Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka ku ta buriwa ha swona eXikolweni xa Vutirheli bya le Tilweni hi vhiki leri sungulaka hi October 30, 2006. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra September 4 ku ya eka October 30, 2006. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Ha yini swi ri swa nkoka ku va ni xivindzi loko hi vulavula naswona hi nga ku hunguta njhani ku chuha? [Sept. 11, be-TS tl. 135 ndz. 5–tl. 137 ndz. 2, katsa ni mabokisi] Loko hi ri ni xivindzi, vayingiseri va hina va ta yingisela leswi hi swi vulaka ematshan’weni yo languta leswi hi swi endlaka. Hi nga hunguta ku chuha hi ku lunghiselela kahle, hi ku titoloveta nkulumo ya hina hi ku vulavulela ehenhla, hi ku khongela hi kombela mpfuno eka Yehovha ni hi ku kuma ntokoto hi ku hlanganyela eka mintirho ya swa moya.
2. Loko hi vutisiwa hi ta vupfumeri bya hina, ha yini hi fanele hi lwela ku hlamula hi ku tirhisa Bibele? [Oct. 9, be-TS tl. 143 tindz. 1-3] Xivangelo-nkulu xo tirhisa Bibele hileswaku i Rito ra Xikwembu naswona i xihlovo xa leswi hi swi pfumelaka, hi hanya hi ku ya hi leswi Bibele yi swi vulaka naswona timitsu ta ntshembo lowu hi nga na wona hi vumundzuku ti dzime ti twelela eswitshembisweni leswi huhuteriweke swa le Bibeleni. (2 Tim. 3:16, 17) Leswi hi tekelelaka Yesu a hi vulavuli swilo leswi humaka eka hina, kambe hi vulavula leswi humaka eMatsalweni hi ku kongoma loko hi hlamula swivutiso. (Mat. 4:3-10; Luka 24:27, 44-47)
3. Hi nga byi kuma njhani vutshila lebyi engetelekeke byo tirhisa Bibele? [Oct. 16, be-TS tl. 144, bokisi] Hi nga kuma vutshila lebyi engetelekeke byo tirhisa Bibele hi ku yi hlaya siku ni siku, hi ku nghenisa matsalwa loko hi hlamula eminhlanganweni ni hi ku kambisisa leswi Bibele yi swi vulaka hi nga si endla swiboho. Loko hi nga swi tivi leswaku Bibele yi ri yini emhakeni yo karhi, hi endla ndzavisiso ematshan’weni yo mbambela kumbe hi vula leswi hina hi ehleketaka swona.
4. Ha yini swi ri swa nkoka ku tirhisa Bibele hi xitalo loko hi ri karhi hi dyondzisa ensin’wini naswona hi nga va khutaza njhani vayingiseri ku tirhisa Tibibele ta vona loko hi ri eminhlanganweni ya vandlha? [Oct. 23, be-TS matl. 145-6, katsa ni mabokisi] Bibele yi ni matimba swinene ya ku kongomisa vanhu va timbilu letinene, ku tlula marito wahi ni wahi lawa hina hi hexe hi nga ma vulaka. Loko munhu a swi vona hi mahlo yakwe leswi Bibele yi swi vulaka, swi dzika swinene embilwini ya yena. Loko u nyikela nkulumo evandlheni, kombela vayingiseri hi ku kongoma leswaku va pfula matsalwa, kutani u va nyika nkarhi lowu eneleke wa ku pfula Bibele.
5. Hi tihi tipakani ta hina timbirhi loko hi hlamusela tsalwa hi nga si ri hlaya? [Oct. 30, be-TS tl. 147 ndz. 2] Loko hi nga si hlaya tsalwa, pakani ya hina i ku endla leswaku vayingiseri va swi langutela hi mahlo-ngati ku twa leswi tsalwa rero ri swi vulaka ni ku kombisa xivangelo xa ku tirhisa tsalwa ra kona.
