Ku Pfuna Van’wana Va Vona Nkoka Wa Tibuku Ta Hina

 ¹ “Rito ra Šikwembu i rito le’ri hanyaka, le’ri tiraka.” (Hev. 4:​12) Tanihi leswi tibuku ta hina leti sekeriweke eBibeleni ti pfunaka vanhu leswaku va vuyeriwa ematimbeni ya Rito ra Xikwembu, hi ti tirhisa ku pfuxa ku tsakela eBibeleni loko hi nyikela vumbhoni bya xitshuketa kumbe loko hi nghena hi yindlu na yindlu.

 ² Nyiko ya buku hi January i buku yin’wana ni yin’wana ya khale ya matluka ya 192 leyi humesiweke emahlweni ka 1980 leyi nga kona exitokweni xa vandlha hi munyikelo wa R1,00. Loko tibuku to tano ti ri kona evandlheni ra ka n’wina, lunghiselela mhaka ya wena ya rungula ra Mfumo leyi nga ta ku yisa emhakeni yo karhi ebukwini leyi u yi tirhisaka. Xana leswi swi nga endliwa njhani?

 ³ Ndlela Yo Lunghiselela: Xo sungula, hlawula xivulwa ebukwini leyi u yi tirhisaka, lexi nga tsakisaka vanhu va timbilu letinene ensin’wini ya ka n’wina. Xa vumbirhi, ehleketa hi xiendlakalo xa sweswinyana kumbe mhaka leyi tolovelekeke yo tsakisa leyi u nga bulaka ha yona ni n’wini wa muti hi ku komisa u nga si n’wi komba xivulwa lexi tsariweke lexi u xi hlawuleke. Kumbexana ku nga ha va na tsalwa leri kombisiweke kumbe leri tshahiweke leri u nga ri hlayaka, kumbexana u ri hlaya eBibeleni kumbe ebukwini hi ku kongoma, ku seketela marito ya wena. Ringeta ku n’wi siya na xivutiso kumbe mhaka leyi u nga ta yi tirhisa tanihi xisekelo loko u endla riendzo ro vuyela.

 ⁴ Mavandlha man’wana ma ni tikopi to hlayanyana ta buku leyi nge Xana Vutomi Lebyi Byo Va Na Sweswi Ntsena? Loko buku leyi yi ri kona, ha yini u nga lunghiseleli mabulo ya wena hi swivutiso swin’wana leswi hlamuseriwaka ebukwini leyi, swo fana ni leswi: Xana rifu ri tise ku yini?, Xana u fanele u chava vafi?, Xana tihele ta hisa?, kumbe, Xana u nga swi kota ku vulavula ni vafi? Vanhu vo tala va vutisa swivutiso leswi, naswona va nga tsakela ku kuma tinhlamulo. Va khutaze leswaku va hlaya buku leyi leyinene.

 ⁵ Fambisa Buku Leyi Nge Ntiyiso Lowu Yisaka eVuton’wini Lebyi Nga Heriki: Endzhaku ko titivisa, u nga ha ku: “Ndza tshemba leswaku u ta pfumela leswaku swi tikomba swi nga koteki ku va ni ntsako wa xiviri emisaveni hambi swa xinkarhana hikwalaho ka swiphiqo hinkwaswo leswi hi langutaneke na swona swo tanihi vuvabyi, ku dyuhala, ndlala, vugevenga ni ku pfumala nsirhelelo. [Yimela n’wini wa muti a hlamula.] Ku na swivangelo leswinene leswi swi hi endlaka hi pfumela leswaku hakunene swa koteka leswaku hi nga hanya hi laha ku nga heriki hi ku tsaka emisaveni. Xivangelo xin’wana hi leswaku Xikwembu xa swi tshembisa. Xiya leswi vuriwaka laha eka Pisalema 37:​29. [Hlaya.] Kambe ku vuriwa yini hi swilo leswi vangaka gome leswi hi swi vuleke? Eka Nhlavutelo 21:⁠4, Xikwembu xi tshembisa ku swi herisa. [Hlaya.] Ndza swi tiva leswaku u nga rhandza ku dyondza swo tala, xisweswo ku ku pfuna ku endla tano, hi fambisa buku leyi.” Kutani kombisa n’wini wa muti yinhla leyi humaka ebukwini leyi nge Ntiyiso.

 ⁶ Minkarhi yin’wana swi nga ha fanela ngopfu ku fambisa timagazini kumbe xiphephana. Hi na swivangelo leswi twalaka swa ku gingiriteka ni ku hisekela ku pfuna van’wana leswaku va hlaya tibuku leti, leswaku va hlomiseriwa ku vona matimba ya Rito ra Xikwembu evuton’wini bya vona hi ku landzela nkongomiso wa rona.