Vuyeriwa Swinene Eka Minhlangano Ya Ntirho Wa Nsimu
1. Xana minhlangano ya ntirho wa nsimu yi nga hi pfuna njhani?
1 EMinhlanganweni leyi vuyerisaka ya ntirho wa nsimu hi kuma swikhutazo ni ndzetelo lowu hi nga ta wu tirhisa ensin’wini. Yi hi pfuna leswaku hi tirha nsimu tanihi hi ntlawa swin’we ni vahuweleri van’wana leswaku hi tiyisana ni ku seketelana. (Swiv. 27:17; Ekl. 4:9, 10) Xana hi nga endla yini leswaku hi vuyeriwa swinene eka minhlangano leyi?
2. Hi swihi swilo swin’wana leswi mufambisi wa nhlangano a nga bulaka ha swona?
2 Mufambisi: A ku na rungula ro hlawuleka leri lunghiseleriweke ka ha ri emahlweni leri ku nga ta buriwa ha rona eka minhlangano ya ntirho wa nsimu. Hikwalaho, loko ku ri wena u nga ta fambisa nhlangano lowu, swi lava leswaku u lunghiselela kahle. U nga ehleketi leswaku u to fika u bula hi ndzimana ya siku ntsena, hambileswi nkarhi wun’wana u nga ha katsaka tinhla to karhi ta yona loko yi fambisana ni ntirho wa nsimu. Endla leswaku nhlangano lowu wu aka naswona lunghiselela tinhla to olova. A swi kali swi lava leswaku u hlamusela tinhla to tala leti humaka eka minkandziyiso yo hambana-hambana. Khutaza vahuweleri ku tirhisa Bibele. Anakanya hi tinhla leti tirhaka leti nga ta pfuna lava yaka ensin’wini siku rero. Hi xikombiso, u nga ha bula hi xingheniso xo karhi kumbe u endla nkombiso wa xona. U nga ha bula hi rungula ro karhi leri nga ebukwini leyi nge Ku Hlamulana ni leyi nge Xikolo Xa Vutirheli kumbe hi xihloko xa sweswinyana xa le ka Nhlangano wa Ntirho. Minkarhi yin’wana u nga ha bula hi ndlela yo angula eka mhaka yo karhi leyi vanhu va nga ha yi vulaka ensin’wini ya n’wina, kumbe u bula hi ndlela yo endla munhu leswaku a tsakela ni hi ku sungula tidyondzo ta Bibele, ngopfu-ngopfu loko ku ri leswaku vahuweleri vo tala va ta endla maendzo yo vuyela. Ku nga khathariseki leswaku u bula hi yini, hisekela rungula rihi na rihi leri u nga ta bula ha rona naswona u khutaza vahuweleri.
3. Xana nhlangano wu fanele wu teka nkarhi wo tanihi kwihi, naswona i yini leswi faneleke swi endliwa eka wona?
3 Sungula nhlangano hi nkarhi hambiloko u swi tiva leswaku van’wana va ta fika se mi sungurile. Pana vahuweleri hi vutlhari, naswona lava nga riki na nsimu u va nyika yona. Nhlangano lowu wu fanele wu teka timinete ta khume ku ya eka ta 15 naswona wu nga ha va ehansinyana ka teto loko wu endliwa endzhaku ka nhlangano wa vandlha. Hinkwavo va fanele va paniwa ni ku kombiwa nsimu leyi va nga ta tirha yona nhlangano wu nga si hela. Nhlangano lowu wu fanele wu pfariwa hi xikhongelo.
4. Xana i yini lexi nga ta hi pfuna hinkwerhu leswaku hi vuyeriwa swinene eminhlanganweni ya ntirho wa nsimu?
4 Mi Nga Pfuna: Tanihi le ka minhlangano leyin’wana ya vandlha, hi fanele hi xixima Yehovha ni ku anakanyela van’wana hi ku fika hi nkarhi. Hlanganyela ebulwini. U nga ha yimela mufambisi leswaku a ku ava ni un’wana kumbe u nga ha hlela ku tirha ni un’wana nhlangano wu nga si sungula. Loko u hlawula ku tirha ni un’wana, ringeta ku “ndlandlamuka” hi ku hlela ku tirha ni vahuweleri vo hambana-hambana ematshan’weni yo tirha ni vanghana va wena nkarhi hinkwawo. (2 Kor. 6:11-13) Loko nhlangano wu herile papalatani ku cinca lava mi aviweke na vona, naswona hatlisani mi ya ensin’wini.
5. Hi xihi xikongomelo xa minhlangano ya ntirho wa nsimu?
5 Xikongomelo xa minhlangano ya ntirho wa nsimu xa fana ni xa minhlangano leyin’wana ya vandlha. Yi hleleriwe leswaku hi ‘khathalelana leswaku hi ta khutazana erirhandzwini ni le mintirhweni leyinene.’ (Hev. 10:24, 25) Loko hi tikarhatela ku vuyeriwa eminhlanganweni leyi swi ta hi pfuna ku ya emahlweni ni ntirho wa hina wo chumayela—ku nga ‘ntirho lowunene’ hakunene!