Xiyimiso Lexintshwa Xa Minhlangano Ya Vandlha
1, 2. Hi kwihi ku cinca loku nga ta va kona eminhlanganweni ya hina ku sukela hi January 2009?
1 Hi vhiki ra April 21-27, 2008, vamakwerhu emisaveni hinkwayo va twe xitiviso lexi tsakisaka. Xitiviso xa kona a xi ku: “Ku sukela hi January 1, 2009, Dyondzo ya Buku ya Vandlha yi ta khomiwa swin’we ni Xikolo xa Vutirheli bya le Tilweni ni Nhlangano wa Ntirho. Vito ra Dyondzo ya Buku ya Vandlha ri ta cinca ri va Dyondzo ya Bibele ya Vandlha.”
2 Xiyimiso Xa Nhlangano Lowu Wa Vhiki Ni Vhiki: Nhlangano lowu ku katsa ni risimu ni xikhongelo wu ta teka awara ni timinete ta 45. Nhlangano lowu wu ta sungula hi risimu ni xikhongelo (5 min.), kutani ku landzela Dyondzo ya Bibele ya Vandlha (25 min.). Endzhaku ka sweswo ku ta landzela Xikolo xa Vutirheli bya le Tilweni (30 min.). Loko xi hela ku ta yimbeleriwa risimu (5 min.) ivi ku ngheniwa eka Nhlangano wa Ntirho (35 min.). Nhlangano lowu wu ta pfariwa hi risimu ni xikhongelo (5 min.). Leswaku swi mi olovela ku lunghiselela minhlangano leyi, ku ta humesiwa xiyimiso xa Dyondzo ya Bibele ya Vandlha, xa Xikolo xa Vutirheli bya le Tilweni ni xa Nhlangano wa Ntirho n’hweti na n’hweti eka Vutirheli Bya Hina Bya Mfumo.
3. Xana wu ta fambisiwa njhani nhlangano wa Dyondzo ya Bibele ya Vandlha?
3 Dyondzo Ya Bibele Ya Vandlha: Yi ta fambisiwa ku fana ni Dyondzo ya Xihondzo xo Rindza. A swi kali swi lava leswaku mufambisi wa yona a rhanga hi ku pfuxeta dyondzo ya vhiki leri nga hundza. U ta sungula nhlangano lowu hi xingheniso xo koma ntsena. Leswi swi ta pfuna ni vayingiseri leswaku va va ni nkarhi lowu eneleke wo nyikela tinhlamulo to koma. Mulanguteri la ungamelaka u ta avela vakulu leswaku va cincana ku fambisa nhlangano lowu, wu fanele wu fambisiwa hi nkulu wun’wana vhiki ni vhiki.
4. Nhlangano wa Ntirho wu ta cinca hi ndlela yihi?
4 Nhlangano Wa Ntirho: Nhlangano wa Ntirho a wu nge cinci, kambe wu ta komisiwa. Switiviso swi ta teka ntlhanu wa timinete. Lowu ku ta va ku ri nkarhi wa switiviso swa nkoka ku katsa ni mapapila man’wana lama humaka erhavini. Switiviso leswi tolovelekeke swo tanihi malunghiselelo ya nsimu, ku basisa, swiviko swa timali ni swa mapapila lama rhavi ri ma rhumelaka nkarhi na nkarhi a swa ha fanelanga swi hlayiwa exitejini, kambe swi ta vekiwa ebodweni ya switiviso leswaku vamakwerhu va ta ti hlayela swona. Lava va nga ni swiavelo va fanele va swi lunghiselela kahle naswona va nga tluli nkarhi lowu va averiweke wona, nakambe va fanele va namarhela swiletelo leswi va faneleke va swi landzela eka swiavelo swa vona.
5. Hi vhiki ra mulanguteri wa xifundzha, xiyimiso xa minhlangano ya vandlha xi ta va xi yime njhani?
5 Riendzo Ra Mulanguteri Wa Xifundzha: A ku nge vi na ku cinca eka xiyimiso xa vhiki ra mulanguteri wa xifundzha. Hi Ravumbirhi ku ta va ni Xikolo xa Vutirheli bya le Tilweni ni Nhlangano wa Ntirho, endzhaku ka sweswo ku landzela risimu. Mulanguteri wa xifundzha u ta nyikela nkulumo ya timinete ta 30. Hilaha swi endliwaka ha kona sweswi, hi vhiki rero siku rin’wana ri ta vekeriwa Dyondzo ya Bibele ya Vandlha leyi nga ta landzeriwa hi risimu ni nkulumo ya mulanguteri wa xifundzha. Minhlangano leyi yi ta pfariwa hi risimu ni xikhongelo.
6. Wu ta va wihi ntirho wa mulanguteri wa ntlawa?
6 Minhlangano Ya Ntirho Wa Nsimu: Huvo ya vakulu yi ta avela valanguteri va mintlawa leswaku va rhangela mintlawa yoleyo eka minhlangano ya nsimu ni ku endla maendzo ya vurisi eka vamakwerhu lava nga emintlaweni yoleyo. Loko ku ta averiwa nandza wa vutirheli, u ta vitaniwa “nandza wa ntlawa.”
7. I yini leswi hi nga swi langutelaka eka ku cinca loku nga ta va kona eka xiyimiso xa minhlangano ya hina ya vandlha?
7 Hilaha swi hlamuseriweke ha kona, a swi kanakanisi leswaku ku cinca loku ka minhlangano ku ta hi pfuna leswaku hi kuma rungula leri nga ta hi pfuna leswaku hi tiyisa vuxaka bya hina na Yehovha. Leswi swi ta tlhela swi hi pfuna leswaku hi kuma vuleteri lebyi nga ta hi pfuna ku antswisa vuswikoti bya hina byo dyondzisa.—Efe. 4:13, 14; 2 Tim. 3:17.
8. Ku lunghiselela ka ha ri ni nkarhi swi ta hi pfuna njhani leswaku hi vuyeriwa hi tlhela hi vuyerisa van’wana?
8 Ku lunghiselela minhlangano yoleyo ka ha ri ni nkarhi, swi ta hi pfuna leswaku hi twisisa tinhla ta nkoka leti nga ta kandziyisiwa eka nhlangano wun’wana ni wun’wana. Hinkwerhu hi ta kota ku khutazana hi tinhlamulo ta hina. (Rhom. 1:11, 12; Hev. 10:24) Hikwalaho hi fanele hi endla leswaku ‘ku ya emahlweni ka hina ku vonaka’ hi ku va hi “ri tamela khwatsi rito ra ntiyiso.”—1 Tim. 4:15; 2 Tim. 2:15.
9. Hi fanele hi tiyimisela ku endla yini naswona ha yini?
9 Hi ta ku tsakela swinene ku cinca loku nga ta va kona eminhlanganweni ya hina ya vandlha. Onge hinkwerhu hi nga landzela nkongomiso lowu “hlonga ro tshembeka ni ro tlhariha” ri hi nyikaka wona, kutani hi tshama ekusuhi ni Murisi wa hina Lonkulu loko a ri karhi a hi pfuna leswaku hi kota ku langutana ni ‘nhlomulo lowukulu’ lowu nga kwala nyongeni.—Mat. 24:21, 45; Hev. 13:20, 21; Nhlav. 7:14.