Bokisi Ra Swivutiso

◼ Hi rihi rungula leri ku fanele ku buriwa ha rona eminhlanganweni ya ntirho wa nsimu?

Xikongomelo xa nhlangano wa ntirho wa nsimu i ku hi pfuna leswaku hi anakanyisisa hi ntirho lowu hi nga ta wu endla—ku nga vutirheli. Hikwalaho, mufambisi wa wona u fanele ku va a lunghiselele kahle naswona a lunghekele ku hi avela rungula leri khutazaka, leri kongomeke ni leri tirhaka. Loko ndzimana ya siku yi vulavula hi ku kongoma hi ntirho wa ku chumayela, yi nga ha hlayiwa yi tlhela yi hlamuseriwa hi ku komisa. Hambiswiritano, nhlangano lowu wu fanele wu dzika hi ku kongoma evutirhelini, wu pfuna hinkwavo lava yaka ensin’wini leswaku va hlomiseriwa swinene ku hetisisa vutirheli bya vona bya siku rero.—2 Tim. 4:5.

Ku nga ha buriwa hi tinhla leti tirhaka leti humaka eka Vutirheli Bya Hina Bya Mfumo, leswaku hinkwavo lava nga kona va tiva minkandziyiso leyi fambisiwaka ni ndlela leyi yi nga ta fambisiwa ha yona. Loko ku ri Siku ra Timagazini, ku nga ha endliwa nkombiso wa ku ti fambisa, ku tirhisiwa xingheniso lexi nga eka xihloko lexi nge “Leswi U Nga Swi Vulaka Hi Timagazini.” Kasi loko ku fambisiwa minkandziyiso yin’wana, ku nga ha tirhisiwa xingheniso xin’we kumbe swimbirhi leswi nga ebukwini leyi nge Ku Hlamulana, leswi nga tirhaka ensin’wini ya le ndhawini ya ka n’wina. Ku nga ha buriwa hi tindlela tin’wana ta vutirheli bya hina kumbe ku endliwa nkombiso wa ndlela leyi ti nga fambisiwaka ha yona, ku fana ni ndlela leyi Bibele yi nga tirhisiwaka ha yona eka n’wini wa muti, ndlela leyi u nga angulaka loyi a vonakaka a lava ku siva bulo, ndlela yo sungula dyondzo ya Bibele kumbe ndlela yo tlhela u endzela lava kombiseke ku tsakela.

Minhlangano ya ntirho wa nsimu a yi fanelenga yi hundza timinete ta 10 ku ya eka 15, nkarhi wolowo wu katsa ku ava vanhu, ku va nyika nsimu leyi va nga ta yi tirha ni ku khongela. Loko mi huma, un’wana ni un’wana u fanele ku tiva leswaku u famba na mani ni leswaku va ya kwihi, naswona va fanele ku hatla va ya ensin’wini ya vona. Hikwalaho ka leswi nhlangano lowu wu komeke, i swa nkoka leswaku vanhu hinkwavo va fika hi nkarhi lowu vekiweke. Loko ku ri leswaku nhlangano wa ntirho wa nsimu wu ta khomiwa endzhaku ka minhlangano ya vandlha, yo kota Dyondzo ya Xihondzo xo Rindza, wu fanele wu komisiwa. A swi bohi leswaku ku buriwa hi ndzimana ya siku hikuva ana se ku ve ni bulo lerinene ra Matsalwa. Hambiswiritano, a swi fanelanga leswaku nhlangano wa ntirho wa nsimu wu nga endliwi kumbe wu katsiwa ni Dyondzo ya Xihondzo xo Rindza.

Vamakwerhu lava fanelekaka ni lava khuvuriweke va fanele ku averiwa ka ha ri na nkarhi leswaku va fambisa nhlangano wihi ni wihi wa ntirho wa nsimu. Loko va nga ri kona vamakwerhu lava nga ta rhangela hi siku ro karhi, vakulu va fanele ku vona leswaku hi wihi makwerhu wa xisati la khuvuriweke la nga ta wu fambisa loko ku ri ni xilaveko. Makwerhu wa xisati u ta khoma nhlangano wolowo a tshamile naswona u ta endla leswaku ku buriwa hi ndzimana ya siku kumbe tinhla tin’wana leti fanelaka ntirho wa nsimu, u fanele a komisa tinhlamuselo takwe. U fanele ku ambala xo karhi enhlokweni.

Minhlangano ya ntirho wa nsimu yi hi pfulela lunghelo ra leswaku hi khutazeka ni ku hi hlomisela ku hlanganyela evutirhelini. Loko mufambisi wa wona a lunghiselele kahle na hina hi ta vuyeriwa swinene.