Sungulani Ni Ku Heta Minhlangano Hi Nkarhi

1 Minhlangano hinkwayo ya bandlha, ku katsa ni minhlangano ya ntirho wa nsimu, yi fanele ku sungula ni ku hela hi nkarhi. Ha yini? Ku endla swilo hi nkarhi swi kombisa nhleleko naswona swi kombisa ku khathalela hinkwavo lava vaka kona ni lava hlanganyelaka eminhlanganweni. (Ekl. 3:17b; 1 Vakor. 14:33) Hi nga kombisa nkhathalelo wa hina hi ku namarhela switsundzuxo leswi landzelaka ku tiyisekisa leswaku minhlangano yi sungula ni ku hela hi nkarhi.

2 Minkarhi hinkwayo hi fanele ku ringeta ku fika eminhlanganweni ka ha ri ni nkarhi leswaku hi pfuxelana ni van’wana, hi khathalela timhaka leti faneleke, ni ku hlanganyela eka risimu ni xikhongelo xo pfula. Hi ntolovelo, timinete ta ntlhanu ti nyikiwa risimu ni xikhongelo. Lava va yimelaka bandlha hi xikhongelo va fanele ku tsundzuka xikongomelo xa nhlangano naswona sweswo va swi vula emaritweni ya vona ya swikhongelo swo pfula ni swo pfala. Swikhongelo swo tano a swi fanelanga swi leha.

3 Nhlangano Wa Le Rivaleni: Tinkulumo ta le rivaleni ti hikeriwe eka timinete ta 45. Ku hundza nkarhi lowu nyikiweke swi ta khumba Dyondzo ya Xihondzo xo Rindza leyi landzelaka. Minhlangano leyimbirhi, ku katsa ni tinsimu ni swikhongelo, yi fanele ku hetiwa hi tiawara timbirhi. Swivulavuri swa le rivaleni swi fanele ku namarhela nkarhi lowu kombisiweke eka phepha ra nkulumo ra Sosayiti naswona swi nga katsi timhaka ta le handle enkulumeni, tanihi ku xeweta. Loko xivulavuri xi nga yi tolovelanga ndhawu ya Holo ya Mfumo, xi fanele ku vutisa hi bandlha leri xi yaka eka rona leswaku xi kongomisiwa ni leswaku xi tiva nkarhi lowu xi faneleke ku famba ha wona.

4 Dyondzo Ya “Xihondzo xo Rindza”: Awara yin’we yi vekeriwe Dyondzo ya Xihondzo xo Rindza, ku hlayiwa tindzimana hinkwato ni ku xiya swivutiso swa mpfuxeto. Tinhlamuselo to koma ta mufambisi, leti kombisiweke ta xingheniso ti fanele ku pfuxa ku tsakela ni ku yisa edyondzweni ya kona. Tinhlamuselo ta yena ni ku xiya ka yena hi nkarhi wa dyondzo ti fanele ku koma. Ku ava mhaka hi ku ehleketelela nkarhi swi ta pfuna mufambisi ku papalata ku heta nkarhi wo tala eka hafu yo sungula ya dyondzo kutani a hatlisa eka hafu yo hetelela.

5 Xikolo Xa Vutirheli Bya Le Tilweni: Lowu i nhlangano wa timinete ta 45. Hambi leswi nkulumo ya ndzayo ni tinhla-nkulu leti humaka eku hlayeni ka Bibele ti nga yimisiwiki loko nkarhi wu herile, vamakwerhu lava averiweke swiphemu leswi a va fanelanga va hundzisa nkarhi lowu nyikiweke. Loko leswi swi nga endliwi, ndzayo ya le xihundleni yi fanele ku nyikeriwa. Nakambe, switsundzuxo ni swibumabumelo hi mulanguteri wa xikolo a swi fanelanga ku hundza nkarhi lowu vekiweke. Nkarhi wu nga hlayisiwa loko swichudeni hinkwaswo swi tshame ekusuhi ni platifomo naswona xin’wana ni xin’wana xi heta nkulumo ya xona hi ku hatlisa loko nkarhi lowu averiweke wu herile.—Vona Xiyimiso Xa Xikolo Xa Vutirheli Bya Le Tilweni Xa 1991.

