Minhlangano Yo Kombana Rirhandzu Ni Mintirho Leyinene

Vakriste vo sungula a va hlangana kun’we, hakanyingi emakaya, ku kuma dyondzo ni ku tsakela vuxaka lebyi akaka. Namuntlha, mabandlha ya Timbhoni ta Yehova ya hlangana kanharhu hi vhiki. Wa rhambiwa leswaku u va kona eka minhlangano yihi na yihi ya vona. Minhlangano ya vona a hi ya mihivahivani ya vugandzeri, kambe yi talela edyondzweni ya Xikwembu. Minhlangano ya bandlha yi pfuriwa ni ku pfariwa hi risimu ni xikhongelo. Ku va kona i ka mahala, naswona ku hava minhlengo leyi tekiwaka.—Mintirho 4:23-31; 14:22; 15:32, 35; Varhoma 16:5; Vakolosa 4:15.

Kumbexana nhlangano wo sungula lowu u nga ta hlanganyela eka wona yi ta va nkulumo ya le rivaleni ya timinete ta 45, yi tirhisanaka ni tidyondzo ta Bibele, vuprofeta, kumbe ndzayo ya mahanyelo ya Vukriste. Endzhaku ka nkulumo leyi, ku na dyondzo ya Bibele, ku tirhisiwa nhloko-mhaka eka Xihondzo xo Rindza lexi ngopfu-ngopfu xi endleriweke dyondzo ya bandlha. Dyondzo ya kona yi endliwa hi ndlela leyi: Ndzimana ya le ka Xihondzo xo Rindza ya hlayiwa, naswona mufambisi u vutisa swivutiso hi mhaka yoleyo leswaku lava yingiselaka va ta hlamula hi ku swi rhandza hi ku tlakusa voko. Hakanyingi ku nyikeriwa tinhlamulo to tala eka ndzimana yin’we. Nhlangano wa kona wu teka awara yin’we.

Endzhaku hi vhiki rero, ku khomiwa minhlangano yin’wana mimbirhi ya timinete ta 45. Wun’wana i Xikolo xa Vutirheli bya le Tilweni. Wu nyikela vuleteri bya ndlela yo vumba nkulumo hi tinhloko-mhaka ta Bibele ni ku yi dyondzisa hi vutshila. Endzhaku ka timinete ta 21 ta dyondzo leyi hlawulekeke, swichudeni leswi hlawuriweke ka ha ri emahlweni swi nyikela tinkulumo to koma. Endzhaku ka nkulumo yin’wana ni yin’wana, mufambisi wa xikolo u nyikela ndzayo a komba hi laha xichudeni xi nga antswisaka ha kona. Ku lunghiseleriwile tibuku to tala leswaku ti tirhisiwa exikolweni lexi. Lava va vaka kona etidyondzweni nkarhi na nkarhi va nga ha tsarisa, ntsendze loko va hanya hi ndlela leyi fambelanaka ni milawu ya Vukriste.

Nhlangano lowu landzelaka wu vuriwa Nhlangano wa Vutirheli. Wu endliwe hi swiphemu swinharhu kumbe mune leswi vulavulaka hi ku twarisa mahungu lamanene hi yindlu na yindlu kun’we ni timhaka tin’wana ta vutirheli. Swiphemu leswi swi nyikeriwa tanihi tinkulumo, mimbulavurisano kumbe swikombiso, ni vayingiseri va ri karhi va hlanganyela. Swo tala swa nongonoko lowu swi seketeriwe eka mahungu lama kumekaka eka Vutirheli Bya Hina Bya Mfumo, phepha ra vuleteri ra matluka ya mune leri humesiwaka n’hweti na n’hweti hi Sosayiti ya Watch Tower.

Nhlangano wa vunharhu i dyondzo ya vhiki na vhiki leyi endliwaka hi mintlawa leyintsongo, hakanyingi emakaya ya vanhu ensin’wini hinkwayo ya bandlha rero. Dyondzo leyi yi seketeriwe eBibeleni na le bukwini ya sweswinyana leyi humesiweke hi Sosayiti. Leswi ntlawa wu nga wuntsongo, ku na nkarhi lowunene wa hinkwavo wo hlanganyela eku vulavurisaneni, naswona ku na nkarhi lowunene wa leswaku lava vaka kona va tolovelana ku antswa.

Mabandlha yo tala ya khomela minhlangano ya wona eHolweni ya Mfumo leyi akiweke hi Timbhoni ta Yehova. Swixavaxavani swi endliwa hi minyikelo ya ku tirhandzela ya Timbhoni hi toxe, nakona eka minkarhi yo tala ntirho wa kona wu endliwa handle ka ku hakeriwa hi vatirhi va ku tirhandzela. Mabokisi ya minyikelo ya kumeka eka minhlangano hinkwayo leswaku ya tirhisiwa hi lava navelaka ku nyikela.

Minhlangano ya bandlha yi pfuna Timbhoni ta Yehova ku landzela ndzayo leyi nga le ka Vaheveru 10:24, 25: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona, kambe hi khongotelana, ngopfu-ngopfu leswi hi vonaka leswaku siku ra Hosi ri ya ri tshinelela.”

• I timhaka tihi ta minhlangano ya Vakriste vo sungula leti nga voniwaka eminhlanganweni ya Timbhoni ta Yehova?

• Longoloxa leswi kombisiweke eka minhlangano ya ntlhanu leyi khomiwaka minkarhi hinkwayo hi Timbhoni.

• Tiholo ta minhlangano ti kumeka hi ndlela yihi?

[Swifaniso leswi nga eka tluka 14]

Nkulu u fambisa Dyondzo ya Xihondzo xo Rindza, eUnited States

Xivono xa Xikolo xa Vutirheli bya le Tilweni, eFaeroe Islands

Dyondzo ya ntlawa ekaya ra munhu, eYap

Holo ya Mfumo, New Braunfels, Texas, U.S.A., yi akiwe hi masiku mambirhi hi Timbhoni ta Yehova

[Swifaniso leswi nga eka tluka 15]

Tiholo ta Mfumo ematikweni yo hambana-hambana

Japani

Australia

Austria

Spain