Bokisi Ra Swivutiso

◼ Xana Xikolo xa Vutirheli bya le Tilweni, Nhlangano wa Ntirho, Nkulumo ya le Rivaleni ni Dyondzo ya Xihondzo xo Rindza swi fanele swi pfuriwa njhani naswona hi mani?

Tinsimu leti hlawuriweke leti faneleke ti tirhisiwa loko ku sungula Xikolo xa Vutirheli bya le Tilweni vhiki ni vhiki ti tsariwe eka Xiyimiso xa Xikolo xa Vutirheli bya le Tilweni lexi taka ni Vutirheli Bya Hina Bya Mfumo bya October. Tinsimu to pfula ni to pfala Nhlangano wa Ntirho wa vhiki ni vhiki ti tsariwe eka tluka 2 ra Vutirheli Bya Hina Bya Mfumo. Hilaha ku fanaka, tinsimu to pfula Dyondzo ya Xihondzo xo Rindza ti kumeka eka tluka 2 ra nkandziyiso wun’wana ni wun’wana wa Xihondzo xo Rindza. Tinsimu leti hlawuriweke ti fambisana ni nhlangano wa kona, naswona ti fanele ti tivisiwa hi makwerhu la fambisaka nhlangano wolowo ematshan’weni ya leswaku ti tivisiwa hi mutshama-xitulu wa nkulumo ya le rivaleni.

Hi xikombiso, mukhomi wa Xikolo Xa Vutirheli Bya Le Tilweni u ta amukela vayingiseri, a vula risimu ro pfula, a fambisa xikolo, loko xi hela u ta vitana makwerhu la nga ni xiavelo xo sungula eka Nhlangano wa Ntirho leswaku a ta eplatifomo. Makwerhu yoloye hi yena la faneleke ku fika a vula risimu ro pfula Nhlangano wa Ntirho.

Hilaha ku fanaka, Nkulumo ya le Rivaleni yi ta tivisiwa hi mutshama-xitulu wa yona. U ta amukela vayingiseri kutani a va rhamba leswaku va hlanganyela eku yimbeleleni risimu ro pfula leri hlawuriweke hi xivulavuri. Kutani mutshama-xitulu (kumbe makwerhu un’wana la fanelekaka la averiweke ka ha ri emahlweni) u ta pfula nhlangano hi xikhongelo. U ta vitana xivulavuri xa kona ni nhloko-mhaka ya nkulumo ya xona. Endzhaku ka nkulumo, mutshama-xitulu a nge hlamuseli nkulumo ya xivulavuri, u to vula marito ma nga ri mangani yo nkhensa ndzayo ya kona. U ta tivisa ni nhloko-mhaka ya nkulumo ya le rivaleni ya vhiki leri landzelaka, kutani a kombela vayingiseri hinkwavo leswaku va hambeta va tshamile leswaku va ta hlanganyela eka Dyondzo ya Xihondzo xo Rindza. A swi bohi leswaku mutshama-xitulu a kombela vayingiseri loko va ta tsakela leswaku xivulavuri xi ya va rungulela vamakwerhu evandlheni ra xona. Endzhaku ka sweswo mutshama-xitulu u ta vitana mufambisi wa Dyondzo ya Xihondzo xo Rindza leswaku a ta eplatifomo.

Mufambisi wa Dyondzo ya Xihondzo xo Rindza u ta vula risimu leri fambisanaka ni dyondzo. Kutani a fambisa dyondzo ya Xihondzo xo Rindza hi ku pfumelelana ni swiletelo swa ndlela leyi yi faneleke yi fambisiwa ha yona, loko a gimeta u ta vula risimu ro pfala. Mufambisi wa Dyondzo ya Xihondzo xo Rindza tanihi ntolovelo u ta vitana makwerhu la nyikeleke nkulumo ya le rivaleni leswaku a ta pfala hi xikhongelo.

Ku landzela swiletelo leswi swi ta tiyisekisa leswaku minhlangano ya hina ya vandlha yi fambisiwa hi ndlela leyi fanaka emavandlheni hinkwawo.