NKULUMO NO. 1
6. Hi rihi rungula ra nkoka leri tameriweke hi Tipisalema? [Sept. 18, si-TS tl. 104 ndz. 23] Tipisalema ti endla leswaku hi twisisa tidyondzo ta xisekelo ta Bibele leti enteke, ti vulavula ngopfu hi Yehovha Mutsari wa tona. Ti swi veka erivaleni leswaku i Muvumbi wa vuako hinkwabyo swin’we ni xin’wana ni xin’wana lexi xi nga eka byona. (Ps. 8:3-9; 90:1, 2; 100:3; 104:1-5, 24; 139:14)
7. Xana buku ya Swivuriso yi tsariwe rini naswona rungula ra yona ri hlengeletiwe rini? [Oct. 2, si-TS tl. 107 ndz. 5] Handle ko tipfinyinga xiyenge lexikulu xa buku leyi ya Swivuriso xi tsariwe enkarhini wa ku fuma ka Solomoni (1037-998 B.C.E.) loko a nga si hambuka. Tanihi leswi rungula rin’wana ra tindzima ta yona ri hlengeletiweke loko ku fuma Hezekiya (745-717 B.C.E.), a swi nge koteki leswaku rungula ro hetelela ra buku leyi ri va ri hlengeletiwe emahlweni ka ku fuma ka yena. Leswi swi katsa ku hlengeletiwa ka swiphemu swimbirhi swo hetelela swa buku leyi, leswi na swona swi hlengeletiweke hi nkarhi wa ku fuma ka Hosi Hezekiya. (Swiv. 25:1) Nhlamuselo ya le hansi leyi swi vekaka erivaleni leswi Swivuriso 31:31 yi vulaka swona eka NW, yi ri: “[Minkandziyiso] yin’wana ya tsalwa ra [Xiheveru] yi kombisa “trigrammaton,” kumbe tinhlanga tinharhu ta ririmi, ku nga ‘Chehth, Zaʹyin, Qohph’ (חזק) leti ti yimelaka nsayino wa Hosi Hezekiya entirhweni wo kopa lowu endliweke hi vatsari va yena ku kombisa leswaku ntirho a wu hetiwile.”
8. Xivuriso i yini, naswona ha yini nhloko-mhaka ya Xiheveru yi fanela buku leyi ya Swivuriso? [Oct. 9, si-TS tl. 107 ndz. 6] Xivuriso i marito yo koma kambe ya nkoka lama hakanyingi ma kombisaka ku fana kumbe ma fanisa mhaka ni swo karhi, naswona ma endleriwe leswaku loyi a ma twaka a ehleketa ha wona. Etibibeleni ta Xiheveru, eku sunguleni buku leyi a yi vitaniwa hi rito ro sungula ebukwini leyi leri nge “mish·lehʹ,” leswi vulaka “swivuriso.” “Mish·lehʹ” i vunyingi bya riviti ra Xiheveru leri nge “ma·shalʹ,” ku nga riviti leri hi ntolovelo ku anakanyiwaka leswaku ri tekiwe eka rito-nkulu leri vulaka “ku fana na.” Rito leri ri swi hlamusela kahle leswi swi nga endzeni ka buku leyi.
9. Xana xi vula yini xikhutazo lexi nga eka Swivuriso 2:1-5, xa leswaku hi hambeta hi lavisisa vutivi, ku twisisa ni vutlhari “kukota silivhere [ni] . . . xuma lexi fihliweke”? [Oct. 16-TS, be tl. 38 ndz. 5] Xigego lexi xa Swivuriso xi vula matshalatshala ni vuyelo lebyi fuweke. Ku endla ndzavisiso i ntirho, kambe loko hi wu endla swi ta hi pfuna leswaku hi kuma ndlela leyi Xikwembu xi langutaka mhaka ha yona, hi kota ku ololoxa mianakanyo leyi hoxeke ni ku dzikisa ntiyiso eka hina. Nakambe swi ta endla leswaku tinkulumo ta hina ti va ni ntikelo, ti hanya, hi ta tsakela ku ti nyikela naswona ti ta tsakisa.
