wena hi swivutiso swin’wana ni swin’wana leswi a nga ha vaka na swona endzhaku ka nhlangano.

⁴ Ya vunharhu, nkulumo a yi lunghiseleriwe kahle. Lava nga ni malunghelo ya ku yimela vandlha tanihi swivulavuri swa le rivaleni va heta tiawara to tala va lunghiselela ni ku pfuxeta mhaka ya kona leswaku va kurisa rirhandzu ra vayingiseri ni mintirho leyinene. Hinkwerhu ka hina hi le hansi ka ntshikilelo namuntlha, naswona ntiyiso lowu phyuphyisaka lowu humaka eRitweni ra Xikwembu hi wona lowu hi wu lavaka leswaku wu hi pfuna ku tiyisela. I ntiyiso, ku nga khathariseki leswaku nkulumo ya le rivaleni yi dyondzisa ku fikela kwihi, yi nge hi pfuni ngopfu handle ka loko hina hi hexe hi yingisela hi rixaladza eka leswi swi vuriwaka. Xana minkarhi yin’wana u swi kuma swi ku tikela ku yingiserisisa exikarhi ka nkulumo? Ku tsala tinotsi to koma swi nga ku pfuna, ku fana ni leswi hakanyingi hi endlisaka swona emintsombanweni ya hina. Tiyiseka leswaku wa hlaya eBibeleni loko Tsalwa rin’wana ni rin’wana ri hlayiwa ni ku hlamuseriwa.

⁵ Sosayiti yi humese tinkulumo to hambana-hambana ta tinhloko-mhaka ta Matsalwa. Hi ku tirhisa mulanguteri la ungamelaka kumbe makwerhu loyi a hlawuriweke hi yena, huvo ya vakulu yi hlela minongonoko ya vandlha ya Minhlangano ya le Rivaleni. Tinhloko-mhaka leti tsariweke hi Sosayiti ta hlawuriwa leswaku ku kombisiwa swilaveko swa vandlha swa nkarhi wolowo. U nga hundziwi hi marungula lawa ya nkoka, naswona seketela hi ku helela nongonoko wa vandlha wa vhiki na vhiki wa Minhlangano ya le Rivaleni.