6 Nhlangano Wa Ntirho: Lowu na wona i nhlangano wa timinete ta 45. Kun’we ni Xikolo xa Vutirheli bya le Tilweni ni tinsimu ni swikhongelo, nongonoko hinkwawo a wu fanelanga wu hundza awara ni timinete ta makume-mune ntlhanu. Vamakwerhu lava nga ni swiphemu eka Nhlangano wa Ntirho va fanele ku namarhela nkarhi lowu vekiweke. Swiyenge leswi nga ta hlanganisiwa hi swivutiso ni tinhlamulo swi lava xingheniso xo koma ntsena. A ku na xilaveko xo engetela rungula ra xingheniso leri leheke. Minkombiso yi fanele ku pfuxetiwa kahle, naswona lava hlanganyelaka va fanele ku lungheka ni ku va endhawini leyinene leswaku va tirhisa nkarhi lowu vekeriweke xiphemu xexo hi ndlela leyinene.

7 Dyondzo Ya Buku Ya Bandlha: Lowu i nhlangano wa awara yin’we, ku katsa ni xikhongelo xo pfula ni xo pfala. Tindzimana hinkwato ti fanele ku hlayiwa. Ku tiyisekisa ku heta nhlangano hi nkarhi, mufambisi u ta ava mhaka leswaku a ta papalata ku hatlisa eka xiphemu xo hetelela xa dyondzo kumbe ku heta ka ha ri na nkarhi. Mufambisi u fanele ku vona leswaku ndzimana yin’wana ni yin’wana yi teka nkarhi wo tanihi kwihi. Tinhla-nkulu ti fanele ku twisisiwa kahle. Vuswikoti byo dyondzisa bya mufambisi byi ta n’wi pfuna ku hlangavetana ni ntlhontlho wihi na wihi emhakeni leyi.—Tito 1:9.

8 Minhlangano Ya Ntirho Wa Nsimu: Lowu a wu fanelanga wu hundza timinete ta 15, ku katsa ni ku endla swiavelo swa nsimu ni ku pfala hi xikhongelo. Lava yaka entirhweni va fanele ku sungula ntirho wa vona wa nsimu hi xihatla hi laha swi kotekaka ha kona. Mufambisi u ta sungula nhlangano hi nkarhi, a nga yimi ku kondza ntlawa lowukulu wu fika. Nakambe, ku kondza loko swiavelo swa nsimu se swi endliwile ni nhlangano wu hetiwile hi xikhongelo, hi xihatla ntlawa wu nga ha famba wu ya ensin’wini. Leswi i swa nkoka ngopfu-ngopfu eka maphayona lawa ma nga ha vaka kona.

9 Hinkwerhu ka hina hi nga pfuneka hi minhlangano leyi sungulaka ni ku hela hi nkarhi. Leswi ngopfu-ngopfu swi tlangeriwa hi lava nga ni vanghana va vukati lava nga pfumeriki lava va va langutelaka ku va ekaya hi nkarhi wo karhi. Loko va lunghiselela swo famba ni ku vuya ha swona eminhlanganweni kumbe loko va veka nkarhi lowu va nga ta tlhelela ha wona ekaya, lava humaka eka mindyangu leyi avaneke va ta va va endla kahle loko va tsundzuka nkarhi lowu va faneleke ku wu teka emahlweni ni le ndzhaku ka minhlangano wo vonana ni vamakwavo, ku teka tibuku ni swin’wana. Handle ko kanakana, ku sungula ni ku heta minhlangano hi nkarhi swi pfuna eku endleni ka swilo hi “mukhuva lowo saseka, hi nawu wa kona.”—1 Vakor. 14:40.