10. Xana buku ya Swivuriso yi xi hlamusela njhani xikongomelo xa yona xa ku pfuna vanhu? [Oct. 23, si-TS tl. 109 ndz. 19] Xikongomelo lexi pfunaka xa buku leyi xi hlamuseriwile etindzimaneni ta yona to sungula, leti kandziyisaka vutivi, vutlhari ni ku twisisa tanihi timfanelo ta nkoka leswaku hi tirhela Yehovha hi ndlela leyi amukelekaka. (Swiv. 1:2-4)
KU HLAYA KA BIBELE KA VHIKI NI VHIKI
11. Xana Davhida u ‘khongotele ni ku miyeta moya-xiviri wa yena ku fana ni n’wana wa ndzumulo ehenhla ka mana wa yena’ hi ndlela yihi naswona hi nga n’wi tekelela njhani? (Ps. 131:1-3) Tanihi leswi n’wana wa ndzumulo a kumaka nchavelelo ni ku eneriseka emavokweni ya mana wakwe, Davhida u dyondze ku khongotela ku navela ka yena hi ku xiya ku tsana ka yena kutani a titsongahata. A nga lavanga vukulu, ku tlakusiwa kumbe ku tirhisa matimba ya yena ku titlakusa leswaku a ta va hosi. U rindze Yehovha hi ku titsongahata ni ku lehisa mbilu. Hi nga tekelela Davhida hi ku nga hisekeli ku lava xikhundlha kumbe ku va ni ndhuma. Ematshan’weni yo titlakusa, hi fanele hi rindza Yehovha. [Sept. 11, w06-TS 9/1 “Rito Ra Yehovha Ra Hanya—Tinhla-nkulu Ta Buku Ya Vuntlhanu Ya Tipisalema”; w77 7/15 tl. 445]
12. Hi wihi nchavelelo lowu hi nga wu kumaka emaritweni lama huhuteriweke ya Pisalema 139:7-12? Emisaveni ku hava ndhawu leyi Yehovha swi n’wi tikelaka ku fika eka yona. Moya wa yena lowo kwetsima wu nga hi fikelela ku nga khathariseki leswaku hi le kwihi. Ku hava nchumu lowu nga sivelaka Xikwembu leswaku xi hi fikelela. Loko hi lwela ku tirhela Yehovha, u ta hi pfuxa hambiloko hi file. Malandza ya Yehovha lama tshembekeke ma nga titshega hi nseketelo wa yena wa rirhandzu. [Sept. 18, w06-TS 9/1 “Rito Ra Yehovha Ra Hanya—Tinhla-nkulu Ta Buku Ya Vuntlhanu Ya Tipisalema”; w93-TS 10/1 matl. 12-13]
13. Hi swihi swikombiso swin’wana swa vukulu bya Yehovha leswi boxiweke eka Pisalema 145, leswi hi nga n’wi dzunisaka ha swona eswikhongelweni swa hina ni le ntirhweni wo chumayela? (Ps. 145:3) Swikombiso swa vukulu bya Yehovha lebyi nga lavisisekiki leswi hi nga n’wi dzunisaka ha swona swi katsa leswi landzelaka: mintirho yakwe yo hlamarisa leyi a yi tumbuluxeke (tindz. 9, 10), mintirho ya yena ya matimba yo ponisa vagandzeri vakwe vo tshembeka (tindz. 4, 6, 14, 18-20), vunene bya yena byo nyika xin’wana xin’wana lexi faneleke vutomi lebyi nga heriki (tindz. 7, 15, 16) ni vumunhu bya yena (tindz. 7-9, 17). [Sept. 25, w04-TS 1/15 matl. 10-14; w90-TS 9/15 matl. 11-15]
14. Xana ku chava Yehovha i “masungulo ya vutivi” ni “masungulo ya vutlhari” hi ndlela yihi? (Swiv. 1:7; 9:10) Handle ko chava Yehovha munhu a nge vi na vutivi, hikuva hi yena Muvumbi wa swilo hinkwaswo ni Mutsari wa Matsalwa. (Rhom. 1:20; 2 Tim. 3:16, 17) Hi yena Xihlovo xa vutivi hinkwabyo bya ntiyiso. Hikwalaho, vutivi byi sungula hi ku va ni xichavo lexikulu eka Yehovha. Ku chava Xikwembu ku tlhela ku va ku sungula ka vutlhari hikuva ku hava vutlhari loko ku nga ri na vutivi. Ku tlula kwalaho, munhu la nga n’wi chaviki Yehovha a nge byi tirhisi vutivi byo xixima Muvumbi. [Oct. 2, w06-TS 9/15 “Rito Ra Yehovha Ra Hanya—Tinhla-nkulu Ta Buku Ya Swivuriso”; rs-TS tl. 49]
15. Marito lama nge “marito ya mina” ni “swileriso swa mina” lama nga eka Swivutiso 7:1, 2, ma katsa na yini? Ku engetela eka tidyondzo ta Bibele, marito lawa ni swileriso leswi swi katsa milawu ya ndyangu kumbe swileriso leswi simekiweke hi vatswari. (Det. 6:6, 7; Efe. 6:4) Loko swileriso swoleswo swa vatswari swi nga lwisani ni nawu wa Xikwembu, vana va fanele va swi landzela, tanihi leswi swi simekiweke hikwalaho ka rirhandzu ni leswaku ndyangu wu vuyeriwa. (Swiv. 6:20-22) [Oct. 9, w06-TS 9/15 “Rito Ra Yehovha Ra Hanya—Tinhla-nkulu Ta Buku Ya Swivuriso”; w00-TS 11/15 tl. 28]