Ku Tirhisa Tibuku Ta Hina Hi Ndlela Leyinene

1 Nhlengeletano ya Yehova leyi vonakaka yi hi phamele tibuku to tala to hambana-hambana ku hi pfuna entirhweni wa hina wo chumayela ni ku dyondzisa. (Mat. 28:19, 20) Ku tlangela ka hina tibuku ta Sosayiti ku fanele ku hi susumetela ku ti tirhisa hi ndlela leyinene evutirhelini bya hina.

2 Eku hetisiseni ka vutirheli bya hina, hi lava ku pfuna lava fanaka ni tinyimpfu leswaku va nghena endleleni leyi yisaka evuton’wini. Tibuku ti nga hi pfuna ku endla sweswo. Loko hi bula hi Matsalwa ni munhu la tsakelaka, hi nga ha kuma leswaku mhaka yo karhi ya n’wi tsakisa. Loko hi tolovelane kahle ni rungula leri tirhaka leri nga eka tibuku to hambana-hambana, hi ta swi kota ku cinca mhaka ya hina ivi hi nyikela buku leyi vulavulaka hi ku tsakela ka munhu loyi hi vulavulaka na yena hi ku kongoma. Leswi swi nga ha lava leswaku hi endla riendzo ro vuyela hi ri ni buku leyi faneleke.

NYIKELA LESWI LAVEKAKA

3 Hi ku tirha nsimu ya hina hi vukheta, hi ta kuma vanhu lava tsakelaka Bibele hi mbilu hinkwayo ni lava va lavaka ku tiva leswi engetelekeke ha yona. Yihi na yihi ya tibuku ta hina yi nga va pfuna va kota ku twisisa Bibele. Kambe loko hi vulavurisana ni munhu la nga riki na ripfumelo eBibeleni ni vupfumeri lebyi kanetaka kumbe lebyi nga riki bya sayense, swi nga ha va swi fanerile ku nyikela buku leyi nge Bibele—I Rito Ra Xikwembu Kumbe I Ra Munhu? Buku yoleyo yi kaneta ku xopaxopa ka vanhu ka Bibele hi vukheta naswona yi nyikela tinhlamuselo leti nga erivaleni ta leswaku ha yini Bibele yi fanele ku amukeriwa tanihi Rito ra Xikwembu. Kumbe u nga nyikela buku leyi nge Ku Lavisisa Ka Vanhu Xikwembu, u tirhisa tindzima 15, 16.

4 Vanhu vo tala va langutane ni swiphiqo evuton’wini bya vona bya le kaya. Va nga ha va va ri ni vutivi byintsongo bya ndzayo ya Bibele kumbe ndlela leyi va nga yi tirhisaka ha yona. Ku va pfuna leswaku va langutana ni swiphiqo swa vutomi ni ku kuma tinhlamulo leti tirhaka, hi nga ha nyikela buku leyi nge Family Life. Ku hundzuka hakanyingi a ku nge ti hi xihatla, kambe hi nga kombisa leswaku ndzayo ya Bibele ya tirha hakunene.

5 Loko u endzela vanhu lava nga ni vana, xiya ku nyikela tibuku leti hi ku kongoma ti lunghiseleriweke hi ku tsundzuka vantshwa. Kumbexana u nga tirhisa buku leyi nge Vantshwa. Vahuweleri vo tala va pfune vatswari ni vantshwa hi ndlela leyi fanaka hi ku nyikela Buku Yanga Ya Timhaka Ta Bibele kumbe Listening to the Great Teacher.

6 Swiphephana swa olova ku swi rhwala, naswona swi nga tirhisiwa ku sungula mabulo loko hi tirha hi yindlu na yindlu kun’we na loko hi nyikela vumbhoni hi xitshuketa. Hi Wihi Ntshembo Wa Varhandziwa Lava Feke? i xiphephana lexi chavelelaka swinene, lexi nga ni rungula leri tirhaka. Xana wa swi rhwala swiphephana swo hambana-hambana loko u famba? Xana u na tinhlamuselo leti lunghiseleriweke to swi tivisa?

7 Loko hi avelana mahungu lamanene ni van’wana, hi fanele ku tirhisa swipfuneto swo tala swo dyondza Bibele hi ndlela leyinene leswi lunghiseleriweke hi “nandza la tshembekaka, wo tlhariha.” (Mat. 24:45-47) Ndzalo yo tano ya swakudya swa moya yi kombisa ku hanana ka Yehova ni nkhathalelo wa yena wa vanhu hinkwavo.