Switiviso

◼ Minkandziyiso leyi nga ta fambisiwa hi October: Fambisani Xihondzo xo Rindza ni Xalamuka! November: Fambisani buku leyi nge Dyondza Eka Mudyondzisi Lonkulu. December: Fambisani buku leyi nge Nghwazi Leyi Tshameke Yi Hanya.

◼ Leswi December yi nga ni mahelo-vhiki ya ntlhanu, yi ta va n’hweti ya kahle yo nghenela vuphayona bya nkarhinyana.

◼ Xiengetelo lexi nga eka nkandziyiso lowu wa Vutirheli Bya Hina Bya Mfumo i “Xiyimiso Xa Xikolo Xa Vutirheli Bya Le Tilweni Xa 2007” kutani xi fanele xi hlayisiwa leswaku xi ta tirhisiwa lembe hinkwaro ra 2007.

◼ Vhidiyo leyi nge No Blood—Medicine Meets the Challenge yi ta tlhuvutsiwa eka Nhlangano wa Ntirho wa January. Loko ku ri ni lava va lavaka DVD leyi nga ni vhidiyo leyi kumbe vhidiyo hi yoxe, va fanele va endla xikombelo xa swona hi ku hatlisa evandlheni.

◼ Lembe leri a swi bohi ku endla xikombelo xa swirhambo swa Xitsundzuxo xa 2007 tanihi leswi swi nga ta rhumeriwa evandlheni rin’wana ni rin’wana ka ha ri ni nkarhi. Loko mavandlha ma tirhisa Holo yin’we ya Mfumo, makwerhu la ungamelaka tibuku ta vandlha u fanele a tiyiseka leswaku vandlha rin’wana ni rin’wana ri kuma mphakelo wa rona. Ku sukela hi 2007 ku ya emahlweni, swirhambo swa Xitsundzuxo a swi nge he tsariwi lembe, kutani leswi salaka swi nga vekiwa ivi swi tirhisiwa lembe leri landzelaka. Vahuweleri va fanele va tsala nkarhi ni adirese eka xirhambo xa Xitsundzuxo lexi va xi nyikaka munhu, tanihi leswi swirhambo leswi saleke swi nga ta tirhisiwa eka lembe leri landzelaka loko swi nga tsariwanga nchumu. Loko ku laveka nhlayo yo karhi kumbe tindzimi to karhi ta swirhambo leswi ku engetela eka leswi mi rhumeriweke swona, mi nga rhumela xikombelo hi fomo leyi nge Literature Request Form (S-14). Hi kombela mi kombisa leswaku leswi swo engetela eka leswi ana se swi rhumeriweke. Swirhambo swa Xitsundzuxo swi ta kumeka hi Xibunu, Xifurwa, Xinghezi, Xipedi, Xiputukezi, Xisuthu, Xitsonga, Xitswana, Xixhosa ni Xizulu.

◼ Ku hava lunghiselelo ra leswaku mi tilandzela mphakelo wa minkandziyiso ya vandlha ra n’wina eBethele. Vandlha rin’wana ni rin’wana ri wela eka muganga wo karhi lowu kumaka mphakelo wa wona hi siku ro karhi ntsena. Ntirho wu tele ngopfu erhavini lerova vamakwerhu a va swi koti ku wu tshika leswaku va ta mi nyiketa mphakelo wa vandlha ra n’wina. Hambiswiritano, mi pfumeleriwile ku siya fomo ya n’wina leyi nge Literature Request Form (S-14) loko mi endzela eBethele.

◼ Siku ra hina ro hlawuleka ro Fambisa Timagazini ri ta va hi April, 14, 2007. Hi khutaza vahuweleri hinkwavo leswaku va sungula ku kunguhata ka ha ri sweswi leswaku va ta hlanganyela hi xitalo hi nkarhi lowu wo hlawuleka. Mavandlha ma fanele ma sungula ku endla swikombelo swa timagazini hi ku hatlisa hilaha ma nga kotaka hakona.

◼ Nkulumo yo hlawuleka ya le rivaleni leyi fambisanaka ni nkarhi wa Xitsundzuxo xa 2007 yi ta nyikeriwa hi Sonto, April 15, 2007. Nhloko-mhaka ya yona yi ta tivisiwa hi ku famba ka nkarhi. Nkulumo leyi yi ta nyikeriwa vhiki leri landzelaka eka mavandlha lama nga ta va ma endzeriwe hi mulanguteri wa xifundzha kumbe ma ri ni nhlengeletano hi mahelo-vhiki lawa. A ku na vandlha leri nga ta nyikeriwa nkulumo yo hlawuleka ku nga si fika April 15.

◼ Hi Mugqivela, October 14, 2006, ku ta va ku pfariwile erhavini hikuva ku ta va ku basisiwa.